Lu-Olo Rekunyese “Ema Hotu Halo Funu, Laos Fretilin mesak”

Tersa-Feira, 03 Abril 2012

Written by: A Barbosa

Kandidatu Prezidenti Republika, Dr. Francisco Guterres Lu-Olo hateten funu ne’e la’os Fretilin ka ema ida ka rua de’it mak halo, maibe kontribuisaun husi povu tomak nian. Deklarasaun ne Lu-Olo halo bainhira halao kampanha iha Maubisse iha Sabadu (31/03) liu ba.

Nia rekunyese katak laos Fretilin mesak mak funu, maibe ema hotu mak halo funo hodi ita ukun aan. “Se povu mak la apoiu no la fo ai han mai ami, ami mate mohu iha ailaran, tamba ne’e, la’os ema nain ida ka rua mak halo,” Lu-Olo deklara asuntu ne’e iha nia kampania ba da ruak iha Sub Distritu Maubise, Distritu Ainaro, Sabadu (31/03)

Nia esplika, funu hasoru invazores involve husi ema hotu ne’ebe maka koloka iha frente armada maka forsa FALINTIL, Frente klandestina husi povu, frente diplomatika ne’ebe mak defende rai no povu iha internasional, nune’e iha tinan 1999 interfet tama mai Timor-leste. "Ne duni laiha ema ida, inklu ita hosi Fretilin mak halo funu mesak, tanba ema seluk mos halo funu ba rai ida ne", tenik Lu-Olo.

Iha okaziaun ne’e, Lu-Olo informa, kuandu sai Prezidenti Republika, nia sei garante paz no estabilidade, nia sei la fahe povu ba Loromonu no Lorosa’e hanesan lider masimu balun halo iha krize 2006. Lu-Olo mos akuza hodi dun-matak katak“Iha tinan 2002, povu hili ona Xanana sai Prezidenti Republika, maibe fahe fali povu ida ne’e ba loromonu no lorosa’e, tamba ne’e, halo ferik no katuas no labaraik sira tenki ba tur fali iha lona hokos,” dehan nia.

Mari Alkatiri durante ne'e hamutuk ho vice Presidente Fretilin Arsenio Bano hatete katak Fretilin mesak mak halo funu, no ema seluk iha Timor laran ne tur kruza liman deit. Mari Alkatiri hatete fila-fila katak sira mak halo funu, enkuantu nia  aan rasik durante 24 anos hela iha Mocambique, hetan uma gratis hosi estado lori Timor nia naran, eskola to sai doutor iha universidade, han diak, hemu diak ho ossan governo Mocambique nian, no hakiak koelho iha uma, hodi haluha tiha Independensia.

Lu-Olo mos protesta farda militares ne’ebe uza husi Kandidatu Taur Matan Ruak hamutuk ho Xanana hodi hatudu liman fuan rua ba leten, Lu-Olo akuza katak "intensaun klaru ona katak atu halo ditadura, tamba sira nain rua (TMR ho Xanana) dehan kuandu hamutuk sei sapu rata (dasa)".

Militante Partidu sira seluk, hanesan ASDT, PDN (Partidu Dezenvolvimentu Nasional (PDN) mos deklara iha kampania Maubesi hodi fo apoiu ba Lu-Olo, Partisipa iha kampania ne’e make Prezidenti KOTA Manuel Tilman, Maria Do Ceu, Angelita Pires no Prezidenti Partidu Trabalista Angela Freitas, Reprezetante Bloku Proklamador Hermengildo ‘Kupa’ no selu-seluk tan.

Lu-Olo hakarak tur iha Palasiu Prezidenti ne’ebe la mai husi rejultadu ameasa, manipulasaun no manobra.


Mais tuir Clementino Simenes, sidadaun ida hosi Laga katak "Lu-Olo rasik haluha katak nia militantes sira ameasa no baku militantes CNRT ho apoiantes Taur Matan Ruak nian iha Baucau, Watolari ho fatin seluk tan". Fretilin ida Lu Olo ho Mari Alkatiri lidera ne'e "halo violasaun barak no halo atakes pessoais ba kandidatu seluk, maibe sira haluhan aan tiha, katak sira mak fonte instabilidade iha Timor", tenik Clementino.

Clementino garante katak, povo Laga sei fo konfiansa nafatin ba Taur Matan Ruak, atu bele manaan no sai Presidente da Republika 2012-2017 (Ver).