By: Jose da Costa
Iha 11 de Abril 2011, notisia TVTL nian pubilika konaba CPD-RDTL sira iha zona Waibobo prontu no hein Xanana Gusmao nia Visita ba iha Waibobo. Tuir Coordenador CPD-RDTL zona Waibobo katak sira konsidera Xanana Gusmao nudar sira nia Komandante Supremo. Importante duni ba Timor Leste, atu forsa politika hotu-hotu bele hamutuk para lori dezenvolve rai ne'e husi beik no mukit. Forsa politika nebe hau asosia iha ne'e mak Forsa Politika CNRT, UNDERTIM, Fretilin-Mudansa no CPD-RDTL. Atu oinsa ba mos situasaun Waibobo lori ita ba dalan klot ida atu hanoin katak, nudar Gerileiro no Antigos Kombatentes da Libertasaun Nasional, sira hotu iha emosaun ida klean tebes hodi afirma sira nia pozisaun ba sira nia Komandante Supremo Kayrala Xanana Gusmao.
Rona husi katuas sia konta dehan, sira ne'e bele fahe malu iha oin no iha palku politika, maibe sira nia laran sei fo ba malu nafatin no sira labele husik malu. Rasaun ida ne'e hatudu duni iha pratika, tamba iha 2007 Partidu CNRT liu husi lideransa Kayrala Xanana Gusmao, maski hari no organiza a'an iha fulan 2 nia laran deit, konsege dada povo barak nia simpatia, ate partidu barak nebe solido tebes iha tempu hirak ba kotuk konsege naksobu no fo sira nia apoio no konfiansa tomak ba Kayrala Xanana Gusmao. Ida ne'e hatudu momos ba ita nudar sidadaun katak povo ida ne'e hamutuk ho nia camaradas veteranus sira sei iha konfiansa no emosaun ida klean ba sira nia komandante supremo no nudar povo nia mata dalan ba Libertasaun patria uluk to'o agora.
CPD-RDTL, Undertim, Fretilin Mudansa no CNRT ne'e mesak is Fretilin nia deit nebe sai husi Fretilin tan la aseita ho lideransa sira nebe atual. La aseita purke lakohi atu ema etragador sira mai estraga rai ne'e, rai nebe ita hotu sofre, ita hotu terus, mais depois tan interese ema rua ka tolu nebe nunka senti povo ida ne'e nia terus, toba diak, no han diak iha liur, ikus mai hakarak estraga fali rai ne'e. Hau nia espresaun ida ne'e totalmente refere ba Lideransa hanesan Dr. Mari Alkatiri ho nia elementus sira nebe mai husi rai liur, Excepto Dr. Ramos Horta no Dr. Jose Luis Guterres.
Hau nia belun ida dehan ba hau nune'e "Iha 2000, iha kantor eis CNRT katuas Xanana dehan ba Taur; Uluk ita iha Ailaran, ita kaer kilat deit, ita la apriende komputador, ita la apriende sistema governasaun, komu ita iha Frente tolu iha ita nia luta, diak liu fo lai tempu ba ita nia Frente Diplomatiko sira hodi kaer ukun, depois Frente klandestina no Frente Armada bele sikat le'et para depois apriende hamutuk ho sira".
Maibe saida mak akontese, fo tiha ba sira Frente Diplomatiko, situasaun sai a'at liu tan ona, fahe kilat ba lalos, hateten a'at veteranu sira ba lalos, hateten a'at klandestina sira ba lalos, ate Igreja nebe ema no mundu hotu hatene, katak hola parte mos iha funu, hateten a'at tan sira. Ho sira ne'e hotu mak ikus mai, Iha ona Undertim, Fretilin-Mudansa no CNRT. CPD-RDTL existe nanis kedas, maibe la fo sira nia apoio ba lideransa aktual iha Fretilin nian. Ho rajaun sira ne'e hotu mak CNRT hamrik. Hamrik nudar forsa politika ida nebe bele halibur no akumula komponente, matenek Timor oan hotu, hodi hamutuk atu lori Dezenvolvimentu ba oin. Tamba ida ne'e, CPD-RDTL, UNDERTIM, Fretilin-Mudansa no CNRT, Persiza atu hamutuk iha loron ida para garantia katak, laos sira nebe mai husi Liur deit mak bele ukun no hatene sisteme governasaun nian. Hafoin, bolu gerasaun foun sira nebe ohin loron halibur iha partidu seluk atu hamutuk no apriende ho ita bo'ot sira hodi Dezenvolve rai ne'e ba oin, no konkretiza mehi nebe iha anstes tiha ona. Skill bele treinu, sistema bele apriende tuir maibe atitude servi, Komitmentu ba rai ne'e, Patriotismo no Nasionalismo bele sai sasukat importante oinsa lori rai ne'e ba dalan prospero.
Fiar an la'o ba oin. Fiar an katak ita mos bele.
Sem comentários:
Enviar um comentário