terça-feira, 25 de outubro de 2011

Partidu Fretilin, PD, UDT, ASDT, PST, PUN halo afiliasaun ba CNRT


 








Maubisse -MLP - besik atu tama ona ba eleisaun jeral 2012 Militante sira partidu politiku barak hanesan FRETILIN, PD, ASDT, PST, PUN, UDT mak haksoit sai husi nian partidu  hodi halo afiliasaun ba partidu CNRT tamba haree deit ba figura no programa partidu CNRT nian ne’ebé hakuak ba ema hotu hodi hasai povu husi kiak no mukit.

Tuir Eis koordenador Partidu Demokrátiku (PD) Sub-Distritu Maubisse, Carlos Gomes hateten katak halo afiliasaun ba partidu CNRT tamba haree ba Figura Maun bo’ot Xanana Gusmão no progrma paritod CNRT nebe diak tebes. Maun Xanana, tuir nia, hamutuk ho partido trasa ona nian programa iha partidu CNRT nian laran hodi hasai povu husi kiak no mukit tamba laiha lideransa ne’ebé diak hanesan Maun Xanana.

“Hau ho hau nian militante tomak hamutuk 116 halo afiliasaun ba partidu CNRT tamba haree ba figura maun bo’ot Xanana no hare ba progrma partido CNRT nian nebe diak, nebe durante ne’e nian halo ba povu no rai ida ne’e tamba laiha figura seluk hanesan maun bo’ot Xanana”dehan Carlos bainhira halo afiliasaun ba partidu CNRT iha Suku Maubisse , Sub-Distritu Maubisse,  Distritu Ainaro, Sábadu (22/10)

Iha fatin seluk, hanesan Eis Koordenador Partidu UDT,  Marcelino da Conceinção hateten katak ohin afilia ba partidu CNRT hodi hamutuk ho Maun Xanana atu halao programa CNRT nian nebe diak, hodi lori povu no nasaun ida ne’e ba oin tamba durante funu nian laran hamutuk ho maun Xanana deit ne’e duni ohin fila ba hamtuk ho maun Xanana.

“Hau ho hau nian militante sira hamutuk 114 ho deklara ba públiku hodi halo afiliasuan ba partidu CNRT hodi hamutuk ho Maun Xanana hodi halao programa partido nian, nebe sei lori povu no rai ida ne’e ba oin”dehan Marcelino hafoin halo afiliasaun.

CNRT: PARTIDO NEBE HAKRIBI NO CONTRA VIOLENSIA

GREGORIO FERNANDES– JORNAL LIBERAL

Díli - “Sekretariu Jerál Partidu CNRT, Dionísio Babo, deklara katak partidu Partidu Consellu Nasionál Rekonstrusaun Timor (CNRT) rejeita totalmente violensia no krimi, no sei garante estabilidade no seguransa iha eleisaun 2012.

Dionísio Babo, informa kestaun ne’e iha konsolidasaun nebe halao iha Maubisse (21/10) foin dadaun ne bainhira akompanha Presidente CNRT Xanana Gusmão, aktual Primeiro MInistro, halao konsolidasaun partido nian iha Maubisse semana kotuk.

“Ami halo enkontru regular iha Partido hamutuk ho ami nia responsaveis sira hosi distrito to sub-distrito regularmente hodi diskuti kona ba situasaun jeral TL i ami hotu-hotu hato’o preokupasaun ida ne’ebé bele dehan hotu-hotu tenke kontribui para eleisaun jeral 2012 tenke sai eleisaun ne’ebe diak, para ita hapara ona kultura violensia, no tenke para ona, hodi labele sai fali kultura ida aat iha ita nia rain, ”dehan Babo ba Jornalista iha Maubisse iha Sabado-feira semana kotuk.

