Diario
27 de Dezembro 2010
Reporter: Joao da Silva
Vikeke. Partido CNRT halao konsolidasaun durante period Natal iha distritu lobuk ida. Iha mensagem ba quadros, militantes no simpatizantes sira CNRT hatoo ona mensagem konaba Unidade Nacianal ho Dezenvolvimento no garante katak iha 2012, Partido CNRT tenki manaan eleisaun ho maioria absoluta.
Iha loron 27 de Dezembro 2010, Partido CNRT halo konsolidasaun iha Distrito Vikeke, Lospalos, Same ho Ainaro. Iha Vikeke, konsolidasaun sentraliza iha Suko Bahalarawain no iha Lospalos, sei halao iha Sub-Distrito Lautem, no konsentra iha Suko Mehara.
Konsolidasaun iha Vikeke halao tiha ona dala uluk iha suko lobuk ida no iha dia 27 de Dezembro Vice Presidente CNRT VIrgílio Smith ho Vice Sekretário II Geral Jose da Silva Fo Laran mak partisipa hamutuk ho mos Vice Koordenador Partdo CNRT Vikeke Virgilio Guterres.
Iha konsolidasaun ne, komunidade Bahalarawain kuaze liu ema 400 (atus hat) hatudo entusiasmo boot tebes hodi paritisipa ho solenidade cerimonia hosi dader to lokraik didiak. Vice Presidente CNRT VIrgílio Smith hatete katak partido CNRT, partido ida nebe moris hosi decizaun resistensia tanba hare katak governo uluk lao ladun los no la lori objektivu rezistensia nian iha tempo ukun aan. Tanba ne’e ema rezistensia lobuk ida hamutuk ho maun Boot Xanana Gusmao no mos ema foin-sae foun lobuk ida tau liman hamutuk hodi instaura fila fali mehi asswain sira nian, oinsa atu hadia nasaun ne.
CNRT, haktuir Vice Presidente Virigilo Smitih nebe konhesidu mos hanesan kranik nudar tempo rezistensia, hanesan mata-dalan nebe uluk lori ona povo ba liberta nasaun iha 1999. Iha tiha ukun aan Partido CNRT mossu fali hodi liberta povo ne hosi kiak, mukit, hamalaha, terus, susar no nakukun seluk. Iha momento ne, CNRT nia knar boot liu mak alkansa mehi asswain sira nian hodi bele halo povo ne moris diak.
Para alem de ida ne, Vice Sekretario Geral CNRT, Jose da Silva Fo Laran hatete katak atu bele implementa CNRT sei esforsa atu hetan apoio Timor Oan hotu nian, liu-liu iha Vikeke atu bele apoia maun boot Xanana ho Veterano sira hodi bele rai hela buat diak ida ba nasaun, ba future gerasaun sira. Ita nasaun riku, maibe riku soin ne labele fo deit ba ema balu ho nia maluk sira hanesan iha governo uluk. Tanba ne, ema rezistensia mak tenki kaer para fahe rikusoin ne ba Timor oan hotu-hotu. Fo laran haktuir katak, hanesan Sekretario Geral CNRT, Dionisio Babo hatete bebeik ona, tenki hakuak metin buat hat: Valoriza rezistensia, kaer metin establidade nasional, halao rekonsiliasaun nasional hodi halao Dezenvolvilmento Nasional. Buat hat ne importante ba CNRT iha faze libertasaun do povo nian, atu povo moris diak no hakmatek iha dame, unidade no dezenvolvimento.
Estrutura partido Suko Bahalarawain nebe marka prezensa iha neba ho povo hato sira nia konfiansa makaas ba CNRT no hakarak atu partido ne manaan iha eleisaun 2012 hodi bele alkansa moris diak povo nian no mehi asswain libertasaun nasional, nebe hakarak atu povo Timor Oan tomak sai hosi nakukun laran no bele moris iha hakmatek, dame no dezenvolvimento nia laran.
Konsolidasaun iha Mehara –Lospalos
Tuir plano, dia 29 de Dezembro partido CNRT mos sei halo konsolidasaun iha Lospalos ho baze iha Tutuala. Konsentrasaun suko rua Tutuala nian ho nia estrutura suko tomak se hola fatin iha suko Mehara. Tuir plano, Vice Sekretario Geral I CNRT, Duarte Nunes ho Cordenador Geral F-Mudansa, Victor da Costa, sei partisipa hodi bele hametin liu tan estrutura iha sub-distrito neba.
Iha Suko Rua ne, estrutura partido CNRT montado tiha ona, no durante ne halao servisu hanesan bain-bain hodi fo sai programa partido nian. Servisu nebe estrutura suko halao iha Mehara mos, halo konsiensializasaun sobre programa governo no programa nebe Presidente Partido CNRT, Maun Boot Xanana Gusmao dezempenha nudar Primeiro Ministro RDTL.
Hanesan governo, tuir plano, sei harii uma ba ema vilneraveis (kiak, ferik katuas) sira hamutuk 11.000 (onze mil) iha tinan territorio tomak hodi fob a vulneraveis sira. Uma sira ne, sei halo iha Aldeia ida hamutuk uma 5 (lima) ho tipe media, hodi bele fo hela-fatin suficiente ba ema kiak sira. Ita espera katak uma sira ne sei bele aumenta tan, tuir estado nia kapasidade, iha tinan 2012 no tinan hirak tan ba oin, hodi garante katak ema Timor Oan hotu sei iha uma nebe suficiente atu hela no moris ba.
Partido CNRT mos, iha tempo hanesan, halao Konsolidasaun iha distrito Same ho Ainaro iha loron hirak ne.
