quarta-feira, 2 de março de 2011

PGR Du'un Ema Nain Lima Kolui Hariku Aan Fahe US$1779, Publiku Du'un PGR Halo Politika Persegisaun

Tempo Semanal-Dili, 02.03.2011
Breaking News

Iha tuku sia minutu rua nolu resin haat juiz sira ne’ebe hala’o julgamentu ba kazu alegasaun kontra Vice Primeiru Ministru DR. Jose Luis Guterres tama ba salaun julgamentu tribunal distrital Dili.

DR. Jose Luis Guterres tuur besik DR. Joao Freitas Camara, Embaixador Timor Leste ba Thailandia ne’ebe mos sai hanesan arguido ba kazu hanesan.

Iha julgamentu ohin DRA. Ana Maria de Jesus M. Valeria la marka prezensa nune’e tribunal labele hala’o julgamentu. Razaun seluk Tribunal labele julga membru do Governu ida tan ba Parlamentu Nasional seidauk hasai imunidade Vice Primeiru Ministru DR. Jose Luis Guterres ninian.

Foun-foun arguido ba kazu Kolui hodi hariku aan hamutuk ne’e ema nain lima maibe Tribunal distrital dili haruka fila kazu DR. Zacarias Albano da Costa ho DR. Rogeiro dos santos ninian iha loron 19/11/2010 ho razaun falta evidencia.

Tuir mai iha loron 13/12/2010 Prokuradoria jeral da Republika halo rekursu ba tribunal de rekursu no tuir fontes jornal ne’e  iha tribunal Dili dehan Prokuradoria da Republika husu atu juiz constantino labele julga kazu refere.

Tuir dokumentus konfidensial loron 31/08/2010 husi prokuradoria jeral da republika ne’ebe jornal Tempo Semanal asesu, ministeiru Publiku akuza DR. Jose Luis Guterres, Vice Primeiru Ministru RDTL, Ministru Negosiu Estranjeiru, DR. Zacarias Albano da Costa, DR. Joao F. do Camara, Embaixador Timor Leste ba Thailandia, DR. Rogeiro dos Santo, Funsionario ka diplomata iha Embaixada TL ba Brasil no DRA. Ana Maria de Jesus Moreira Valeiro involve iha aktu krime kolui hodi hariku aan hamutuk.

Iha pontus numeru tolu nolu resin hitu husi dokumentu segredu Prokuradoria Jeral da Republika ne’ebe Jornal ne’e suu sai hateten katak ema ne’e halakon osan estadu ninian ho total US$19,569.

Iha parte seluk jornal ne’e mos konsege asesu ba dokumentus kontratu ne’ebe asina husi Vice Ministra no Ministra Negosiu Estranjeiru iha II Givernu Konstitusional, DRA. Adalgisa Magno iha loron 26/10/2006 hodi emprega DRA. Ana M. de jesus M. Valerio ba segundu sekretaria ba Misaun permanente TL iha Nova Yorke. Dokumentus ne’ebe prepara husi DR. Joao F. do Camara iha loron ida antes dekreta klaru no momos hodi hateten katak lala’ok emprega Sra. Ana Maria ne’e tuir instrusaun mai husi excelencia Preimeiru Ministru DR. Jose Ramos Horta iha segundu Governu konstitusional ninian ne’ebe hato’o liu husi DR. Nelson dos Santos hanesan eis sekretariu jeral ba Ministeriu Negosiu estranjeiru.

Tuir CPV ne’ebe asina husi vice Ministra dos negosiu estranjeiru DRA. Adalgisa Magno iha 10/11/2011 ho numeru CPV FCF#: 704422 no FCF#:704423  dekreta orsamentu ba selu Housing Allowance kada fulan ba DRA. Ana Maria de Jesus Valeiro kiik liu hodi moris iha Nova Yorke kompara ho embaxadora Timor Leste ba mozambike ninian.