Babo salienta liu tan katak iha eleisaun jeral tinan uluk (2007) mak mosu violensia sunu uma no krimi oi-oin mosu tanba ema balun hakarak mantem poder no uza meio oinoin hodi mantem sira nia pozisaun, maibe ba nia dehan ba eleisaun 2012, partido CNRT garante sei la’o ambiente paz no dame iha distritu no suku tomak.

Tanba ne’e Primeiru Ministru no atúal Prezidente CNRT, Kay Rala Xanana Gusmão hatete katak, sira nia parte sei hato’o mos ba juventude CNRT no Juventude partdo seluk atu la halo violensia iha 2012, katak, ba membru sira ne’ebe involve iha violensia durante eleisaun, sei hasoru PNTL no hetan kastigu tuir lei. Iha sexta-feira semana kotuk, bainhira inagura laboratorio peskiza Juventude CNRT, Presidente partido Xanana Gusmao hatete katak "Juventude CNRT tenki sai ezemplo ba juventude Timor tomak, atu respeita ema, iha toleransia, labele kria konflito no hadomi ema hotu ho bele dezenvolve ita nia rain".

“Hau husu Juventude CNRT atu labele halo erros, ba kria blogos iha internet hodi insulta ema hanesan paritdo balun seluk, no tenki iha komitmentu boot ba situasaun hotu no sei la bele hamosu konflitu tan,”dehan Xanana.

Prepara Gerasaun Foun

Sekretario geral CNRT mos husu ba lider lider politiku sira atu servisu  hamutuk liu kopera ho igreja hodi prepara ba foin-sae sira atu sai lider aban bainrua nian. "Agora dadaun ne'e ita hare ita nia maun-boot sira mak sei kaer ukun, maibe ita mos tenki prepara lider sira aban bainrua nian, no ne responsabilidade partido politiko hotu nian" tenik nian

Antes ne'e, Primeiro Ministro Xanana hatete ona katak iha “enkontru iha Maubise um (I) ho Maubisse doiz (II) partido politiku sira hamutuk ho Dom Basílio konkorda atu intrega kna’arprepara jovem sira ba futuro, no tanba ne ne’e mak hahu prepara ona hodi ko’aloa ba malu  ho partido seluk atu Amu Bispu hodi prepara fatin no sa loron mak sei realiza enkontros sira tuir mai,”dehan PM Xanana.

Primeiro Minstro Xanana informa liut tan katak lider politik hotu-hotu koalia ona konaba decade iha tinan 2020 katak, Timor Leste tenki hetan mudansa maka’as iha dezenvolvimentu no Paz.Bispo Dom Basilio rasik, antes ne’e informa ona katak, Igreja sei prepara kondisaun tomak hodi forma jerasaun foun sira, ne’ebe presija tempo naruk atu halo debate diak liutan.

Iha parte seluk, Mario Mendonsa, populasaun Maubisse informa katak nia kontenti partido CNRT desde uluk sempre iha komitmento atu hari paz no estabilidade ihat Timor-Leste no apresia katak CNRT nu’udar Partidu bo’ot  sempre hakaas an atu rejeita Violensia iha tinan 2012 mai.

Presidente CNRT Xanana Gusmao mos hateet katak sira “husu ona atu partidu sseluk mos tenki iha komitmentu atu hametin liu tan dame iha eleisaun 2012, dame tenki metin”.


Laos hanesan Fretilin, PM Xanana Gusmao Husu “Ministru Sira Ba Hatan Iha Tribunal karik sira Salah

.
Segunda, 24 Outubru 2011

Transparensia nebe Primeiru Ministru Xanana Gusmao hatudu hodi afirma katak nia membru Governu sira sei ba hatan iha tribunal karik sira hetan alegasaun komete korupsaun bele dehan "luar biasa".

Xefi Governu Aliansa Maioria Parlamentar (AMP) Xanana Gusmao ne deklara buat hirak ne ba Jornalista sira, iha Aeroportu, Dili, Sesta (21/10), tanba CNRT promete rasik ona iha 2007 katak se mak halo salah, ka naok ossan tenki sai no tenki ba hatan iha Tribbunal .
 
