CIJTL: “Sistema justisa Timór Léste Iha Risku”

Terça-feira, 28 de Dezembro de 2010

.
Written by CJITL - Tuesday, 28 December 2010

CJITL flash, Durante tinan 2010 nia laran, Justice System Monitoring Program - JSMP observa katak iha esforsu maka’as hodi hari’i sistema justisa ne’ebé forte no asesivel ba ema hotu, maibe JSMP nota mos prátika ka aktu polítik balun ne’ebé JSMP konsidera prátika ne’ebé bele hamosu potensia atu minimiza esforsu koletiva hodi hari’i no hametin sistema justisa ne’ebé kredivel no fo fatin ba ema hotu.

Ida ne'e nota komunikadu imprensa, ne'ebe JSMP haruka ba redasaun CJITL via email foin lalais ne'e iha Dili, Timor Leste.

“JSMP konsiente no konvensidu katak sistema justisa nu’udar pilar determinante ba prosesu hari’i nasaun, Tanbá ne’e JSMP enkoraza ema hotu atu respeitu dignidade instituisaun judisiariu sira no hatu’ur instituisaun justisa iha nia fatin no respeita sira nia soberania hodi fo fatin ba sira atu ezerse sira nia papel ho dignidade no kbi’it ne’ebé mai husi Konstituisaun no lei sira seluk nune’e bele lori justisa ba ema hotu” Hateten Komunikadu ne'e.

Tuir JSMP katak Progresu balun ne’ebé ita atinzi dadaun mak hanesan; Aspeitu rekursu umanus, oras ne'e dadaun Timor Lese iha Númeru juizes aktual hamutuk na’in 14 no juizes estajiadu nain 4, total hamutuk nain 18.

Ministériu Públiku, númeru aktual hamutuk ema nain 13 no estajiadu na’in haat hamutuk nain 17.

Defensoria Públiku; númeru aktual na’in 11 no estajiadu hamutuk nain 5, total na’in 16.

Total númeru autór judisiariu agora hamutuk 51.

Advogadu privadu sira ne’ebé tuir hela prosesu perparasaun ba formasaun judisiariu hamutuk nain 16, ho kompozisaun feto ida, mane 15.

Formasaun segundu faze ba preparasaun formasaun ba advogadu privadu hamutuk nain 39, feto nain 18, mane nain 21.

Aspeitu lejislativu; Lei Kontra Violensia Domestika hetan aprovasaun no promulga iha Juñu 2010, (maske lei ne’e sei presiza iha tan polítika no planu nasional atu implementa; Lei Kodigu Sivil sei diskuti iha Meja Komisaun A, Lei kona-ba Apoiu Judisiariu sei iha prosesu elaborasaun iha Ministériu Justisa;

Aspeitu Infraestrutura no Komunikasaun; JSMP observa katak iha ona rezidensia permanente ba autor judisiariu sira hotu iha nivel jurisdiksaun hot-hotu, hanesan iha Baucaua, Suai, Oecusse.

Iha semana kotuk Rezidensia ba Majistradu Ministériu Públiku iha Suai nian foin inagura iha semana kotuk.

Oras ne’e dadaun komesa ona instala sistema IT iha tribunal no ministeriu publiku; Dezeina ona sistema jestaun kazu iha Gabinete Prokurador Jeral nian, Harii ona Ministériu Públiku nivel distrital nian.

Aleinde progresu hirak ne’e, JSMP mos preokupa katak sei iha nafatin práktika no aktu polítiku balun ne’ebé ami konsidera katak la refleta esforsu koletiva no planu nasional hirak ne’e.

Prátika polítiku balun ne’ebé la manifesta vontade polítiku atu respeita prinsipiu estadu de direitu, separasaun poder, igualidade iha lei nia oin, integridade no independensia instituisaun judisiariu.

Refleta ba realidade faktu sira iha leten, JSMP mai ho konkluzaun hipoteza ida katak sistema justisa iha Timór Léste sei nafatin iha risku nia laran durante periodu tinan 2010. (*/CJITL)
.