"ha'u la hatene oin sa maka imi bele trata imi nia ema ho osan ida hanesan ne'e hodi reprezenta imi nia estadu iha Nova yorke sa tan hela iha Manhattan ne'e kala selu kuartu ida kada fulan mos la to'o," dehan reprezentante estranjeiru ida iha Dili ne'ebe husu jornal ne'e labele publika ninia naran.

Kestaun dignidade nasaun no povu ida ne'e ninia tau hela iha jogu ho kazu DRA. Ana no kestaun justica tau iha kauza wainhira DR. Zacarias ne'ebe hatutan de'it bu'at ne'ebe estabelese ona kona alegasaun,  wainhira hahu nain prosesu sira la kona kazu ruma.
Tabela hatudu katak orsamentu Housing Allowance ba DRA. Ana kada ho total US$1,779 ba fulan 12 ne’ebe kalkula hamutuk US$21,348 maibe akuzasaun husi Provedoria dos direitus Humanus no Justica besik US$ rihun tolu.

“se karik loos katak eis vice Ministra Negosiu Estranjeiru asina duni kontratu ne’eba maka la tama iha lista akuzadus enatun duvidas ho sistema justica Timor Leste ninian liu-liu integridade PGR ninian,” dehan Abrao N. S. Antonino da costa, estudante husi Universidade nasional Timor Leste iha kampus besik Parlamentu nia oin.

Estudante ne’e dehan, “Ha’u kuriozu atu hatene tan ba sa maka Prokuradoria Jeral da Republika la akuza mos ema ne’ebe asina kontratu no CPV maibe persege de’it DR. Jose Luis Guterres.

Abrao fakar sai ninia deskonfia asaun kontra DR. Jose Luis Guterres ne’e halai liu ba asuntus politiku duke justice loloos.
“Ne’e drama ida ne’ebe halai liu ba politika odiu no vingasa malu iha Fretilin ninia laran tan ba hanesan tuir notisia dehan Fretilin maka halo keixa kontra DR. Jose Luis Guterres entaun it abele dehan iha kongresu Fretilin ninian iha Maiu 2006, DR. Jose Luis ho Fretilin mudansa maka hahu harahun Fretilin antes sira nia governasaun nakadoko hodi to’o lakon boot iha elisaun 2007,” Abrao hato’o ninia deskonfiansa ba Prokuradora Jeral da Republika.

Estudante ne’e hateten katak akuzaun kontra DR. Jose Luis Guterres ne’e hanesan presedente ida kee bele hasa’e ou hamenus konfiansa publiku ba justice iha nasaun ne’e.
“Ita bele sadik kapasidade Prokuradoria Jeral da Republika ho kazu ida ne’e sai hanesan barometru atu hametin konfiansa publiku ba justice nasaun ninian. Se karik DR. Jose Luis Guterres la hetaan sala entaun diak liu ita nia prokurador sira estuda haree ba estuda tan lai,” sadik estudante semester lima ne’e.



Nia kestiona razaun la iha alegasaun kontra Prezidenti da republika hanesan Xefe ba Segundo Governu konstitusional ne’ebe foo instrusaun hodi nomeia DRA Ana ba Segundo sekretaria iha misaun Permanente iha Nova Yorke no Eis vice Ministra no Ministra estranjeira ne’ebe aprova proposta husi DR. Jose Ramos Horta ne’ebe hakerek iha surat kontratu ba DRA. Ana maka prepara husi DR. Joao F. do Camara iha loron 05/10/2006.

Hafoin de julgamentu, DR. Jose Luis guterres ne'ebe akompania husi ninia defensor DR. Sergio Hornai ho fiar aan dehan nia la halo sala neim bu'at ruma maibe nia iha determinasaun atu hahi justica hodi marka prezenca iha tribunal tuir data ne'e marka ona ba  sesaun julgamentu tuir mai sei hala'o fali iha loron 11-14/04/2011. DR. Guterres mos husu atu iha tempu oportunu Parlamentu Nasional bele tuur hodi kasu ninia imunidade tan ba tribunal rasik dehan labele julga membbru do governu ida.  