Foin dadaun ne mossu informasaun iha media nasional ne’ebe haktuir osan lakon iha Ministeriu balun oras ne’e no ema ida la halo kazu la naokten ne ema la kaer, PM Xanana koalia, nia Xanana lakohi halo komentariu ba informasaun kona ba osan lakon.

“Hau la halo komentariu i hau sempre dehan, balun dehan 50 cent ba kadeia, laos hau maka ka’er, Estadu selu ema seluk atu kaer,” dehan PM Xanana.
 
Gestu   ida ne hodi taka opozisaun sira nia ibun katak PM Xanana la halo kazu ba kazu korupsaun, kuando PM rasik husu hela instituisaun judiciario ho anti-corrupsaun sira para bele toma medida lalais karik sira hetan provas mal administarsaun ka korupsaun iha nia governo rasik.

Iha tinan kotuk, kong-kali-kong entre Provedor Sebastiao Ximenes - Procuradora da Republika  Ana Pessoa Pinto - ho Bankada Fretilin, konsege lori Vice Primeiro Ministro Jose Luis Guterres ba Tribunal, maibe  Tribunal rasik iha distrital ho rekurso la hetan salah ida ba Jose Luis Guterres ho nai maluk sira, no fo aboslusaun tiha.

Bankada Fretilin moe no taka ibun to agora.

PM Xanana mos haktuir tan katak,” hau hein sira (Membru Governu) ba hotu tiha maka hau tuir, hau taka dalan, ne’ebe halo la halo komentariu ba informasaun ne’ebe dehan osan lakon, tanba buat sira ne’e sei lao tuir nia regra, ne’ebe oras ne’e la’o hela,” dehan PM Xanana.

PM xanana mos deklara, monta instituisoens, tenki fo apoiu ba sira, labele hakilar Komisaun Anti Korupsaun (KAK) tinan ida ona la halo buat ida.

“Ita lahatene sira nia esforso to’o iha ne’ebe, sira nia ema iha ka lae, invistigadores iha ka lae, tuir lolos kritika estadu, imi tau tiha KAK, lakohi tau osan ba para kria investigadores, kritika mak hanesan ne’e,” dehan PM Xanana.

FH: GREGORIO SALDANHA Vs LIDERANSA NASIONAL FRETILIN


Filipe Rodrigues Pereira )*

Depois de hala’o III Kongresu iha Centro Convenção de Dili (CCD) fulan kotuk, partidu Fretilin hetan tan fali turbulensia internal. Impaktu husi III Kongresu partidu Fretilin hamosu insatisfasaun iha militantes partidu ne’e nia let. Por ezemplu, isu nebe’e mak antes ne’e publiku rona katak OJETIL atu sai husi Fretilin, responsabilidade finansial partidu nian la hato’o ho diak iha III Kongresu, iha militantes ka responsáveis Fretilin balun komesa halo afiliasaun hodi suporta individu seluk ba kandidatura PR, maski CPN partidu Fretilin rasik ladauk hakotu desizaun ruma konaba partidu Fretilin ninia kandidatura ba’a PR. Ikus ne’e, dia 7 de Outubru 2011 liuba Gregorio Saldanha, figura nebe’e konhesidu iha Dili resigna-a’an husi kargu nudar Koordenador partidu Fretilin Distrito Dili.

Iha ninia rezignasaun, Gregorio Saldanha haklaken katak presiza buka haka’as-a’an atu Fretilin keta monu dala ida tan ba’a rai-ko’ak. Deklarasaun Gregorio refere hahafodak publiku tamba partidu Fretilin nebe’e foin halo eleisaun directa hodi hili lideransa direksaun nasional partidu nian no foin hala’o III Kongresu, ta’u fali partidu Fretilin iha rai-ko’ak ibun?!

