TS: Nasionalismu Foun ba Dezenvolvimentu Nasaun

Thursday, 15 September 2011

Edisaun 2

By Geraldo Ximenes

Nasionalismu sai ona prinsipiu forte ida ba Timor Oan sira atu funu durante besik tinan 500 nia laran hasoru nasaun kolonialista boot rua, ne'ebe, forte no influensa politika maka'as iha kontextu global no regional. Prinsipiu Nasionalismu ne'ebe tuir definisaun Cambridge dictionary katak “Nationalism makes one think that the people belonging to one’s own country should be considered one’s equal”, halibur ona Timor Oan sira no hamosu sira nia sentimentu katak,  sira ida deit no sira mak Timor Leste nia nain, fo forsa, espiritu, no energia ba Timor Oan sira hodi suksesu lori Timor Leste sai husi kolonialismu ba nasaun independente iha tinan 1999.

Maibe depois de sai husi kolonialismu, tinan la'o ba oin sentimentu nasionalismu ne'e hahu lakon neneik husi ema ida-idak nian neon. Ema ida-idak mosu ho hanoin, konseitu no interese oi-oin no harahun nasionalismu ba idealismu. Idealismu oi-oin ne'ebe mak mosu halo Timor Oan barak sai pragmatismu, fahe sira ida-idak tuir sira nia interese. Sira ne'ebe mak matenek ba politik harii partidu politik, sira ne'ebe mak matenek iha negosiu harii impreja, sira ne'ebe mak hakarak atu halo presaun harii sociadade sivil, sira ne'ebe mak matenek iha arte sai artista no sira ne'ebe mak matenek iha leba ai, sai ai leba hodi defende interese no idealismu sira ida-idak nian. Dalaruma ida ne'e mak ema bolu dehan katak konsequensia lojika husi Demokrasia. 

Hare ba dezemvolvimentu sosio-ekonomiku no dinamika politika kontemporer iha Timor Leste katak husi governu sira uluk to'o aktual halo ona buat balu ba nasaun foun ne'e, maibe seidauk responde lolos ba Povu nia ezijensia. Povu sei hakilar nafatin kona ba electricidade, bee mos, Estrada, necesidade basiko nia folin no problema sosial boot liu hanesan korupsaun ho seluk-seluk tan.

Electrisidade ne'ebe mak lakan mate iha Dili laran halo Povu hakilar katak sira nia sasan elektroniku estragado. Sira ne'ebe mak senti sira nia sasan barak mak at tamba energia electrisidade ne'ebe tun sa'e loro-loron, dalaruma la kontrola aan. To'o balun muda fali akronimu AMP (Aliansa Mayoria Parlamentar) ne'e sai fali "Ajanu Mate Permanenti" ou "Ajanu Moris Permanenti". Bainhira ahi mate derepente sira hakilar, "Ajanu Mate Permanente" no bainhira ahi moris fila fali sira hakilar "Ajanu Moris Permanenti" (Buletin husi Eskola St. Jose, Balide Dili).  

Bee mos ne'ebe mak Povu persija tebes atu halao moris loro-loron sai preoukupasaun boot. Iha area balu hanesan Becora, Bedois, Manleuana inklui mos area Delta dalaruma povu la hetan bee. Saida mak Povu halo, sira fura kanu tun fura sae, tesi kanu tun, tesi kanu sae mas susar nafatin atu hetan bee. Para atu tein deit ou prepara aihan mos susar tebes. Projeitu barak sai husi governu no sai mos husi agensia internasinais ba rehabilitasaun bee matan maibe la husik hela resultadu diak. Bee matan hamrik duni maibe bee mak nungka suli sai husi nia matan ne'e mai, hanesan projeitu pakote referendum iha Oecusse (TVTL).

Estrada ne'ebe mak sai meios importante ba Povu atu halo movimentu miserable tebes. Povu iha area rurais sempre hakilar katak sira iha produtu atu ba fa'an maibe deifisil tebes ba sira atu hetan asesu tamba Estrada la to'o ba sira nia area ou estrada kotu. Lalika to'o iha ne'eba, estrada iha Dili laran ne'ebe mak nu'udar kapital no portal boot ba visitante internasionais sira mos sei iha kondisaun ne'ebe mak aat. Projeitu barak hahu husi pakote referendum to'o PDD governu fo ba imprejariu sira para hadia estrada sira ne'e maibe durasaun la kleur, fulan ida rua deit estrada sira ne'e kuak fali ona. Hanesan estrada Aitrak Laran no Bairo Pite (Malae sira bolu Banana Road). Dalaruma ida ne'e maka ema bolu naran PROJEITU.

