Governu Debate Envelope Fiskal 2012

Posting Husi : Josefa Parada

DILI- Ministra Finansas, Emilia Pires informa katak, objektivu envelope fiscal atu politika fiscal sustentavel hodi despezas kapital sufisiente atu kobre Governu nia objektivu desenvolvimentu iha 2012. 
Diskusaun ne’ebe mak MF hala’o hamutuk ho membru Governu no Diretores hotu iha ministeriu laran kona ba Yellow road Workshop 2011 ba iha perioridades Nasional 2012 ne’ebe hala’o iha Salaun Nobre Ministeriu dos Negocios Estrangeiros Segunda (11/4). 

Emilia afirma hikas, iha debate ne’e focus liu kona ba orsamentu para ida-idak hala’o ninia servisu ho diak. Para bele hatene ona envelope fiscal global ne’e hira, perioridades nasionais ezatamente saida. Nune’e bele fahe ona osan itermus de envelope fiskais ba linhas ministerais no ajensia sira seluk. “Bazeia ba ida ne’e mak ita bele fo envelope fiscal.

Iha planu 2012 Ministra ne’e hatete, ida ne’e mak sira mai para hahu diskusaun ida ne’e katak depois de diskusaun ne’e, tenke fo mai desizaun rua mak hanesan primeiru saida maka perioridades planu ne’ebe maka focus hanesan perioridades não querdizer saida mak hahu ona la halo, kontinua halo maibe tenke hatene focus ba ho envelope fiscal ida ne’ebe.
“ Hau labele fo sai lai porque foin mak hahu reunion para halo diskusaun ne’e,”dehan MF, Emilia.
Emilia haktuir katak, iha apresentasaun husi MF ne’ebe tama hanesan defizaun makro-ekonomiku, defizaun Sekretariadu MDZ, defizaun OGE nomos seksaun  halo devizaun orsamental, devizaun reseitas, devizaun fundus petrolio grupu tekniku ida halo ona  no sira nia imput hatama ona atu apresentasaun hodi fo sai saida maka forum ne’e tenke tama iha konsiderasaun.

“Ami hahu ho konsiderasaun ha’at hanesan politiku, social, Ekonomiku no konsiderasaun seluk. Politiku ami fo sai dehan katak ita tenke hanoin katak iha 2012 iha eleisaun rua maka hanesan presidensial no legislative. Purtantu ida ne’e sei iha impaktu bo’ot ba ita nia aktividades durante tinan 2012,”esplika Ministra ne’e..
MF, Emilia esplika liu tan katak, kona ba konsiderasaun social sira  fo hanoin katak tenke hare fali indikador kiak ninian, tenke toma konsiderasaun indikadores sira. Tamba ida ne’e sira hanoin importante tebes hanesan mal-nutrisaun, mortalidade maternal, asesu ba fasilitasaun sanitasaun ninian, etc.
Depois MF sei fo sai mos indikadores ekonomiku hanesan kresimentu ekonomiku saida mak hakarak ou saida mak halo ona. Importante tau matan ba inflasaun hanesan kauza presu bele sa’e, tau matan ba desempregu.

MF reforsa tan katak, fatores kauza inflasaun hanesan definisaun ba inflasaun katak presu sasan hotu-hotu sa’e iha ekonomia nia laran durante periodu ida, kapasidade produsaun limitadu, restrisaun oferta no bottlenecks mos limita kapasidade atu atende demanda ba sasan oi-oin, aumenta salariu maibe produtividade la akompanha nomos inflasaun importadu tamba ekonomia dominadu husi importasaun.
Alende MF fo sai mos informasaun kona ba demografika idades timor ninian hare katak ema barak liu maka iha menus 24 anos kuaze 60% populasaun menus 24 anos inklui  programa saida maka foti para atu fo resposta de demografika ida ne’e.

konsiderasaun seluk katak Emilia, tinan ne’e mos PM sei lansa planu estrategiku nasional de desenvolvimentu tamba ne’e  mos iha impaktu ba saida mak  hakarak halo iha 2012. Tamba husi substansia sira ne’e hotu tenke liga malu.

“Purtantu ida ne’e, ami tau iha meja depois ami mos sei fo sai tipu de politika fiscal ne’e mak ami hanoin bele implementa iha TL. E ami toma inkonsiderasaun katak ita nia situasaun tamba ita iha faze konstrusaun de nasaun ita hatene katak sasan barak tenke sei halo maibe, ita nia konstranjimentu saida kona ba ita nia kapasidade de implementasaun to’o iha ne’ebe,”Emilia hatutan

Iha biban ne’e, Primeiru Ministru Xanana Gusmão hato’o mos iha nia diskusaun katak, Governu presisa hamutuk hodi diskuti perioridade ida ne’e hodi kaer tuir atu hare ba iha planu 2012 nian. Iha planu 2012 ne’e katak Xanana, OGE sei ba to’o iha 31 de Dezembru maibe sei iha eleisaun Governu foun sei hala’o iha Agosto 2012. “Iha Agosto 2012 nian sei la halo karik uma bo’ot porque saida maka ita prepara iha 2012 hanesan tinan babain. Halo ida ne’e para ita labele subar tamba oinsa mos ita konhese malu,”hatete PM ne’e.
PM ne’e reforsa katak, iha 2012 lalika hanoin barak maibe tenke hanoin saida maka atu halo iha 2012. Tamba iha fulan Marsu iha eleisaun Presidensial no eleisaun legislative.

Tamba perioridades 2012 ne’e importante hodi diskuti atu orienta ba membru Governu no direitores sira hotu. “Lalika amiziona kaer buat barak maibe ita mantein buat ne’ebe halo to’o agora. Hodi hare ba 2008-2011 ita nia papel to’o iha ne’ebe,”PM ne’e esplika.

Iha parte seluk, Director Geral INAP, Belarmino Neves reforsa katak workshop ne’e atu determina perioridade nasional ba 2012. Tamba iha 2012 sei hasoru eventu nasional ba eleisaun geral hodi preparasaun mos OGE 2012.

“Ohin determina ona katak mais tratar 30 de Abril tinan ida ne’e proposta OGE hotu-hotu tenke tama ona iha Gabinete PM nian. Ida ne’e signifika katak atu hasoru 2012 iha aktividades barak mak halo iha 2011 ne’ebe nia ligasaun ho aspektu desenvolvimentu nasional ne’ebe ita halo iha 2011 atu responde dadus balun iha 2012,”tenik Diretor ne’e.

Director ne’e reforsa tan katak workshop ne’e importante tebes atu nune’e ministeriu no agensia ida-idak bele hatene ninia perioridades saida maka atu levanta no hala’o iha 2012. Liafuan seluk mai husi, Sekretariu Estadu Meiu Ambiente, Abilio Lima hatete katak, workshop ne’e positive tamba bele soe hamutuk hanoin ba malu kona ba planu 2012 ne’ebe mak atu hala’o. vey