Koalia konaba kongresu partidu Fretilin nain maka mosu fenomenu interesante ida atu hare. Iha II Kongresu nebe’e uluk partidu Fretilin halo iha 2006 hamosu Grupu Fretilin Mudansa nebe’e ikus mai iha eleisaun 2007 fo’o ninia impaktu ho redusaun bo’ot ba’a votos nebe’e partidu Fretilin hetan. Foin daudaun, liu husi III Kongresu 2011 mosu mos diskontentamentus, insatisfasaun no ikus iha parte distritu Dili halo Gregorio Saldanha husik ninia kargu nudar Koordenador Komisaun Politika Fretilin Distritu Dili. Husi ne’e mosu impresaun ida ba publiku katak Kongresu nebe’e durante ne’e partidu Fretilin halo la’os atu buka konsolida no fortifika partidu iha nível baze to’o ba nível nasional, maibe kada kongresu sempre hamosu turbulensia politika nebe’e oituan ka barak fo’o ninia impaktu ba existensia partidu nian, liuliu wainhira atu enfrenta eleisaun geral. Karik ho Gregorio Saldanha ninia rezignasaun sei fo’o impaktu ba votos iha eleisaun parlamentar 2012, especialmente votos iha Distrito Dili?

Koalia konaba ‘konflitus’ entre Gregorio Saldanha no Direksaun Nasional partidu Fretilin nebe’e ikus halo Gregorio rezigna-a’an, dalaruma tuir lideransa nasional partidu Fretilin, Gregorio Saldanha la’os faktor determinante hodi konkista massa iha Dili. Ou bele mos lideransa nasional partidu Fretilin konsidera katak kapital Dili la’os fatin ba partidu Fretilin atu manan votos tamba ne’e atu mosu turbulensia internal partidária liu husi Gregorio Saldanha ninia rezignasaun la’os buat ida importante ba lideransa nasional partidu ne’e nian. Iha tinan 2007 liuba, Dili nudar kapital nasaun Timor-Leste la fo’o manan ba partidu Fretilin, tamba ne’e, karik lideransa partidu sente mos ona katak iha 2012 sei la manan iha Dili maibe bele manan nafatin iha distriru sira seluk?! Kestaun mak ne’e, distritu sira seluk nebe’e uluk sai “baze de apoiu” massa tradisional ba partidu Fretilin ikus ne’e hetan mos tetak husi partidu bo’ot no ki’ik sira seluk, inklui hetan tetak husi Taur ninia kandidatura ba Prezidente da Republika (PR) iha 2012.

Koalia konaba Gregorio Saldanha ninia rezignasaun hanesan temi iha leten mosu tamba liderana nasional partidu Fretilin la tau importansia ba individu Gregorio. Lideransa Nasional partidu Fretilin preokupa mak ho OJETIL ninia suportasaun politika. Tamba lideransa partidu ne’e kawatir Gregorio Saldanha ninia rezignasaun bele fo impaktu ba OJETIL tamba Gregorio daudaun ka’er mos kargu nudar Prezidente OJETIL nian.

Kekawatiran lideransa nasional partidu Fretilin ne’e la’os buat ida irasional ka sem razaun, tamba iha informasaun antes ne’e espalha iha publiku limitadu katak Gregorio Saldanha sei suporta kandidatura Taur Matan Ruak ba PR iha tinan 2012. Gregorio ninia suportasaun ba Taur ikus dudu mos estrutura no membrus OJETIL no deputadus balun husi partidu Fretilin inklina no suporta ona Taur ninia kandidatura ba PR iha 2012. Mos, Gregorio ninia rezignasaun no suportasaun ba Taur halo mos Vice Koordenador partidu Fretilin Distrito Dili, Martinho Pereira ho chefe suku balun iha Dili fo’o ona sira nia apoiu no suportasaun ba Abilio de Araujo ba PR iha 2012. Direksaun nasional partidu Fretilin nebe’e foin mak halo remata III Kongresu fulan hirak liuba lakon kontrolu ba ninia estruturas no militantes?!

