AMP Habokur Emprezariu Hodi Tulun Fretilin

Saturday, 12 February 2011

Tempo Semanal-Dili, 12.02.2011

Tuir nota ne'ebe vice prezidenti partidu Fretilin dehan iha loron 11/02/2011 partidu istoriku ne'e halo atividade buka osan ba kongresu iha fulan Setembru tinan ne'e.

·     

Foto husi FB, Vise Prezidenti Fretilin Arsenio Bano

 "Emprezarius, militantes FRETILIN no Convidadus atende jantar buka fundus apoiu eleisaun direta ba Lideransa FRETILIN halo iha Hotel Arbiru iha loron, 11 Fevereiro 2011," dehan iha Prezidenti partidu Fretilin, Arsenio Bano ninia Face book.

Nia haktuir katak, "Angriasaun fundus nee hetan duni apoiu husi partisipantes nebe kontribui husi $100 to'o $35,000, refleta antusiasmu apoiu ba FRETILIN hodi promove demokrasia iha Timor-Leste liu husi eleisaun direta ba lideransa FRETILIN nian."

"FRETILIN prepara hela atu organiza eleisaun direta atu eleje lideransa FRETILIN nian husi militantes sira molok Congressu FRETILIN iha Setembru 2011."

"FRETILIN sai nafatin hanesan ezemplu no pioneiru nebe kontinua promove demokrasia iha Timor Leste hafoin lori tiha rai nee hetan ukun rasik an."

Foto husi Vice Prezidenti Fretilin, Arsenio Bano nia FB 

"Too jantar nee remata fundus nebe konsege liu $700,000 la konta ho sira nebe hato'o tiha ona sira nia apoiu maibe la marka sira nia prejensa iha Hotel Arbiru," relata Bano ne'ebe dala barak hanesan membru parlamentu Nasional sempre kestiona kualidade projetu husi emprezariu sira ne'ebe iha loron 11/02/2011 naksulin dollar balun ba kaixa koleta Fretilin ninian.

Iha parte seluk estudante Universidade ida iha Dili dehan lala'ok ne'e hatudu momos katak AMP mak ukun, emprezariu raut osan liu husi projeitu la ho kualidade, povu maka sofre maibe osan hodi hatama ba kaixa Fretilin ninian.

Foto husi FB, Vice Prezidenti Fretilin, Arsenio Bano 

"Ha'u hanoin ida ne'e drama ida. Se karik Fretilin manan fali elisaun maka hakarak ka lakohi Fretilin sei iha dever moral atu foo nafatin projeitu ba emprezariu sira ne'ebe kee dala barak halo sasan la ho kualidade hodi prejudika interese komun maibe enxe osan ba sira nia konta bankaria de'it," dehan F. X. da silva Soares estudante UNTL fakuldade ekonomia.

"Ha'u hakarak akresenta katak de'it katak ha'u mos Fretilin maibe se ita hakarak kombate KKN ne'ebe lor-loron ita nia deputadu sira hakilar beibeik entuan diak liu sira la devia halo malam dana simu osan husi emprezariu ne'ebe hetan alegasaun hanesan foos, mina no konstrusaun ne'ebe la iha kualidade,"nia hatutan.


"Se diak liu Fretilin para tiha ho kampania KKN iha parlamentu tan ba hamoe mos hau hanesan jerasaun fretilin ida. I ita hakilar Primeiru Ministru Xanana lor-loron ho KKN maibe iha tempu hanesan ita mos husu hela osan ba ema sira ne'ebe ita deskonfia maka ita alega," nia sujere. 


Tuir letratu ne'ebe mostra iha Facebook (FB) vice Prezidenti partidu Fretilin ninian hatudu momos prezensa emprezariu lubun boot ida ne'ebe barak hetaan asesu fasil ba manan tender iha governasaun AMP maibe halo projeitu barak maka la ho kualidade hanesan mahasiswa futuru jerasaun ida sita iha leten ne'e. Emprezariu sira ne'e barak maka manan projeitu hanesan konstrusaun inklui Prokuradora Jeral ninia gabinete ne'ebe bele nota nakfera no nakloke daudaun, Ukun nain ba pakote referendum ne'ebe too agora ema sei hetan nafatin lamentasaun no projeitu sira seluk.(TS).

