Konsolidasaun Partidu CNRT iha Aldeias Buibela/Lenaa, Atu Hametin estrutura Iha Baze

Tuesday, 19 July 2011 16:44 Written by Pedro Delfim

Afoloicai- Partidu Kongresu Nasional Rekontrusaun Timor Leste (CNRT) ho Kbi’it tomak hodi realiza konsolidasaun Partidu nian iha Aldeia Buibela no Lena, Suku Afaloikai Sub-Distritu Baguia Distritu Baucau hodi hametin estrutura Partidu nian iha nivel Aldeia.

Tuir Sekretáriu Jeral Partidu Kongresu Nasional Rekontrusaun Timor Leste (CNRT) Dionísio Babo, partidu CNRT sempre nakloke no namkari iha fatin-fatin, maske iha suku ne’ebé ijoladu tebes maibe ita ho esforsu an tomak hodi hakat ba to’o iha Matebian nian hún ne’e tamba fatin ne’e mos hanesan fatin Istória.

“Prezensa Partidu CNRT nian iha fatin ne’e signifika katak iha valor importante tebes ba partidu CNRT tamba iha foho Matebian nian ne’ebé uluk baze apóiu hahú husi iha foho Matebian ne’e nomos ema barak mak lakon sira nian vida iha foho Matebian ”dehan Babo iha Palácio Do Governu Tersa (19/07).

Iha parte seluk hanesan Koordenador Partidu CNRT Sub-Distritu Baguia Luis de Oliveira hateten ba STL katak Mitante no simpatizante sira partidu CNRT nian mai hamutuk iha Aldeia Lena hodi kumpri programa partidu nian tamba Aldeia Lena sai mos hanesan fatin istória ba Povu Timor Leste.

“Partidu CNRT nakloke ba ema hotu atu bele tama no partidu CNRT mos la taka dalan ba ema atu sai husi partdu CNRT no atu hili partidu ida tuir ida-idak nian direitu atu skolla partidu ne’ebé deit mak nian atu hili no atu bele ukun rai ida ne’e”dehan Luis.

Nian mos informa tan katak maske Timor Leste foin mak ukun  an maibe iha Partiodu politiku barak mak agora dadaun iha ita nian rai la signifika sira ne’e atu kaer ukun hotu maibe defende ba iha idak-idak nian programa atu nune povu bele hili sira tuir sira nian programa partidu nian.

Iha parte seluk Militante Partidu CNRT Leopoldo Pinto hateten ba STL katak konsolidasaun Partidu CNRT iha Aldeia Lena atu hametin estrutura partidu nian iha nível aldeia atu nune’e bele garantia ba iha eleisaun jeral 2012.

“Ho konsolidasaun ida ne’e hau fiar katak iha Suku Afolikai Partidu CNRT sei manan maiória tamba Partidu CNRT forma ona nian estrutura iha Suku Afolikai no mos to’o iha Aldeia”dehan Leopoldo.