Necesidade basiku liu-liu fos ne'ebe sirkula iha Timor Leste nia laran tomak folin a´as tebes. Povu ki´ik no mukit sira hakilar bebeik katak folin fos ne'e as liu sira nia forsa atu sosa. Ministru MTCI hateten iha TVTL katak folin $ 12 maibe iha tereno fos nia folin $ 18-$ 25. Ida ne'e hatudu momos ona katak laiha korelasaun entre dezisaun politika governu ho nia implementasaun. MTCI buka dalan oinsa para atu kontrola hanesan servisu hamutuk ho Chefi Sucos distribui fos maibe la salva. MTCI husu atu Igreja involve hodi distribui fos maibe Igreja hili atu konsentra aan liu ba misaun Igreja nian. Dalan sira ne'ebe mak MTCI foti la lori solusaun ba problema to'o ikus MTCI nonok tiha no Povu hakilar nafatin! (TVTL).

Problema sosial ne'ebe mak dada atensaun barak liu husi Povu kiik sira mak problema korupsaun. Hahu husi premeiru governu konstitusional problema sosial ida ne'e sai ona preoukupasaun ema hotu nian. Ikus-ikus ne'e problema sosial ne'e nakonu iha meida massa, seminar, konferensia pers, talk show tun to'o ba gosip iha estrada ninin sira ne'e mos ko'alia kona ba ida ne'e (ToR Diskusi DIALECTICA).

Fenomena ida refleta ba termus oi-oin. Uluk mosu termus uang rokok, uang pelicin. Agora transforma fali ba termus UANG PULSA. Transformasun ida ne'e dalaruma tamba agora iha Timor Leste buat barak mak uja pulsa husi mobile phone to'o prepago electrisidade nian. Ne'ebe, ema sempre persija UANG PULSA barak.

Esforsu barak governu halo atu hamenus fenomena ida ne'e, hanesan hari Provedoria dos Direitos Humanu e Justica (PDHJ) no iha tinan hirak liu ba ne'e harii tan komisaun ida para tau atensaun los ba korupsaun, Comisaun Anti Corupsaun (CAC). Servisu barak ona PDHJ ho CAC halo maibe seidauk bele muda povu nia perspektiva. Povu seidauk hare no senti katak sira suksesu ona iha sira nia servisu. Povu sei senti institusaun ho comisaun ne'e sai hanesan Liaun ne'ebe maka ema hakiak, foo han to'o iha nihan nebe mak kroat maibe la tata. La hatene tamba sa mak sai nune'e? Dalaruma nain mak la hanorin nia atu siak hodi tata ema, tamba dalaruma siak demais bele mos tata fali nain sira ne'ebe mak hakiak Liaun ne'e.

Fenomena-fenomena sira ne'ebe mak akontese iha rai laran dada tebes atensaun ema hotu nia husi nasional to internasional. Iha kontextu nasional povu barak mak komesa senti ona impaktu destruktivu husi hahalok sira ne'e. No sentimentu ida ne'e loron ba loron haluan husi ibun ba tilun no konstrui ona opinion publiku ida katak ”naionalismu Timor Oan nian lakon ona. Timor Oan agora buka mak Dollar to'o haluhan aan”. Iha fali kontextu internasional quase relatoriu sira ne'ebe mak produz mayoria hateten katak Timor Leste nasaun ne'ebe mak numeru korupsaun aas tebes iha mundu.

Hare katak estadu hasai orsamentu ne'ebe mak boot tebes ba dezemvolve nasaun maibe laiha buat barak mak muda ba oin, Permeiru Ministru atual, iha okasiaun balun hateten iha media katak “Ministrus barak matan musan naklosu ba osan deit”, “sekretario estadus ho direitores sira keta hare liu ba projeitu”, “persija investiga ministrus ho sekretaris estadus sira nia riku soin” no seluk-seluk tan. Buat sira ne'e hotu nu'udar naha ida todan tebes iha Permeiro Ministru nia kabas. Naha ne kala todan liu ona nia forsa atu leba, iha okasiaun balun fali Permeiru ministru fanu Timor Oan tomak ho nia apelu ”Timor Leste persija nasionalismu foun”.

Interesante tebes bainhira primeiru ministru fo sai lia fuan sira ne'e ho apelu ida ne'e iha media. Nudar reasaun iha interpretasaun politika bara-barak mak mosu. Balun hateten dehan tarde ona hasai lia fuan no apelu hanesan ne'e, sira seluk dehan persija nasionalismu foun ba manan votu iha elisaun geral 2012. Maibe ida ne'e la'os interpretasaun ne'ebe mak hakerek nain atu foo lolos.

