terça-feira, 12 de abril de 2011

Dezenvolvimento Supply Base Hodi Fasilita Industria Minarai no Gas: Guverno seidauk halo konsultasaun no koodenasaun ho komunidade sira iha Distrito Covalima

Sexta-Feira, 08 April 2011


Dili, 07-04-2011

Diretur Luta Hamutuk "MERICIO AKARA" hateten Industria Supply Base/baze de apoio nudar parte ida husi pratika ba preparasaun kondisaun Timor-Leste hodi partisipa iha industria Petroleum. Preparasaun nebe mak Governu hala’o hodi simu Industria Petroleum mak hanesan:  Governu  hala’o ona estudo konseptual ida hodi harí Industria Supply Base, Estudo ne’e hala’o husi Sekretario Estado Rekursus Naturai (SERN).  Bazeia ba SERN nian estudo identifika ona fatin hodi harí Industria Supply Base; Industria Supply Base sei harí iha area Suku Camanasa entre Aldeia Fatuisin no Aldeia SamFuk.

Direetur Luta Hamutuk "Mericio AKARA" mos hateten katak prosesu estabelesementu Industria Supply Base tuir planu Sekretario  Estado Rekursus Naturais (SERN) komesa atu hadia Aero Portu iha Distritu Covalima no Ekipa tekniku husi Sekretario Estado Rekursus Naturais (SERN) rasik hala’o ona survey hodi sukat fatin hodi harí Industria Supply Base inklui mos atu harí Portu. Industria Supply Base ne’e hala’o hodi garantia partisipasaun Timor-Leste iha Industria Petroleun nian no mos parte ida hodi apoia Industria Petroleum nian iha Tasi Timor no mos garante pipeline bele dada mai Timor-Leste.

Estabelesementu Industria Supply Base sei harí iha Distritu Covalima, bazeia ba monitoramentu nebe mak hala’o husi Luta Hamutuk, Industria Supply Base ne’e sei okupa rai hectares 400, signifika Industria ne’e sei okupa area husi Suku rua nia mak hanesan Suku Suai-Loro no mos Suai-Camanasa. Monitoramentu ne’ebe hala’o husi ekipa Luta Hamutuk liu husi intervista direita ho Autoridade Lokal iha Distritu Suai mak hanesan : Xeve Suku Suai Loro, Xeve Aldeia Fatu isin-Suku Camanasa no mos Pontu Focal Luta Hamutuk husi Suku Camanasa. 

Rezultadu Monitoramentu
Bazeia ba rezultadu monitormentu no mos observasaun nebe hala’o husi Institutu Luta Hamutuk, bainhira halo intervista ho Autoridade lokal (husi Suku Suai Loro, Suku Camanasa Aldeia FatuIsin no SamFuk) realidade hatudu katak:
  1. Bazeia ba rezultado Intervista ne’e Autoridade Lokal sira no mos Pontu Fokal Luta Hamutuk iha Suku Camanasa no Suku Suai Loro hateten katak Sekretario Estadu Recursu Naturais (SERN) nomos Sekretario Estadu Formasaun Professional e Emprego (SEFOPE) hala’o duni sosializasaun iha Distritu Covalima konaba Industria Supplay Base, maibe sosializasun nebe mak hala’o la involve komunidade husi Aldeia Fatuisin no mos Aldeia SamFuk. Lider Lokal hirak ne’e informa katak husi parte SERN la konvida Komunidades hodi partisipa iha sosializasaun ne’e. No SERN konvida deit ema nebe mak SERN identifika hodi partisipa  iha Sosializasaun ne’e.
  2. Maske Distritu Covalima sai centru baze de Apoiu/Supply Base  maibe to’o agora komunidades rasik seidauk intende didiak saida mak Baze De Apoio/Supply Base, no supply Base ne’e atu tau saida. Autoridade Lokal sira mos kestiona sosializasaun nebe mak husi Governu (SERN) halao, tanba SERN la esplika didiak sa benefisiu mak Komunidades Suku rua ne’e bele hetan husi Industria supply base/Baze de Apoio ne’e. Bainhira ekipa husi Sekretario Estado Recursu Naturais (SERN) ba sukat fatin harí Supply Base, la husu ba tos no  natar nain nebe mak sira nia tos no natar tama iha area Industria Supply Base ne’e.  

Direturi Luta Hamutuk "Mericio AKARA" hato'o mos opiniaun husi Luta Hamutuk:  
Bazeia ba rezultadu monitorisazaun ba prosesu estabelesementu industria Supply base iha Distritu Suai Luta Hamutuk hato’o pontus importante nebe presija konsidera. Pontus konsiderasaun mak hanesan tuir mai ne’e: 
1.     Bazeia ba rezultadu monitoramentu Luta Hamutuk konsidera katak Governu seidauk iha kooperasaun no koordenasaun nebe diak ho Autoridade Lokal sira iha area refere, bainhira halo sosializasaun ba komunidade sira. Tanba ne’e Governu Liu Husi SERN presiza halao Sosializasaun nebe mak diak no involve Komunidades sira nebe mak hela besik iha area ba Industria Supply Base nian ne’e, no SERN tenke fo esplikasaun didiak sa benefisiu no dezafiu mak komunidades sira hetan bainhira harí Indistria Supply Base ne’e.
2.     Bazeia ba rezultadu monitorizasaun Luta Hamutuk konkluza katak prosesu harí Supply Base seidauk lao ho diak, tanba SERN seidauk involve komunidade nebe mak sei hetan impaktu direita husi industria Supply base ne’e iha prosesu sosializasaun iha baze.
3.   Institutu Luta Hamutuk husu ba Governu liu husi Secretario Estado Rekursu Naturais (SERN) presiza kria ekipa negosiator ida hodi haforsa prosesu sosializasaun ba komunidade sira no mos Secretario Estado Rekursu Naturais (SERN) presiza akumula opiniaun/Input husi parte komunidade sira nebe hela iha fatin refere (Suai Loro no mos Suai Camanasa), nune’e bele identifika meus hodi rezolve preokupasaun husi komunidade.

Sem comentários:

Enviar um comentário