Iha parte seluk wainhira husu komentar husi emprezariu nasional rui castro dehan nia la fiar DR. Jose luis Guterres funu tinan rua nolu resin haat hodi nauk fali povu nia osan US$1779 kada fulan durante tinan ida.

“ita husik justice la’o. kala DRA. Ana Pessoa iha ona evidensia ruma maka kazu ne’e lori on aba tribunal maibe ha’u maka la fiar 100% DR. Jose Luis Guterres atu hariku aan ho seritu Tujuh Ratus fulan ida. Ne’e dala ida tan ita delek ona,” dehan Rui Castro. (TS).

TNI ‘Invade’ tan Naktuka, Fasilidade Estadu TL Lori Todan

Tuesday, 1 March 2011


Tempo Semanal-Oekuse, 02.03.2011


Timor Leste ninia enklave Oekuse ne'ebe isoladu husi rai bo'ot nasaun ninian sempre sai vitima ba forsa TNI ninian iha rai ketan. Akontesimentu sira ne'e la'os dala ida maibe beibeik ona no Jakarta ho Dili mos hatene atetude sira ne'e.

Membru Tentara Nasional Indonesia (TNI) pelotaun ida hamutuk ema nain17 iha loron kinta feira 24/02 dadersan tuku 9 tama illegalmente iha area Naktuka Aldeia Manan, Suco Bene Ufe  Sub-Distritu Nitibe Distritu Oecusse konsege estraga fasilidade estadu nian hanesan Armagen Ministerio Agricultura Floresta no Peskas (MAFP) iha fronteira Naktuka.

Komandante UPF distritu Oecusse, Arlindo Cofitalan ba TS iha nia servisu fatin Aldeia Sanane Suku Costa Sub-Distritu pantema-Kasar Tersa Feira (01/03) dehan membru  TNI sira ne’e tama iha fronteira Naktuka nunka halo koordenasaun ho elementus UPF atu halao siguransa konzuta, maibe derepenti de’it sira tama no estraga sasan iha armagen MAFP.

TNI sira tama mai iha area naktuka ho armas funu nian kompletu no konsege estraga fasilidade armagen MAFP.

Fasilidade Governu TL ninian ne’ebe estragus maka hanesan Janeila iha sala enkontru, plafon iha uma laran, ventuiña, baku rahun sanyo, no katana ida lakon, pasta husi extensionista sira nian, no han hotu hudi tasak ramun ida no soe nia kulit iha armagen laran halo foer sala enkontru.

Relasiona ho problema ida nee, iha loron Segunda feira (28/02) UPF hamutuk ho komandante military UN nian iha Oecusse, ba hasoru malu ho Komandante TNI iha fronteira Oepoli hodi konfirma, tamba razaun TNI sira tama iha area naktuka nunka halo koordenasaun ho membru UPF.

Komendante UPF ne’e la sastesfas ho atetudi membru TNI estraga propriedade estadu RDTL nian.

Iha fatin la hanesan director MAFP distritu Oecusse, Jose Oki rekuinese membru TNI sira tama ilegalmente no konsege halo estragus ba sasan MAFP nian. Membru TNI sira tama iha area Naktuka konsege simu obrigatorio sabi odamatan portaun boot no tama direitamente iha area Armegen hodi halo estragus.

Informasaun hirak nee hau simu husi extensionista MAFP Naktuka Sisto Neno ho komandante polisia fronteira Naktuka. Akontesimentu ida nee halo nia parte senti triste tebes, nee duni ejiji ba governu liu husi Ministerio Negosio Estranjeiru RDTL nian atu lalais resolve problema ida nee para povu iha fronteira Naktuka bele servisu ho hakmatek.