Tuir interpretasaun hakerek nain nian,  Nasionalismu Foun nebe mak Permeiru Ministru foo sai ba Timor Oan sira katak, nasionalismu ne'ebe mak rona no responde ba povu nia nesecidade, nasionalismu ne'ebe foti interese publiku aas liu interese grupu ka individu, nasioalismu nebe mak respeita ema seluk nia direitu, nasionalismu atu hado´ok aan husi hahalok ne'ebe mak halo povu terus, nasionalismu exekuta orsamentu jeral ho didiak, nasioalismu atu halo projeitu ho kualidade ne'ebe mak diak, nasionalismu atu hado´ok aan husi hahalok KKN, nasinalismu atu prepara kondisaun infrastruktura ne'ebe mak diak atu fasilita povu, nasionalismu atu liberta povu husi kiak no mukit. Ikus liu mak nasionalismu atu maintein seguransa no estabildade. Seguransa no estabilidade nu'udar komponenti prominental ba dezemvolvimentu sosio-ekonomiku no politika. Se laiha seguransa sei laiha establidade, se laiha esbalidade sei laiha mos dezemvolvimentu sosio-ekonomiku no politiku. Komponenti rua ne'e sai kompenenti xave. Se Timor Leste hakarak suksesu mantein komponenti rua ne'e. Timor Leste sei neneik maibe los atu atinji slogan nasional ne'ebe mak konesidu iha mundu internasional katak ”Adeus Konflitu, Bemvindu Dezemvolvimentu”.  

Pergunta tuir mai halao nusa mak bele hamosu nasionalismu foun ne'e iha ema Timor Oan sira? Klaru la'os fasil atu harii  fali nasionalismu ne'ebe mak rahun ona, satan moris era ne'ebe mak pragmatismu. Pragmatismu ne'ebe mak haburas kultura individual no harahun kultura koletivu ne'ebe mak durante ne'e Timor Oan sira pratika iha sira nia moris lor-loron. Maski nune'e hakerek nain iha esperansa ne'ebe mak dalaruma sai ona segredu publiku katak Timor Oan tomak hadomi rai Timor Leste liu sasan hotu-hotu. Esperansa ida ne'e sei dada no dudu Timor Oan tomak hodi halo reflesaun, husu ba sira ida-idak nian aan, tamba sa mak vizavo sira funu to'o mate hodi duni malae? Tamba sa mak avo sira mos mate ba funu ne'ebe mak hanesan? Tamba sa mak aman, maun, alin feton sira se hirus matan ba forsa Indonesia nia kilat to'o hetan susar hodi hetan ukun aan? Tamba sa mak hotu-hotu hakarak ukun rasik aan? No ikus liu mak ida-idak husu ba sira nia aan, saida mak hau hanesan jerasaun foun tenki halo hodi valorija heroi sira ne'ebe ran fakar ba rai ida ne'e?

Ho perguntas reflesaun sira ne'e, fiar katak sei fanu Timor Oan sira nia konsiensa hodi sai Timor Oan ne'ebe mak hadomi rai Timor Leste no iha hanoin diak ba liberta povu iha rai doben ida ne'e. Ida ne'e mos sei loke mos Timor Oan sira ne'ebe mak buka matenek iha ema nia rain, nia hanoin katak matenek ne'ebe mak sira hetan atu haluan sira nia horizonte hanoin no halo sira sai ema ne'ebe mak ho perspektiva internasional maibe ho karakter Timor Oan nafatin.

Sai husi faktores internal ne'e, iha faktores external ne'ebe mak persija ema tau konsiderasaun boot atu hamosu sentimentu nasionalismu iha kada Timor Oan. Ida mak edukasaun iha familia nia laran. Inan ho Aman sira iha obrigasaun atu konta historia ba oan sira tuir los lalaok historia ne'e nian. Halo nusa mak Timor Oan sira sofre hodi manaan ukun rasik aan.

Ida seluk mak partidu politiku. Hanesan ita hotu hatene katak partidu politiku nu'udar forsa politiku ida ne'ebe mak iha potensia atu kaer governu. Governu mak sei sai volante hodi lori povo nia moris ba oin. Partidu politiku sira tengki tau vizaun ho misaun ne'ebe mak diak ba moris aban bain rua. Vizaun ho misaun partidu nian labele hela deit ho sira maibe tengki fahe ba ema seluk liu husi aplika funsaun partidu politiku nian, rekruta, eduka no kaderiza.

Ho nune Timor Oan tomak bele iha esperansa katak loron ida Timor Leste sei iha jerasaun foun ne'ebe mak nakonu ho sentimento nasionalismu, hadomi Timor Leste no iha hanoin no vontade diak atu lori nasaun ba oin ho povu nebe mak moris diak. Sei hamosu jerasun ne'ebe mak sai manan nain la'os lakon nain. Hanesan Nelson Mandela iha 1990 an hateten katak, “sometimes it falls upon generation to be great. You can be that great generation”. Atu nune'e sei laiha predikadu „Kekalahan Ideologi Manusia Timor Leste„ ba Timor Oan tomak liu-liu ba jerasaun tuir mai.