CNRT Preparadu Sai Vensedor Iha Eleisaun 2012

Josefa Parada - Tersa, 15 Fevereiru 2011 - SUARA TIMOR LOROSAE

DILI – Intensaun manan iha eleisaun jeral 2011, sai tarjet boot lideransa CNRT nian.
Lideransa CNRT oras nee laos halo deit sosializasaun politika maibe halao mos rekrutamentu politika liu husi hametin estrutura partidu ho politika reajustamentu no konsolidasaun.

Konsolidasaun nebe lideransa CNRT halo iha kada suku nudar atika ida oinsa hametin no atrai fiar povu rai nee ba partidu CNRT nudar nebe preparadu atu sai vensedor iha eleisaun jeral 2012.

Sekertariu Jeral Partidu CNRT, Denizio Babo, hatete atividade partidu nebe lao daudauk iha baze importante tebes atu hametin partidu hodibele compete iha eleisaun jeral 2012.

“Konsolidasaun ka rejus¬tamentu estrutura partidu iha baze nee atu bele fiar an lao ba oin, hodi hametin fiar ba militantes sira iha baze,” hatete Dionecio Babo ba STL wainhira halao konsolidasaun partidu iha suku Caicoli, Sub distritu Vera Cruz, Distritu Dili, Dominggu
(13/2). Partidu CNRT, katak Dioni¬cio oras nee iha nia estrutura husi Distritu to’o iha nasional.

Estrutura CNRT oras nee bo’ot teb-tebes, kuaze kobre teritoriu tomak. “Hau bele hatete katak kuaze iha teritoriu timor laran tomak ita kobre ona, dadauk ne’e partidu CNRT estrutura bo’ot tebes i forti hanesan partidu seluk, tanba ne’e hau husu militantes sira atu bele fiar an hodi lao ba oin” tenik Deonicio.

CNRT tuir Sekjer nee iha prinsipiu haat husi prosesu liberta patria, liberta Povu (valorizasaun ba rezistensia), kaer metin unidade nasional, estabilidade no Dezenvolvimentu.

Iha fatin hanesan Virgilio Smith, alias Cranic hatete CNRT moris atu libertu Patria no agora CNRT atu liberta Povu husi kiak no mukit. Liu husi programa oin-oin, hanesan fo subsidiu ba ferik katuas sira, veteranus, bolsa do mae no mos programa ba vuneravel sira.

Programa ba povu Vuneravel sei kontinua ba nafatin to’o 2015 hodi deklara ba Nasoens Unidas katak programa ne’e atinji ona to’o nivel ida aas.

Smith reforsa tan katak mesmu durante ne’e sei hasoru problema eletrisidade, maibe CNRT liu husi Prezidenti nebe’e dadauk ne’e xefia husi Primeiru Ministru promote atu fornese ahi ba komunidade iha parte Norte (Tutuala to’o Batugede) komesa 27/11/ 2011. Ida ne mak CNRT nia planu hodi dezenvolve rai nee ba oin tuir espetativa povu rai nee nian.

Iha parte seluk, Francisco Guterres, Sekertariu Jeral OJP CNRT hatete mos katak partidu CNRT moris tanba nesesidade no Dezenvolvimentu. Koalia konaba papel, joventude mak forsa politika ba partidu mesmu joventude sempre joventude tanba ne’e husu ba joventude sira tenki formadu signifika katak tuir formasun oin-oin hodi bele hasae kunesementu no kapasidade atu nune bele atinji saida maka joventude sira hakarak. “Hau husu ba joventude atu atinji ita nia hakarak tenki tuir formasaun oin-oin hodi hasae kapasidade ho razaun katak CNRT mosu tanba nesesidade no dezenvolvimentu”, nia esplika.

Nune mos Prezidenti OMP, Ijilda Soares, husu ba feto maluk sira atu tau neon no laran metin, no konfiansa ba partidu hodi halao nia programa atu bele sai partidu vensedor absoluta iha eleisaun 2012. Elo