JOSEFA PARADA – SUARA TIMOR LOROSAE – 10 marsu 2011
DILI - Komisaun I asuntu Etika no mandatu Parlamentu Nasional (PN) liu husi relatoriu pareser rekomenda ba plenaria hodi “salva” Vise Primeiru Ministru, Jose Luis Guterres, husi suspensaun, bainhira seidauk desizaun definitive husi tribunal.
Membru Komisaun I asuntu Etika no mandatu deputadu, Joaquim Amaral, hatete relatoriu pareser nebee Komisaun I rekomenda ho nia konteudu atu labele fo suspensaun ba Vise PM Jose Luis Gusterres. Rekomendasaun nee hanesan apresiasaun ba desizaun suspende nebe sei deside liu husi sesaun plenaria. “Maibe seidauk bele debate rekomenasaun nee iha plenaria, no sei adia ba primeira semana fulan Abril mai,” hatete Joaquim ba jornalista iha uma fukun PN, Tersa (8/3).
Deputadu Joaqium esplika, komisaun I foti desizaun ba dokumetnus sira nee ho rekomendasaun ba plenaria la bele suspende Vice PM, Jose Luis, durante seiduak iha desizaun definitivu husi tribunal Distrital Dili.
“Nee maka konteudu fundamentu pareser nebee Komisaun I rekomenda, maibe ida nee mos laos desizaun final husi Komisaun nian. Komisaun halo servisu tekniku no rekomenda ba plenaria no liu husi sesaun plenaria hanesan orgaun nebee aas maka sei foti desizaun politika hodi dehan suspende ka lae,” tenik deputadu Joaquim.
Deputadu Fretilin nee komenta Komisaun I la bele suspende Vise PM nee hodi hein desizuan definitivu husi tribunal kona ba pena prizaun. Tuir Konstituisaun hatete kuandu pena prizaun tinan 2 ba leten, otomatikamente suspensaun bele efetivu. “Maibe hanesan hau dehan plenaria mak orgaun politiku bele foti desizaun kontrariu, tan ba demokrasia nee maka sei lao iha plenaria,” akresenta deputadu Joaquim.
Nunee mos Sekretaria Meja PN, deputada Maria Terezinha Viegas, hatete iha relatoriu pareser nee haree ba karta ho dokumentus nebee tama no baixa ba Komisaun I. Karta nee husi Prokuradora Jeral Republika, ho Primeiru Ministru nebee entrega ba PN iha Setembru 2010. Maibe tan ba karta sira nee konfidensial no haruka ba Prezidenti Lasama la prosesa.
Deputada Terezinha Viegas akresenta mos iha loron 2 Marsu liu ba Vice PM, Jose Luis ba tribunal hodi atende pedidu tribunal nia tuir alegasaun tribunal nian, maibe iha tribunal juiz sira husu konaba karta suspensaun husi PN. Ho nunee tribunal mos haruka karta ba PN hodi husu suspensaun ba Vise PM Jose Luis.
Nia hatutan iha relatoriu pareser Komisaun I halo rezumu hodi haree ba tempu Vice PM ba hatan fali iha tribunal sei kleur, dokumentu balun maka deputadus sira seidauk hetan no sei distribui ba deputadus sira estuda. “Tan ba nee, fo tempu ba deputadu sira hodi apresia karta husi Prokuradora Jeral Repub lika, maka foin halo andamentu ba diskusaun. Maibe laos PN lakohi halo debate, deputadu sira hakarak justisa nee tenke tau iha fatin no knar deputaduds sira maka halo lei,” salienta deputada Terezinha Viegas.
Fatin hanesan membru PN Bankada CNRT, Natalino dos Santos, hatete PN iha nian knaar atu bele hasai Vise Primeiru Ministru, Jose Luis Guterres nia imunidade, maibe depende ba intrepretasaun.
Iha relatoriu Komisaun I PN nian ho pareser laiha suspensaun ou la autoriza Vice PM, Jose Luis. “Maibe ida nee la signifika katak Komisaun i nia relatoru atu taka dalan labele hasai imunidade. Tanba julgamentu sei adia ba 11 Abril mai, bankada hotu husu suspende provizoriumente diskusaun hodi fo tempu ba membrus governu halao nia servisu,” deklara deputadu Natalino.
Agora dadaun tenik Natalino, Vice PM asumi hela kargu PM Interinu, no mos deputadu husi AMP mos husu adia tan ba ema hotu sempre respeitu ou menjunjung asas praduga tak bersalah, tan ba kazu nee foin maka prosesu akuzasaun.
PN katak Natalino sei diskuti fali iha loron 1 to 2 Abril mai nee hodi bele autoriza Vise PM ba tuir prosesu julgamentu. Maibe koalia konaba suspensaun laos knaar PN nian, maibe knar PM, Xanana Gusmao nian.
Parte seluk, Juiz Prezidenti, Joao Ribeiro, liu husi prosesu Julgamentu, deklara adiamentu prosesu julgamentu ba Vise PM, Jose Luis Guterres, tan ba Parlamentu Nasional (PN) seiduak hasai nia imunidade. arm/pri