Historia hatudu ona mai ita hotu katak, nasionalismu sai ona prinsipiu basiku ba funu husi jerasaun ba jerasaun atu hetan ukun rasik aan. Timor Leste tenki iha no hamosu jerasaun ne'ebe mak nakonu ho nasionalismu libertasaun nu'udar base atu hamosu nasionalismu foun. Husi hakerek ne'e, hakerek nain dada konklusaun, katak Timor Oan sira tengki iha nasionalismu ne'ebe mak forti liu nasionalismu liberta nasaun atu desenvolve no lori Povu sofre ida ne'e sai husi kiak no mukit. Se laiha nasionalismu ne'ebe forti, Timor Leste so bele sai deit fatin ba ema ne'ebe laiha nasionalismu no buka riku atu riku ba nafatin no hanehan ema ne'ebe mak kiak sei sai kiak rabat rai. No bain hira Timor Leste monu iha ema sira ne'ebe mak menus ba nasionalismu nia liman laran, loron ida Timor Leste sei hetan predikado “Timor Leste hanesan Kursi Malas ne'ebe mak nakdoko barak maibe nungka hakat ba oin ou muda ba kotuk“.

Obrigado wain.

Geraldo Ximenes, email : asukai3brothers@gmail.com)

OJETIL CONSIDERA SAI HOSI FRETILIN

Radio Liberdade Online

Jornalista: João Inocêncio Pires

Dili - OJETIL ka organizasaun Juventude Clandestina ida nebé uluk servisu makaas ba ukun an no durante ne integra an ba Partidu Fretilin, konsidera hela atu dada-an hosi Partidu refere tanba deit falta de konsiderasaun Sekretario Geral Mari Alkatiri nian ba Lider Ojectil, Gregorio Saldanha.

Tuir informasaun nebe jornalista radio liberdade hetan, iha kongresu Fretilin foin dadaun iha Dili Convention Center (DCC), Komisaun Nasional Organisadora Kongresu (KNPO) Fretilin ba dala tolu, la konsidera Gregorio Saldanha, kordenador Fretilin distrito Dili hanesan “delegado” maibe fo deit kartaun “observador”.

Kestau ne laos deit ironia bot ida tanba la konsidera kuadru eleitu no kordenador partidu Fretilin Distritu Dili nian rasik atu tur nudar kandidatu iha Kongresu Nasional partidu nian, maibe hatudu momos diskriminasaun no polítika diskriminasaun bot ba Gregorio Saldanha, tanba deit nia laos “anak emas” Mari Alkatiri nian.

Nudar ita hatene, iha kongresu Distrital Partidu Fretilin Dili nian iha tinan hirak liu ba, Gregorio Saldanha, eis-Aktivista 12 Novembro, lider OJETIL no eis-prisioneiro Cipinang, konsege manaan tiha “anak emas” Mari nian nebe naran Arsenio Bano, ba kompetisaun atu sai kordenador distritu Dili nian. Eventu ne, hamoe Mari Alkatiri, no Alkatiri rasik durante tempo hirak ne, nunka involve Gergorio Saldanha, mesmo ke Partidu Fretilin halo konsolidasaun iha area Distritu Dili rasik.

Diresaun Nasional sempre tun mesak no nunka konsidera Gregorio Saldanha, no la involve nia iha konsolidasaun partidu nian, mesmo ke halo rasik iha distrito Dili. Bainhira Arsenio Bano ba konsolida iha Fatuhada fulan rua liu ba, nia la involve kordenador partidu distritu Dili Gregorio Saldanha no lider OJETIL sira seluk. So bainhira Lu-Olo ba konsolida partidu iha Atauro mak foin konvida Gergorio Saldanha hodi partisipa iha eventu ne.

Nudar observador, Gregorio laiha direito atu partisipa nudar "delegadu" iha kongresu, no laiha direito aktivo, "memilih dan dipilih". Bainhira ba to iha kongresu laran, maski Gregorio tenta protesta, Mari Alkatiri rasik la fo dalan ba Gregorio atu sai delegado.

Tanba xatiado ho tratamentu ne, Gregorio Saldanha hosik tiha Kongresu iha segundu Dia, no fila ba uma. Akontesimentu ida ne, ema rihun rahun mak hare iha TVTL, no halo membru barak iha kongresu mak kestiona. Tanba hetan pressaun makaas, Mari Alkatiri, bainhira koalia iha terceiru dia kongresu Fretilin nian nebe halo transmisaun direkta, bolu deit Gregorio hosi TVTL nune “kamarada Gregorio Saldanha keta akompanha hela hosi TVTL, hare mai ona kongressu ne”.

Gestu ne, tuir membrus OJETIL barak la konsidera sira nia lider no asswain Timor nian ne, maibe sai nudar traisaun no falta de konsiderasaun ba Gregorio Saldanha no membro ka organizasaun OJETIL tomak.

Tanba ne barak mak agora disorientadu no husu ona demisaun hosi Fretilin, no mossu ona rumores katak OJETIL nudar organizasaun sei hare fali sira nia pozisaun nudar “underbow” Fretilin nian. Tuir informasaun nebe jornalista ne hetan, membru barak mak deside ona sei la vota ba Fretilin iha eleisaun geral iha 2012. Jos

Que apreciam essa liberdade e que está enganando os pobres?

