“Ema Laiha Moral Mak Bolu Xanana Traidor No Koruptor”
Written by Thomas Sanches - CJITL - Wednesday, 08 December 2010
CJITL Flash, “Maun bo’ot Xanana ema ida ne'ebe luta nain ba nasaun ida ne'e no ema ida ne'ebe ke iha intrese bo’ot tebes ba povu no rai doben ida ne'e to'o ikus iha ema balu dehan fali Xanana mak traidor no koruptor ne'e so ema laiha moral mak koalia ida ne'e” dehan Brigadeira Jeneral Falintil Forsa Defeza Timor Leste – FFDTL, Lere Anan iha Mercado Lama, wainhira partisipa iha Seminariu Nasional Ba Komemorasaun loron Anti korupsaun, Tersa, (07/12).
Nia hatutan katak tempu sei iha nakukun laran timor oan barak mak mate tanba deit hakarak ukun an maibe nunka hanoin osan no depois hetan tiha naroman hotu-hotu hanoin mak osan deit.
“Heroi barak mak fo ninia an tomak no mate iha ai laran maibe nunka hanoin osan maibe agora atu halo dezenvolvimentu ne'e hanoin buka hariku an deit nunka hanoin povu nia terus” tenik Lere.
Lere husu ba Komisario Komisaun Anti Korupsaun-KAK, Aderito de Jesus Soares atu labele tauk halo investigasaun ba koruptor sira no labele tauk atu foti desizaun atu nune'e bele salva nasaun ida ne'e hosi koruptor sira. (Thomas Sanches/CJITL)