Entertantu membru Parlamentu Nasional husi bankada Fretilin, Arsenio Paixão Bano informa katak problema Naktuka desde tinan kotuk mosu membru parlamentu nasional husi bankada maioria ho oposisaun sempre levanta problema ida nee maibe nai ulun sira husi governu, liu-liu Ministerio Negosio Estranjeiru, la iha seriedade politika ida nebe diak maka situasaun Naktuka sei sai hanesan nee ate agora.

Negosiasaun nebe ita halo ho governu Indonesia sempre faila, ministerio negosio estranjeiru ho governu la konsege resolve problema Naktuka. Hau atu informa tan katak, Naktuka la’os rai sengketa, rai neba ita nian, nee duni tuir los governu tenki iha interese boot ba problema neba.

Provokasaun husi TNI iha Oekuse akontese fila-fila ona no iha tinan 2010 hafoin TNI sira tama iha fatin hanesan Governu haruka sekretariu do Estadu de Defeza ho Brigaderu Jeneral Lere halo vizita ba fatin refere hodi haree ho matan besik liu incidenti sira ne’e. (TS).

SERA KE SURAT PM NINIAN SEI VALE NAFATIN HAFOIN TRIBUNAL KANSELA AUDIENCIA?

Wednesday, 2 March 2011


Tempo Semanal-Dili, 02.03.2011

Hanesan noticia ne'ebe hodiseik tempo semanal publika tuir maluk sani nain sira sei sani rasik surat ne'ebe PM Xanana haruka ba Presidenti da Republika hodi informa kona ba nomeiasaun DRA. Emilia Pires ba substuisaun temporia hodi haree atividades governasaun wainhira Xefe do Estadu sei hala'o hela vizita do estadu iha estranjeiru ate loron 11/03/2011.


Besik tuku sanolu dader otl tribunal distrital dili halo julgamentu primeiru ba membru IV Governu konstitusional iha governasaun Xanana ninian. Iha audensia ne'eba tribunal deside kansella julgamentu tan razaun rua hanesan ida tribunal rasik seidauk notifika Senhora ida ne'ebe hanesan mos arguida ba kazu alegasaun hariku aan hamutuk ho DR.Jose Luis Guterres hanesan atual vice primeiru Ministru no DR. Joao Freitas do Camara eis prisioneiru politiku kleur iha tempu okupasaun Indonesia maka daudaun ne'e embaixador TL ba Thailandia. 

Razaun segundu tan ba DR. Jose Luis Guterres sei goza nafatin ninia imunidade tan ba to'o oras julgamentu hahu Parlamentu Nasional seidauk kasu husi nia todan refere nune'e Tribunal rasik deklara lakohi viola lei hodi halo julgamentu ba membru do Governu ida ne'ebe sei iha imunidade.

Sera ke surat Preimeiru Ministru ninian ne'e sei ativa ka dada fali ona ho kanselamentu julgamentu ohin dader ne'e ita hein deit.


Iha parte seluk mosu opinaiun pro ho kontra ba kazu ne'e. Komunidade balun hahu hahi esforsu Prokuradora Jeral da Republika ne'ebe lidera husi DRA. Ana Pessoa maibe balun hahu deskonfia no sadik ministeiru publiku ninia kapasidade hodi prova naksalak ba ema hirak ne'ebe sira hatada kazu ne'e. Balun kestiona tan ba sa maka la haree uluk kazu boot sira seluk ne'ebe akontese iha Primieru Governu ate IV Governu maibe buka kaer uluk maka Vice Primeiru Ministru DR. Jose Luis Guterres.
Membru parlamentu Nasional iha loron 16/02/2011 sadik mos Prokuradora Jeral da Republika atu rezigna aan tan ba la iha imparsialidade. Bankada Opozisaun ho bankada Governu ninian iha momentu ne'eba atu baku malu sala-sala iha plenaria parlamentu nasional tan ba lia fuan trata hasoru eis Deputada Fretilin ninian ne'ebe hili ba kadeira Prokuradora Jeral da Republika. (TS).