14 September 2011

 

By Tama Laka AQUITA

Um pecado político "Marie Alktiri" que não pode ser perdoado, é um produto legal que assegurem melhor a suas próprias vidas do que as vidas de muitos que ainda são pobres. "Decreto lei Pensao Vitalisi  feita e assinada pelo ex-primeiro-ministro Estanislau Aleixo da Silva e Maria Madalena Brites Boavida como ministra do Planu e das finanças, em fevereiro de 2007. (Leia: Decreto lei Pensao Vitalisia)

Besik  tinan sanulu ita hakuto a’an  hosi  kolonialismo iha ita nian rain, besik tinan  sanulu ona mak ita  restaura ukun rasik  a’an  iha 20 de Maio 2002.  Povu  Timor-Leste tomak ho esperanca bo’ot  atu  hetan  moris diak, iha vida moris loron-loron nian iha ukun rasik a’an ida ne’e, tuir  dalan nebe’e saudoso, heroi sira mehi ba povu ida ne’e, maibe tinan sanulu ona mak povu hein ho esperanca bo’ot oinsa atu hadia moris, tuir dalan moris nebe sira iha, liu-liu iha sector hotu liu-liu sector nebe sai hanesan “asset mati” ba  agricultores sira; Rai, Natar ho To’os.

Ita nian rain iha rikeza oi-oin; mina ho gas nebe potensia bo’ot teb-tebes atu desenvolve povu nian moris, alen de ita iha mina ho gas ita mos iha café, ai-kameli, Nu’u, kamii ai-oan mutin, batar, ai-farina, manganese, marmer ho potensia sira nebe mak bele fo benefisio direitamente ba povu. Ho potensia riku soin nebe mak Rai Timor iha, povu precisa lideranca politico ida nebe ho laran luak hakarak hanorin povu atu hatene saida deit kona ba, saida mak politika; Politika kona ba  ekonomia nian, politika kona ba saude nian, politik kona ba edukasaun nian liu-liu kona ba politika agricula i oinsa atu desenvolve ekonomia povu nian nebe povu hetan benifisio diretamente hosi area ida ne’e.  

Ukun rasik a’a  nebe povu nebe iha rai ida ne’e  sacrificka sira nian moris tomak, ukun rasik a’an  nebe, povu moris hamutuk ho assuwain FALINTIL no povu  nebe  fo’o nia contribuisaun itoan ka barak  to’o hetan indenpendesia liu hosi dalan “Referendum  99”. Ikus  mai, ukun rasik a’an ne’e  sai  hanesan mehi ida nebe sai realidade, maibe mehi ne’e  mehi  mamok, tan deit luta nain sira nebe mai hosi liur ho titlu  DR, no Engr. halo  uluk lei  nebe’e bele  fo’o  garante  ba  sira nian moris do que povu. Povu lahatene nia moris ne’e atu sai oinsa los.

Tamba sa mak ita hateten povu lahatene sira nian moris ne’e atu sai oinsa? Tamba  lideranca politik  Partido FRETILIN  DR. MARIE ALKTIRI  nudar Eis-Premeiro Ministro wainhira resigna a’an tiha apresenta Lei Pensaun Vitalisi nebe nia copy hosi Lei pensaun vitilis Mozambique nian, introduz  lei ne’e ba Parlemento Nacional liu hosi Eis-Premeiro Ministro Estanislau Aleixo da Silva hodi halo lei ne’e hodi  garante uluk sira nian moris no family nian moris duke povu  ki’ik no kiak  sira nian moris. Ikus mai se mak sai vitima ba produto lei sira nebe maka sira introduz, no lei sira nebe mak sira  aprova?  Povu. Povu ida nebe  trabalhadores, povu ida nebe agricultores, povu ida nebe moris  ki’ak no kbi’it laiha tamba injustisa social  sira ne’e. Se mak sala ba decisaun politik nebe mai hosi ita ida-idak nia votos? Ita,  ita rasik,  ita nebe mak fo votos ba partido politik  ho lideranca sira nebe mai to’o iha ita nian Distrito, Sub-Distrito, Suco no Aldeia, lideranca partido politik sira nebe Ita rasik hili, maibe Ita la konyece. Lideranca partido politik sira nebe tinan lima-lima mak mosu mai ita nia oin ho promessa oin-oin ho osan no sasan oin-oin hodi manan ita nian votos iha tempo atu tama  eleisaun geral,  osan mean nebe ita iha, mak ita votos. Votos  osan mean nebe Ita fo’o iha Eleisaun Geral hodi sira ba ukun rai ida ne’e.

Eleisaun Geral  dala rua ona mak ita hili no fiar ba sira. Eleisaun geral  dala rua ona mak ita fo’o ita nia votos osan mean ba lideranca partido politico sira, votos nebe ita fo’o sem fo’o fila nia valor tomak, tuir ita povu nian hakarak. Maibe tamba ita beik no lahatene  lei tan ne’e ita nian votos osan mean nebe’e ita fo’o sai folin laek. 

