Debate OJE 2011 Iha Jeneralidade, Deputados AMP – FRETILIN Sei Tensaun Baixo

Written by Domingos da Silva - CJITL - Friday, 14 January 2011

Dili flash, Debate Orsamentu Jeral d Estado – OJE 2011 ne’ebe ohin sei remata iha jeneralidade hatudu nafatin disiplina entre deputados ou tensaun sei tun la hanesan ho debates sira iha tinan uluk – uluk liu ba.
Tuir observasaun CJITL online iha parlamentu nasional hatudu katak deputadu husi bankada maioria ou Aliansa Maioria Parlamentar – AMP no deputado husi bankada FRETILIN hato’o intervensaun ho kalma no disiplina.

Deputado Arsenio Bano ne’ebe iha tinan tinan sempre agresivu no ofensivu ne’ebe nunka temi Primeiru Ministru – PM ho liafuan “sua Exelensia” maibe iha debate OJE tinan ne’e komeca mosu ho liafuan ne’e maske temi nafatin Ministra Defaktu ba Ministra Planu no Financas, Emilia Pires ne’ebe akompanya PM iha meja plenaria.

Nune’e mos deputado AMP hanesan husi bankada barak liu mak halo steitmentu ho laran malirin no komik.

Hanesan deputado Mateus de Jesus husi bankada AMP – UNDERTIM bainhira halo intervensaun louva governasaun AMP hodi hateten “Hau CINTA Dezenvolvimentu”.

Nune’e mos bankada Fretilin, Deputada Aisha Baisareawan hateten, “governu tenki halo planu didiak ba dezenvolvimentu se lae bele TERLAMBAT”.

Tuir mos observasaun CJITL, iha parte kotuk plenaria OJE 2011 nian, asiste mos husi joventude intelektual Timor oan nian ne’ebe sai membru ba parlamentu foinsa’e Timor Leste nian.

Debate orsamentu iha jeneralidade sei remata ho votasaun iha loron ohin, molok hahu fali debate iha specialidade hahu Segunda feira semana oin. (Domingos da Silva/CJITL)

Iha Tinan 2011 Nia Laran, Governu Sei Hari’i Uma Hamutuk 11.240

.
Written by Domingos da Silva - CJITL - Friday, 14 January 2011

Dili flash, Tuir proposta Orsamentu Jeral do Estado –OJE 2011 ne’ebe debate hela iha parlamentu nasional, Governu aprezenta planu atu hari’i uma ba populasaun hamutuk 11.240 iha teritoriu Timor tomak.
“Tuir planu, governu sei hari’i uma hamutuk 5 kada aldeia ida, nune’e governu sei hari uma hamutuk 11.240 iha aldeia 2248 iha teritorio laran” haforsa tan husi Rui Hanjam, Vice Ministru Planu no Financas liu husi konferensia ba imprensa, Quinta feira loraik, hafoin debate proposta OJE 2011.

Debate OJE 2011 iha jeneralidade tuir rejimentu Parlamentu, sei remata Sexta feira ohin, no hahu Segunda feira semana oin sei hahu fali debate iha specialidade ou kada ministeriu idak – idak molok aprovasaun.

Ba tinan 2011, governu aprezenta orsamentu hamutuk miliaun $948 ho aumenta tan fundu rua ho naran fundo infra estrutura no fundo ba rekursu humanu ne’ebe orsamentu ne’e rasik tau direitamente iha iha gabinete Primeiru Ministru nia okos ou PM mak jere. (Domingos da Silva/CJITL)