Bankada FRETILIN fahe malu tamba Resolusaun hasoru Camarada Ana Pessoa

Terça-feira, 19 de Abril de 2011

Dili, Aileba Lian (AL). Iha segunda-Feira (18/04/2011) Parlamentu Nasional (PN), vota ba Resolusaun nº. 63, ne´ebe apresenta husi AMP, atu husu Tribunal Rekursus ba investiga Prokuradora Jeral Republika, Dra. Ana Pessoa.

Hahu polemika ba haksesuk malu, tamba wainhira ható Resolusaun ne´e iha loron quarta-feira (06/04/2011) husi Bankada Fretilin walk out, neduni la iha quorum hodi halo votasaun (33). Adia ba segunda-feira (11/04/2011) la konsegue vota no adia fali ba terça-feira (12/04/2011) mos hanesan, falta ba quorum. Dada tan ba loron segunda-feira (18/04/2011), hafoin iha duni Quorum (38), Resolusaun nº. 63 aprovadu ho votus Favor (29), kontra (2) no Abstensaun (7).

Bankada FRETILIN fahe malu

Desta vez kasu Ana Pessoa fahe Camaradas sira, husi votasaun ne´e hetan votos favor husi deputadus Fretilin nain 4, maka Deputada Cipriana Pereira, Deputado Osorio Florindo, Deputada Josefa no Deputado Francisco Geronimo. Hatudu katak, kasu atuasaun Camarada Ana Pessoa ba camarada José Luis Guterres provoka fahe malu iha bankada Partidu Fretilin.

Karik signal ba portestu ba politika nebe maka diresaun partidu Fretilin hola durante ne´e? Ka signal ona ba atu tama ba luta poder iha partidu laran, nebe sai hanesan mensajen klaru ba laran, liliu ba lideransa katak Mari Alkatiri mos oras ne´e iha movimentus ba kontraria ninia politika no ninia lideransa.

Militante partidu Fretilin soberanu atu determina futuru ba Partidu Fretilin no ninia kontribuisaun ba desenvolvimentu nasional!

Xanana: CNRT Tenki Hetan Kadeira 45 Iha Eleisaun Jeral 2012

CJITL flash, Prezidente partidu Conselhu Nasional Rezistensia Timor - CNRT, Kay Rala Xanana Gusmao hateten katak se hakarak ukun governu maka partidu ne'e tenki manan maioria ho kadeira 45 iha eleisaun jeral 2012 mai.

Xanana Gusmao haklaken ida ne'e iha konsolidasaun partidu iha Sub Distritu Watu lari, Distritu Viqueque sabdu semana kotuk (16/4).

"Se ita manan kadeira 32, ita sei hela deit iha parlamentu atu halo lei, maibe se hakarak ukun governu tenki manan pelo menus kadeira 45 atu bele ukun, tanba ne'e ita hotu tenki servisu makas" Xanana apela iha nia diskursu.

Tuir observasaun CJITL online iha Viqueque, hatudu katak konsolidasaun ne'e hahu ho fo pose ba strutura partidu Viqueque nian ne'ebe mos sei tun mai Dili atu partisipa iha kongreso nasional CNRT ne'ebe sei hala'o iha loron 29 Abril to'o 1 Maiu 2011 iha Centru Convensaun, Eis Merkado Tuan, Dili. (Domingos da Silva/CJITL)

Aderito: CNRT Sei Manan Maioria

CJITL Flash, Preparasaun Partidu Conselhu Nasional Rekonstrusaun de Timor - CNRT atu halo Segundu Kongersu Nasional ne’ebe sei realiza iha loron 29 Abril to’o  01 Mei falta loron sanulu tan (10).

Tuir Deputadu Aderito Hugo katak Segundu Kongresu Partidu CNRT nian ne’ebe mak iha ona kalendario ba loron tolu nia laran hahu 29 Abril remata 1 Mei hodi hili diretivas foun atu kaer CNRT.

“Oras ne’e dadaun halo ona preparasaun ba segundu kongresu nasional ne’e, oinsa atuliza ajenda, ne’ebe agora preparasaun la'o hela, kongresu  ne’e  sei hala'o Iha Centru Convensaun Dili, Fatin ne’e ami hare sufisiente duni hodi halao segundu kongresu partidu CNRT” dehan Aderito Hugo, tersa 19/4, iha Parlamentu Nasional.

Nia hatutan katak kongresu ne'e atu hare no aprova estrutura altu partidu nian hanesan Prezidenti Partidu, Sekertari jeral, nasional partidu nian, ida mak statutu manual politik partidu nian, programa partidu nian,no  strutura partidu nian atu iha mudansa ga lae, ne’e iha kopetensia iha kongresita sira nian.

“CNRT hanesan Partidu Foun ne’ebe Moris fulan rua antes eleisaun 2007,  nia iha kedan gaina husi povu, maiske Partidu CNRT ne’e foun maibe hetan kedan konfiansa husi votantes Maioria iha elisaun 2007, aliansa iha parlamentu hamutuk ho partidu  ha'at” haktuir Aderito.

“Uluk atu kompete iha eleisaun 2007, ami nia preparasaun fulan rua deit, maibe ami sai segundu lugar iha eleisaun, agora ami nia preparasaun tinan 5, fiar katak ami sei manan maioria” Aderito hateten.

Relasiona ho kongresu CNRT nian, to'o oras ne'e seidauk iha kandidatura ruma atu kompete iha kongresu ne'e.

Oras ne'e dadaun atual Primeiru Ministru, Kay Rala Xanana Gusmao mak kaer pasta nu'udar prezidente CNRT hamutuk ho Dionisio Babo hanesan Sekretariu Jeral.

Aderito informa katak iha kongresu ne’e sei partisipa mos Kordenador husi Distritu  to’o Sub-distritu no suco. (Elvis/ CJITL)