Wainhira Primeiro Governu Partido FRETILIN nebe Lidera hosi DR. MARIE ALKTIRI halo lei sira ne’e mosu, iha  ita nian oan sira nebe uluk hakilar lori ita nian lian katak; “Lei Pensaun Vitalisia, lei moe laiha”,  sira mos la consegue atu trava. La consegue trava tamba la,os sira lahatene ka laiha konyecimento ba lei sira ne’e, maibe tamba sira hatene katak sira iha ona poder agora atu oinsa atu defende no oinsa bele hametin liu tan. Saida mak acontece iha povu nian oin sai oin seluk, iha parte ida hateten; sei halo alterasaun ou halo revisaun ba Lei Pensaun Vitalisia maibe iha parte seluk husi kotuk assina no aprova tiha lei ne’e.

To’o ohin loron atu tama tinan lima ona, to’o ohin loron atu tama eleisaun geral  2012 ona, maibe to’o ohin loron laiha deputado ida  mak barani husu halo revisaun ba lei nebe’e halo povu sai vitima. Deputado  sira  sempre  hateten katak; “ ami mak representa  povu” mas labele halo alterasaun ka  revizaun ba lei nebe mak garante liu lideranca politika sira nia moris depois de tinan lima. To’o ohin loron ita povu ki’ik no kiak lahatene buat hotu kona ba lei ne’e.

Se eis titular iha direito tuir lei nebe sira aprova, povu trabalhadores no camponeses iha liu direito ba “seguro da vida” ka “benifisio” hosi estado tamba sira mak autor desenvolvimento. Benifisio ka subsidiu la’os hetan deit hosi programa desenvolvimento governu nian nebe la’o dadaun ka atu hala’o tuir. Maibe tenki iha benefisio ida nebe direitamente ba familia ida-idak atu nune bele iha esperanca katak estado garante future povu nian oan sira aban bain rua.

Oinsa Lei Pensaun Vitalisia nia lala’ok garante Eis-titular Primeiro Ministro no nia Eis-Titular Ministro sira nia moris iha loron ikus, wainhira sira la tur hanesan primeiro ministro ou ministro ona, ka la tur hanesan secretario estado, ka la tur hanesan Deputado ona.

“Tuir mai hakerek nain hakarak hosik hela ba povu tomak atu hatene oinsa ho Lei Pensaun Vitalisia nebe aprova iha Governu Partido FRETILIN, Governu se deit mak ukun Rai ida ne’e tenki hasai despesa osan ba Ex-Primeiro Ministro DR. MARIE ALKTIRI hodi garante nia moris ho montante osan ida nebe bo’ot tebes enquantu povu sei moris kiak nafatin.

Familia husi eis-titular Primeiro Ministro bele ba rai liur (pasiar ka halo tratamento saude) Estado mak selu hotu. Hetan passaporte diplomatiku, Estado mak hasai osan atu selu ninia uso! Hela iha hotel luxu, han hemu luxu … estado mak selu. Lori ho eskoltu estado mak selu.... Hatama sasan luxu (kareta, material halo uma luxu) estado mak selu, no povu mak agoenta taxa.  Loron-loron iha uma deit, sira hetan fasilidade tomak hanesan liu-rai monarquia sira (Inglaterra, Japaun, Espanha, Dinamarka, Noruega, Suessia, nst), estado mak selu…   Regalia sira ne’e hotu, sura hamutuk tinan ida bele baku liu $US200,mil. 

Lei Pensaun Vitalisia ne’e aprova, iha tempo governo PARTIDO FRETILIN depois de krisi 2006 wainhira MARIE ALKTIRI resigna a’an, iha momento neba Premeiro Ministro ESTANILAU DA SILVA ho MADALENA BOAVIDA nudar Ministra do Planu  e das Financas mak assina. Tuir Dekreto Lei  2/2007.

Lista de pedido relatives aos Ex-Titulares dos Orgaos de Soberania

Ex-Premeiro Ministro DR. MARI’E  ALKTIRI

1.      Contrato de trabalho a termo certo com Senhor Filomeno Aleixo, para trabalhar como assessor do seu Gabinete de trabalho. Senhor Filomeno Aleixo nao e funcionario nem agente Estado, tal como a lei exige e ganha um salario de $2000 dolares/mes;

2.      Contrato de trabalho a gtermo certo com a Sra. Filomena Efi para trabalhar como empregada domestic na residencia official $150 /mes;

3.      Contrato de trabalho a termo certo com o Sr. Joao Menezes para trabalhar como responsabel de manutencao de rotina, na residencia official $170/mes;

4.      Contrato de trabalho a termo certo com o Sr. Abel Noronha para trabalhar como jardeneiro da residencia official $150/mes;

5.      Contrato de trabalho a termo certo com o Sr. Manuel dos Santos para trabalhar como o seu motorista $200/mes;

6.      Contrato de trabalho a termo certo com a Sra. Palmira de Deus para trabalhar como empregada domestic da residencia official $150/mes;

