FH: Dilema CNRT konaba kandidatus Presidensial 2012

.

F©RUM HAKSESUK - Editorial

Iha loron 7-8 Fulan Janeiru tinan 2012, Partido CNRT sei halao ninia konferensia ba dala uluk, hafoin halo kongresso iha fulan Abril tinan 2011. Nudar Partidu bot no lidera husi lider historiku, merese atensaun husi sosiedade Timor-Leste. Tamba partidu CNRT ninia decisaun influensia no determina ba futuru Nasaun Timor-Leste. Maibe atensaun sei centra liu ba posisaun politika nebe maka partidu CNRT sei foti hodi suporta ka lae kandidatus ruma ba eleisaun Presidensial 2012.

Mosu opsaun oi-oin, CNRT deklara abertamente suporta ba kandidatura ruma. CNRT fo liberdade ba ninia militantes atu fihir nudar ninia konsekuensia. Posibilidade seluk, fo suporta ba kandidatura neebe independente. Ikus liur fo suporta ba kandidatura husi partidus politikus ruma.

Dalan ka opsaun hotu-hotu nakloke hela, maibe kuelker decisaun sempre iha ninia vantajem no desvantajem. Se CNRT apoio abertamente kandidatura independente, sa kontratu politika maka CNRT bele halo ho kandidatu nee rasik. Se suporta ba kandidatu husi partidu, sa kontratu politika maka CNRT bele hetan.

Problema ba CNRT nudar partidu bot maka nee, koncentra liu ba lejislativa. Bele ukun ka lae. Tamba tendencia eleitoradus oras nee dadaun, hatudu katak sei la iha partidu ida maka sei manan maioria absoluta no sei la iha partidu ida maka sei ukun mesak. Dalan ba koligasaun maka dalan nebe nakloke ba partidus bot sira. Se CNRT maka la hetan maioria absoluta tuir meta nebe maka estabelece, hahu oras ne dadaun buka desenvolve ona komunikasaun politika. Hahu ho posisaun CNRT atu inklina no suporta ba kandidatura ruma. Se inklina ba kandidatura independente, iha ninia vantajem no desvantajen. Se inklina ba kandidatura partidu, iha mos ninia vantajem no desvantanjem.

Terceira Via ka dalan klaran ba partidu CNRT no hodi hanoin ba lejislativa no forma Governu, diak liu husik ba militantes sira, hili no fihir ba kandidatus nebe tuir sira ninia konsciencia rasik.

Ita hein hodi hare!

Dili, 05.01.2012

Editorial Forum Haksesuk