Hare ba fenomenu nebe’e akontese iha partidu Fretilin nia laran, liuliu depois de hala’o III Kongresu, mosu pergunta, saída mak sai faktor ba ‘rahun’ nebe’e mosu iha partidu Fretilin nia laran? “Rahun“ ne’e dalaruma mosu tamba faktor pró-kontra status quo. Iha parte ida iha grupu ida hakarak defende status quo no parte sorin iha grupu seluk nebe’e hakarak hamosu mudansa iha estrutura nasional partidu Fretilin nian. Parte nebe’e defende status quo mak parte nebe’e ate prezente sei defende dwitungal Lu-Olo no Mari Alkatiri. Parte nebe’e kontra status quo mak parte nebe’e hakarak iha mudansa iha lideransa partidu Fretilin. Problema mak ne’e, parte rua ne’e lakohi ona rona -malu maibe firmi iha id-idak nia pozisaun, sei la sai ka husik partidu Fretilin. Aktus politika nebe’e ikus mosu liu husi Gregorio Saldanha, Cs bele konsidera nudar forma de rezistensia (bentuk perlawanan) ida hasoru status quo.

Faktor seluk, dalaruma mos tamba la’dauk iha kanal nebe’e diak no efektivu hodi sai nudar paselhu akomodasaun ka komunikasaun internal partidu nian. Aspirasoins estruturais no husi militantes mate ka la’o ho maten. Mos, lakon metodu kritika no autokritika nebe’e uluk Fretilin Movimentu konsege implementa iha Ailaran hodi rona no konfesa id-idak ninia salan?! Iha tempu prezente partidu Fretilin dalabarak leno deit mak praktikas de kritikas husi ema ida ba ema seluk, husi ema ida ba grupu seluk, husi grupu ida ba grupu seluk, maibe politikus partidu Fretilin prezente ki’ak ho mentalidade auto-kritika. Konfesa hodi dehan “hau beik sala”, hau sala halo ida ne’e no hau sala halo ida neba’a la akontese ona iha vida politika iha partidu Fretilin nia laran. Praktika politika hodi justifika-a’an husi buat hot-hotu mak agora daudaun moris buras iha politiku sira nia let.

Karik ilustrasaun sira iha leten mak fo kontribuisaun hodi ikus hamosu aktu rezignasaun no “resersaun” husi Gregorio Saldanha, Cs ?! Bazeia ba akontesimentus politika nebe’e ikus ne’e mosu iha partidu Fretilin nia laran, hein katak Lideransa Nasional partidu Fretilin bela buka halo refleksaun alargada no klean atu nune’e bele tau dok partidu Fretilin husi rai-ko’ak. Iha vida politika Lideransa Nasional partidu Fretilin presiza konsidera katak, “lakon militantes ida husi partidu hanesan lakon militantes rihun ida, tama ema rihun ida ba iha partidu hanesan foin tama ema ida”. Liu husi hanoin hanesan ne’e maka partidu ida bele la’o diak ba o’in no sai bo’ot iha solidasaun nia laran. Ho lian seluk Hakerek’na’in hakarak dehan katak lideransa partidu sira lolos presiza atu kria zero enemy and millinium friends, sa’a-tan atu tama ba’a tempu eleisaun.

Atu la hamonu partidu Fretilin ba rai-ko’ak no kria amigus nebe’e solidu iha partidu Fretilin nia laran, karik lideransa nasional partidu Fretilin sei la’o tuir Gregorio Saldanha, OJETIL no militantes balun nia ain-fatin?!, partidu Fretilin obrigatoriu sei suporta Taur, ka sei fiar-a’an atu futu ninia manu-aman rasik iha eleisaun prezidensial 2012?! Ita hein. **End*** (Opiniaun ne'e publika mos ona iha Jornal Independente, Edisaun 19 Outubro 2011.)