Kambodia hakarak aprende ba Timór-Leste iha area jestaun mina ho gas

Thursday, March 31st, 2011 | Posted by TimorExpose

Primeiru Ministru Kambodia Hun Sen kongratula Timór-Leste tamba konsege sai nudar ezemplu di’ak iha area jestaun rekursu naturais nian, liu-liu jestaun ba mina ho gas.

Esperasaun ne’e hato’o relasiona ho visita offisial Prezidente Republika Jose Ramos Horta iha Palacio Rumchek Kambodia Tersa-feira (29/03).

Tuir Komunikadu nebe mak Redasaun asesu hateten Kambodia sei haruka ekipa balun mai Timor-Leste hodi aprende kona-ba esperensia Timor-Leste nian ne’e oinsa jere rekursu naturais hanesan mina ho gas.
Lei Fundu mina rai Timór-Leste nebe diak liu iha mundu, Implementasaun transparensia iha industria estrativa sai dahuluk iha asia no datolu iha mundu tamba nudar membru kumpridor Extractive Industries Transparancy Initiative – EITI, Debate Orsamentu Geral Estadu, inklui portal transparênsia nudar indikador positivu iha gestaun rekursu natirais.

Aleinde ne’e Primeiru Ministru Hun Sen mós kongratula Prezidente Ramos-Horta no lideransa Timor-oan sira seluk ne’ebe konsege konsolida dame iha nasaun laran, no lori nasaun Timor-Leste ba moris sosial no ekonomia ne’ebe di’ak liu-tan durante ne’e Primeiru Ministru Hun Sen espera katak ho vizita ne’e sei hametin liu-tan relasaun bilateral entre rai rua nian iha futuru oin mai.

Iha enkontru ne’e Primeiru Ministru Hun Sen hato’o katak nia parte apresia tebes ba determinasaun Timor-oan sira nian hodi luta ba ukun rasik-an.

Entertantu Prezidente Republika iha sorumutu refere hateten Timor-Leste oras ne’e dau-daun sei sai nafatin nasaun importador ba sasan konsumu nian. Tamba ne’e Xefe Estadu hakarak atu buka oportunidade klean liu tan ba iha area komersiu no relasaun ekonomia ho Kambodia,
tamba Kambodia mos sai hanesan nasaun importador fos mai Timor Leste no nia sasan mos
ho kualidade ne’ebe bele kompete.

Iha enkontru ne’e Prezidente Ramos-Horta kestiona mos kona ba Timor Leste nia hakarak atu adere ba organizasaun ASEAN no husu ba Primeiru Ministru Hun Sen atu apoia Timor Leste nia hakarak ne’e, iha tempu ne’e kedas Hun Sen deklara katak Kambodia mos preparadu ona hodi simu Timor-Leste hodi sai nudar membru organizasaun ASEAN ba Sanolu resin ida iha eventu ASEAN SUMMIT iha Phnom Penh tinan oin mai. Xefe Estadu Ramos-Horta informa ba Xefe Governu Kamodia kona-ba mudansa foun iha Timor-Leste hanesan konsolidasaun dame. estabilidade no dezenvolvimentu ekonomia Timor Leste oras ne’e dau-daun, inklui fundu Minarai Timor Leste nia nebe mak sai hanesan sasukat ba dezevolvimentu Timor Leste, ne’ebe konsege ona hatun kiak ba 9%, partisipasaun edukasaun iha rai laran ne’ebe sa’e ba 75%.
Delegasaun Prezidente Republika  halo  audiensia mós ho liurai Kambodia, Preah Bat Samadech Preah Boromneath   Iha kalan Xefe Estadu ho ninia delegasaun simu honra ba han kalan ho Liurai Kambodia iha Palacio Phnom Penh.(Feb)