”PM Xanana Inagura Eletrisidade Baucau - Passo ida tan Ba Dezenvolvimento”

Jornal Timor Post - Kuarta-feira, 28 Dezembru 2011

Primeiru Ministru Xanana Gusmao hateten, eletrisidade importante ba povo tomak, tamba ho eletrisidade saida mak ita hakarak produs iha rai laran ita bele ona.

“Ho eletrisidade neineik-neineik saida mak ita hakarak atu produs hodi evita sasan mai husi rai liur, importante mak governu hare katak, ho partisipasaun parlamentu tamba sira mak aprova osan,” PM Xanana haktuir iha Serimonia inagurasaun eletrisidade sub estasaun, Sesta (23/12) iha Gimnaziu Baucau.

Iha okaziaun neé mos, xefi do Governu hatoó agradesementu ba kontribuisaun komunidade neébe oferese nia ai-horis hodi harii tore no ai riin eletrisidade, se kompara ho eis ministru balun iha capital Dili neébe lakohi fo ninia kintal hodi hari poste.

“Kaer konstituisaun RDTL dehan, neé dereitu, ami hakruuk ba konstituisaun, dehan ba eis senor Ministru neé, ami halo liu tiha, mais laiha buat ida, ida neé hatu hatudu katak, bainhira ita ukun an tiha ona, ita iha direitu maibe iha mos dever,” xanana informa iha nia deskursu.

Nia dehan tan, riku soin neébe mak iha Timor-Leste iha benefisia ba povu laos ba ema balun deit, tamba neé estadu maka iha obrigasaun atu jere didiak riku soin neébe iha hodi fo benefisiu ba povo.

Xanana dehan, atu halo dezenvolvimentu tenke hare saida mak importante ba povo, labele halo buat ida dala ida deit, maibe eletrisidade importante.

Ho inagurasaun neé, xanana husu ba povu atu uza eletrisidade laos ba naroman deit, maibe halo netik negosiu,tekniku no karpintaria ruma no buat seluk.

Xanana mos promote katak, governu neé kontribuisaun ba povu atu selu.

Tuir obesrvasaun Jornalista, molok PM Xanana hatoó nia deskursu, dala uluk liu PM xanana hamutuk ho membru Parlamentu nasional, autoridade local, populasaun no reprejetante Igreja katolik, ba iha sub-estasaun hodi buti butaun enerjia eletrisidade nian hatudu katak oliu pezadu funsiona durante 24 oras hodi fo naroman ba povo.

Maibe, iha serimonia inagurasaun neé balun lakontenti ramba, udan boot durante loron ida tomak, neébe halo dalan ba sub estasaun rai dodok, maibe komitiva PM obriga ba toó duni iha fatin refere hodi buti butaun energia eletrika.