terça-feira, 5 de julho de 2011

Eleisaun direta Partidu FRETILIN, atu lejitima deit lideransa eterno Lu'olo/Alkatiri

Dili, Aileba Lian. Eleisaun direta ba lideransa Partidu Fretilin ne'ebe lidera husi Lu'olo/Alkatiri, atu lejitima deit figura lideransa nain rua nian. Maske sira nain 2 kaer ka ukun ona partidu Fretilin tinan 10 (2001-2006,2006-2011) maibe Lei ka regulamentu sira ne'ebe hakerek iha Estatuto Partidu Fretilin nian,aprova husi kongresu tinan 2001,katak"lideransa limite ba periudu rua deit".

Fakta maka ne'e, lideransa Lu'olo/Mari Alkatiri,kumpri ona periudu rua, maibe CCF hola dezisaun hodi kontinua ho lideransa nain rua, maske seidauk halao kongresu maibe altera ona dadaun Estatuto Partidu Fretilin, hodi ba atende ba interese ba manutensaun lideransa nain rua nian, Lu'olo/Mari Alkatiri nudar lider eternu ba Partidu Fretilin.

Se tuir regras normal, iha kongresu maka bele altera konaba Estatuto Partidu Fretilin nian hodi loke dalan ba hatutun lideransa Lu'olo/Mari Alkatiri. Maibe realidade oin seluk,partidu Fretilin adopta modelu eleisaun direta hodi lijitima deit lideransa eternu, Lu'olo/Alkatiri!

Eleisaun PR 2012 : Jose Luis: " Hau Prontu Servi Povu ”

.

Jornal Nasional Diário - Tersa, 05 Jullu 2011

Dili-Eleisaun Prezidensial iha 2012, Vice Primeiru Ministru (PM) José Luis Guterres afirma, nia pronto ona povu Timor Leste iha kualker momentu, maibe oras ne’e nia sediauk deside nia an atu sai kandidatu ida.

“Hau preparadu desde uluk kedas, atu serve povu Timor Leste iha kualker pozisaun, iha Governu ka la iha, iha lideransa partidaria ka lae, hau nia komitmentu atu serve povu Timor Leste ne’e desde uluk kedas no kontinua nafatin iha futuru,” hateten Vice Primeiru Ministru Jose Luis Guterres ba Jornal Diario, segunda, (4/7) iha Palacio do Governu, bainhira husu kona ba nia naran ne’ebe oras ne’e sai iha publiku hanesan kandidatu ida ba eleisaun presidensial 2012.

Vice PM Jose Luis Guterres mos sauda ema tomak ne’ebe partidipa iha prosesu indikasaun kandidatus ne’ebe publikus refere oras ne’e, nia hatene katak, iha naran sira ne’ebe sai iha media ne’e, ema barak i balun seidauk tama, ida ne’e liberdade ba espresaun opiniaun e ne’e diak ba ema hotu.

“Ba hau nia an rasik, desizaun atu kandidata a’an ka lae ba eleisaun Presidensial mai, ne’e so iha fulan depois de outubro, mak depois sei haree, tanba iha prosesu lei eleitoral ne’e iha datas ne’ebe ita tenki kumpri,” koalia Jose Luis Guterres, nia parte hakarak hatene deit katak, tempu sei to’o para populasaun iha Timor Leste tomak partisipa iha elisoens i iha tempo ne’e maka sira sei eskolha ema ne’ebe sira hakarak.das