Konsolidasaun Partidu CNRT Iha Motael “Xanana Gusmao: Ema Dehan Ita Supermi No La Hatene Ukun”

Notisia Husi TVTL - Sabadu Kalan, 03 Marsu 2012

Prezidenti partidu CNRT Xanana Gusmao husu ba militante no simpazitante Partidu CNRT atu labele monu ba provokasaun durante kampania Prezidensial.

Partidu CNRT sabadu Semana ne’e hala’o konsolidasaun no rezjustamentu ba estrutura Partidu CNRT iha Suku Motael Distritu Dili ho Tema “ADEUS AMP BEMVINIDO CNRT” hafoin remeta tiha tomada de posse ba strutura, Prezidenti Partidu CNRT husu ba Militante sira atu kontinua mantein estabilidade no paz hodi labele monu ba iha provokasaun durante kampania Prezidensial.

“Hau rona buat ida hamnasa sira mos tenki hamnasa, labele ho vilensia para povu tomak bele goja, povu mos bele senti iha duni hadia ba ita nia moris,” deklara Xanana Gusmao.

Prezidenti Partidu CNRT mos deklara ba militante sira katak, Partidu CNRT hanorin militantes atu respeita ema seluk hodi kaer metin prinsipiu demokrasia, la’os ukun atu hadau malu ho kadeira.

“Atu prova katak, matenek oinsa mos dehan ‘Supermi de’it’ ita hakarak kaer supermi ita halo, mais hau lakohi koalia barak, se lae sira dehan ita Supermi, se lae sira dehan ita fehuk midar, ema barak hakarak ita atu rahun tiha hodi manan buat seluk, se ita lahatene hatudu katak ita lahatene ukun aan, ita lahatene kaer prinsipiu demokratiku ho diak, ema sira ne’e hamnasa, hamanasa, sira sei mosu fila fali iha ne’e para la halo buat ida, manan deit osan, hodi hatudu mai ita katak Timoroan beik teen, lahatene ukun,” deklara Xanana Gusmao.

Durante konsolidasaun no rejustamentu strutura partidu CNRT, Militante husi Partidu Demokratiku (PD) no mos kordenador Partidu FRETILIN ofisialmente deklara hodi afilia ba Partidu CNRT atu servi ba prosesu dezenvolvimentu nasional.

.