STL: Governu Halao Sorumutu Ho Xefi Suku 442

Segunda, 27 Dezembru 2010 - 14:49:11 OTL


Posting Husi : Josefa Parada

DILI- Ministeriu Administrasaun Estatal Ordenamentu Teritoriu (MAEOT) halao sorumutu ho Xefi Suku sira iha Timor Laran tomak, hodi hato’o programa annual MAEOT nomos rezultadu implementasaun programa sira nebe lao tiha ona durante tinan ne’e.
Director DN-DLOT Miguel Pereira de Carvalho, iha nia aprezentasaun hateten rezultadu husi programa sira hanesan Projetu Pakote Referendum (PPR), Planu Dezenvolvimentu Dezentralizasaun (PDD) no programa seluk tan nebe halao iha Suku hotu iha Timor laran finalize hotu maske iha sukus balun nebe nia implementasaun sei paradu hela.

Nia hatutan, sira iha tan programa seluk nebe sei halao iha tinan oin, hanesan PDS ka Planu Dezenvolvimentu Suku, tamba ne’e nia iha esperansa katak ho planu no programa sira ne’e bele iha benefisiu ba povu sira.

“ rezultadu husi planu sira nebe halao tiha ona durante tinan ne’e, finalize hotu ona iha suku laran, maske iha suku balun ninia implementasaun seidauk 100%, maibe iha suku balun mos hetan ona 100%,” dehan Miguel, liu husi nia deskursu aprezentasaun rezultadu programa sira nebe halao tiha ona iha suku laran, iha sentru Convention center, eis Merkado Lama, Segunda (27/12)
Iha sorumutu nebe halao ho xefi suku hotu iha Timor laran, halao mos deskuasaun konaba planu dezenvolvimentu suku (PDS). Iha diskusaun ne’e, xefi suku sira hato’o sira nia preokupasaun liu-liu ba programa sira nebe halao tiha ona, hanesan PDD no PPR.

Xefi suku Tilomar, Edinho hateten nia rasik sei konfuzaun ho proposta sira ne’e, tamba dala barak iha projetu barak nebe halao iha Suku la iha konhesementu husi xefi suku sira, no xefi suku sira sai hanesan simbolu deit.

Tamba ne’e, nia husu ba governu sentral, atu fo poder (kekuasaan) ba asembleia distrital sira atu kontrolu projetu nebe halao iha suku laran. Sorumutu ne’e halao entre MAEOT hamutuk ho xefi suku 442 iha Timor laran tomak. Josefa parada