7.      Contrato de trabalho a termo certo com a Sra. Georgina da Costa para trabalhar com chefe do pessoal domestic da residencia official $170/mes;

8.      Contrato de trabalho a termo certo com o Sr. Marcelino Bana para trabalhar como seu motorista de reserve $200/mes;

9.      Contrato de rehabilitacao da residencia official $429,680.99;

10.  Contrato de compra e montagen de movies para residencia official $99,924.89;

11.  Contrato de rehabilitacao da residencia temporario $88,408.35;

12.  Contrato de arrendemento da  residencia temporario$4000/mes, tendo sofrido um aumenta para $6.600/mes depois das obras de rehabilitacao

13.  2 telemovies para o Gabinete de Trabalho

14.  Viagen do Ex-Titular  e respective delegacao ao Sudan do Sul com passage por Portugal

15.  Pedido de comprar de carro para apoio de Gabinete

16.  Pedido de senhas do Combustivel para carro do assessor $1000 dolares/mes;

17.  Pedido de pagamento de service de manutencao de viaturas-A1 service $8530,5

18.  Pedido de pagamento de service de instalacao electrica na residencia a empresa TAM ELECTRIC $9934.05

Se Marie Alkatiri hanesan fundador da RDTL ida nebe mai hosi liur ejiji nia direito liu hosi Lei Pensaun Vitalisia (LPV), povu nebe sakrifika nia moris durante okupasaun militar Indonesio iha liu direito ba subsidio ka benefisio hosi estado.

Ho esperanca bo’ot katak; povu sei hetan Benifisio diak liu fali lideranca politik sira wainhira Partido sira nebe tur iha AMP sei halakon  tiha lei ne’e maibe to’o ohin loron AMP mos labele halo buat ida atu “kombate korupsaun legal” ida ne’e.  Tamba ho Lei Pensaun Vitalisia, eis-titular sira bele simu osan gratuito iha sira nian moris tomak. Tamba estado mak hasai osan ba despesa sira nian familia, no la iha ema ida mak tauk atu hetan akuzasaun tan LPV fo’o proteksaun no imunizasaun!”

Ita hotu sente moris nebe mak ita hasoru,  maibe  Eis-titular sira la sente, tamba iha Lei Pensao Vitalisia nebe governu anterior  “Governu Partido FRETILIN” introduz  no aprova sai hanesan lei ida bele garante sira nia moris iha loron ikus to’o mate.

Liu husi Lei Pensaun Vitalisia, eis-titular no nia familia sira bele halo “bisnis” hodi la selu taxa, goza vida tomak hodi la halo servisu ba estado! Se ida ne’e mak lao ona iha ita nian rain.  Oinsa ho juventude nebe mak fo’o sira vida tomak ba luta ba ukun rasik a’an ida ne’e? Saida los mak garante sira nia moris abanbainrua nian ? oinsa mos ho juventude sira nebe oras ne’e laiha servisu?  Oinsa mos ho povu trabalhadores  no agricultores sira la hatene sira nian oan sira nian moris iha loron oin atu sai oinsa?

Liu husi Lei Pensaun Vitalisia, eis-titular sira bele foti osan husi Estado ba despesa família nian. Ikus  mai  se mak sai vitima ba produto lei sira nebe mak hosi governu anterior apresenta iha Premeiro  Governu  FRETILIN? Ita rasik, ita sira trabalhadores,  ita  sira camponeses ka Agricultores,  ita sira juventude nebe servisu laiha, ita sira nebe fo’o votos osan mean ne’e ba sira.

Lei Pensaun Vitalisia  ne’e  hanesan amo Martinho Gusmao hateten katak;  Lei Pensaun Vitalisia ne’e hanesan castelo-rocaforte (benteng pertahanan) ida atu nune’e eis-titular sira ne’ebe tama iha laran bele moris hakmatek. Maski Konstituisaun RDTL nian la fo dalan no la fo fatin ba “cargo vitalícia” (jabatan seumur hidup), maibe Parlemento Nasional taka matan deit atu halo “pensão vitalícia” (santunan seumur hidup).

Tuir mai hakerek  hakarak hosik hela informasaun nebe iha ba povu tomak  atu hatene katak ida ne’e, sira lideranca partido politik sira nebe mai hosi liur hanesan MARIE ALKTIRI HO NIA GRUPO iha liu PLANU ONA BA SIRA NIAN MORIS .

Iha tinan 2008, ex-PM Dr. Mari Alkatiri hahu hakerek surat ba IV Governo Konstitusional, evoka Lei 7/2007, 25 de Julho no mos Decreto 2/2007, 1/Agosto, hosi Governo (FRETILIN), kona ba Direito no Regalias iha Pensaun Vitalisia!

