Jose Luis Guterres Livre, Fretilin Dehan Tribunal Bosok, PD-CNRT - PSD Husu Ana Pessoa Rezigna a’an

Josefa Parada - Tersa, 10 Maiu 2011 - SUARA TIMOR LOROSAE

DILI- Tribunal Distrital Dili (TDD) horseik hamonu dezisaun livre ba Vice Primeru Ministru (VPM) Jose Luis Guterres. Maibe iha uma fukun Parlamentu Nasional (PN) representante povu husi bankada Fretilin sira duvidas ho dezisaun Tribunal nebe nakonu ho presaun no influensia husi membru governu no iha parte seluk deputadu bloku Aliansa Maioria Parlamentar (AMP) husi PD, CNRT ho PSD husu ba Prokuradoria Jeral republika Ana Pessoa atu rezigna a’an.

Konaba prosesu ne’e, hatete VPM Jose Luis Guterres katak nia sei husu indiminizasaun, primeru nia sei koalia no konsulta ho ema tomak nebe akuzadus desde embaisador Joao Cambra no sel-seluk nebe akuzadu tiha maibe Tribunal hasai tiha sira hanesan akuzadus husi PGR hanesan MNE, Direktur Administrasaun.

“ Sobre kazu ne’e katak hau sei atu husu pedidu indiminizaaun i lae hau hakarak hatete katak primeru hau sei koalia no konsulta ho ema tomak nebe akuzadus tamba ne’e ami sei hare ba mai estadu maka sei indiminiza ida ne’e,” hatete VPM Jose Luis ba STL iha Palacio do Governo, Tersa (10/5).

Iha parte seluk, tuir Xefi Bankada Fretilin Aniceto Longuinhos G. Lopes komenta katak husi Fretilin preokupa antes, tamba kuandu Tribunal julga membru governu ida no Parlamentu la halo suspensaun ne’e buat ruma bele mosu iha Tribunal neba afavor ba kombate korupsaun. Tamba bele mosu presaun ka influensa oi-oin ba juisa nebe kaer kazu ne’e. Nia dehan, tuir Mari Alkatiri, Tribunal ne bosok, lalika fiar ida. Mari Alkatiri la fiar tanba sa mak Tribunal bele bosok nune. Tanba ne Mari sei husu ba Ana Pessoa hodi halo Rekursu.

“ Hau iha duvida ba dezisaun ida ne’e dezisaun ida nebe nakonu ho presaun no influensia husi membru governu, dezisaun ida mai husi juis internasional nebe depende ba kontratu nebe governu tenki halo laos imposibel membru governu ne’e uja nia kargu amiasa ka presaun ba juis ne’e atu tesi lia ne’e tuir sira nia hakarak,” dehan Aniceto.

Nune’e Deputadu PD, Adriano do Nascimento komenta katak ne’e hatudu juis sira halo buat ne’e imparsial ho profesionalismu tuir Adriano ne’e buat diak. Ida ne’e mos dehan Adriano katak fo lisaun ida ba politiku sira nebe gosta politiza no gosta hatun ema nia dignidade katak dun matak ema ne’e la diak no ida ne’e mos hatudu ba Prokuradoria Jeral Republika hanesan instituisaun Ministeriu Publiku katak buat ida politika ne’e labele domina fali iha justisa ninian.

Nia mos hatete katak Mari Alkatiri ne manipulista ida. Kuando Tribunal deside tuir nia hakarak, nia nonok, maibe kontra nia hakrak, pasti Mari komesa dun tun dun sae ona.

“Hanesan deputadu ami (Re: Adriano Nasimento) labele, ne’e depende ba ninia a’an rasik atu tuntut nama baik i lae maibe buat nebe PN bele halo li-liu AMP halo maka ne’e husu ba PGR Ana Pessoa diak liu para deit ona rezigna a’an tamba kazu ne’e hatete katak logika politika maka dumina duke logika legal ninian nebe sei lae istituisaun ida MP ne’e ema la fiar tamba ne’e husu mos ba Presidente Republika hare dalan para salva MP sei lae MP hakarak kazu politiku duke kazu kriminal nasaun ne’e lao kadik ona, ”tenik Adriano.

Iha fatin seluk, reprezentante Fretlin Mudansa, Victor da Costa hatete katak Fretilin Radikal halo manipulasoens oin oin hodi hatuun Jose Luis Guterres nebe mos hanesan lider Fretlin Mudansa. " ami sei la hakiduk tanba Mari Alkatiri mai ho pollitika foer no bosok hosi Mocambike, nebe hakarak hadau poder. Povo lalika fiar ema sira nune, uma lulik laiha, hakarak mai domina Timor". Jaime do Rosario