Iha parte ida hateten sai iha public katak; deputado hosi bankada  Partido FRETILIN la bele simu kareta, iha parte seluk Eis-Premeiro Ministro DR. Marie Alktiri tinan ida husu kareta foun no simu osan hosi estado no Estado tenki hasai ba despesa familia MARIE ALKTIRI nian durante tinan ida ho montante osan USD $200 mil dolares amerincanu, enquanto  povu sei moris  susar ho kiak.

Profesores  sira nebe sai hanesan ema nebe hanorin futuru nasaun nian moris ho salario menus liu fulan ida USD 300 dolares, ho dedicasaun hanorin hosi aldeia ba aldeia,  enquanto infermeiru mediku sira ou ema sira nebe dedika sira nia a’an hodi servi povu iha  Sucos ka Aldeia neba moris sem transporte nebe atu bele fasilita sira iha area rural ho salario USD140 fulan-fulan. Enquanto inan no aman hosi saudoso sira nebe mate hanesan; Nino Konis Santana, Koroasu no sira seluk tan  hakerek nain la konsege temi iha ne’e laiha atensaun, hela fatin  iha uma a’at no laiha tratamento saude nebe diak, feto faluk ka oan kiak veteranus ida simu USD100 fulan-fulan, no idozu simu fulan USD 30, Trabalhadores moris ho salario nebe minimu hosi USD 80 to’o USD100 servisu loron 6 iha semana ida nia laran, laiha “seguro da vida”  nune mos ba Funsionario Publiku, Polisia Nasional Timor-Leste (PNTL) ho F-FDTL sira, wainhira hetan azar ka mate iha oras servisu nian ka iha nebe deit, estado so tau matan ba sira, ka hetan subsidiu durante fulan 3 deit. Depois de fulan 3 viuva ho oan kiak sira POLISI ho FFDTL nian moris la hatene  atu sai oinsa  los!!

Maibe hare fali vantagen hosi lei nebe mak Governu  anterior nebe lidera hosi Partido FRETILIN halo.  Lei  nebe fo’o moris liu  Eis-titular Primeiro Ministro,  Eis-titular Ministro, Eis-titular Secretario Estado ho eis-titular Deputado  sira.  Eis-Titular  nian  moris  garante liu ho lei “pensaun vitalisia” (santungan seumur hidup).  Hosi lei ne’e, ita hotu nudar povu nebe ki’ik no kiak, tamba ita lahatene no lakoi buka hatene lei, ema matenek sira mai hosi liur halo ita sai beik liu tan.

Ho komparasaun nebe’e  hakerek  nain cita iha leten hatudu momos katak “pensaun vitalisia” sai hanesan lei nebe mak, nakonu diskriminasaun iha vida moris nudar ema Timor oan i psikologikamente oho povu, tamba Lei Pensaun Vitalisia ne’e garantia liu ukun nain moris duke povu ki’ik no kiak sira.

Lei Pensaun Vitalisia mos halo ema matenek sira hare partido laos hanesan fatin atu ba tau hamutuk hanoin atu desenvolve nasaun ida ne’e, maibe hare partido politik hanesan fatin ka dalan(Batu Loncatan) atu ba hetan poder.  Poder politico la’os ona fatin atu ba servi povu, maibe hare poder politico sai hanesan fatin ka profisaun ida, matenek sira la’os ona hare partido politiku hanesan fatin atu hanorin politika ba povu atu hatene politika.

Tamba lei no kondisaun nebe mak iha, desemprego kada tinan sempre aumenta, laiha industria ka fatin servisu , kondisaun nebe iha fo dalan, no mos, fo hanoin ba matenek sira nebe mak foin akaba sira nian estudus S1 S2 S3 ka DR atu aproveita oprtunidade nebe iha, liu hosi hari’i partido politiku no tama partido politik ka hare partido politiku sai hanesan fatin atu hetan “Santunan seumur hidup”.

Wainhira matenek sira hare partido politico la’os ona fatin atu hanorin politika ba povu, la’os ona hare partido politiku hanesan fatin atu luta hamutuk ho povu ba dalan desenvolvimento  I  la’os ona partido politika hanesan fatin atu luta ba povu nebe kbi’it laiha no mukit nian lian. Iha nebe matenek sira hare poder ka kekuasaan hanesan profisaun katak; tinan lima nian laran tenki aproveita poder nebe mak iha.

Mai ita hamutuk halakon no hapara injustice social-ekonomia no diskriminasaun nebe mak ita hotu senti. Hamutuk ita hakilar ba kolonialista kulit metan. Maubere oan mak ita, ita sira nebe senti moris nebe ita rasik hasoru. Maubere oan mak ita sira nebe moris laiha kbiit to’o ohin loron. Hader ona ba, hamrik ona ba, hamutuk ita hakilar direito ita nian nudar povu nebe’e, ema sei halo beik nafatin. Hamutuk ita hakotuk Injustica social-ekonomi no Diskriminasaun  nebe iha, liu hosi Julgamento Politiku Eleisaun Geral 2012. Obrigado.

Posted by TEMPO SEMANAL