Hatutan Lian Materna: Hatan Mestri Ida Ba Amo Martinho Gusmao
Husi Estanislau S. Saldanha
Obrigadu wain ba Amo Martinho nia resposta ba hau nia komentariu. Husi nee, hau mos hakarak hatoo komentariu badak ida.
1. Amo tau aas tebes hau nudar profesor, halo hau orguilu tebes. Maibe nee mos halo hau sai kiikuan tebes tanba hau nia kualidade laos profesor. Hau seidauk halo publikasaun sientifiku barak hodi hetan titulu prestiziu nee, maske ema hotu hanorin iha universidade hakarak titulu nee, inklui mos hau. Hau tenki onestu ba hau nia aan ho ema seluk.
2. Ita bo’ot simplifica demasiadamente questão iha fundo, hanesan bahasa Indonésia dehan “semudah membalik telapak tangan”. Hau la simplika no pelu kontrariu hare problema lian materna nee ho seriu. Tanba nee, hau buka referensia oituan husi estudu kazu sira iha nasaun seluk, ho observasaun pesoal hau nian hodi argumenta uza lian materna nee diak ba labarik sira foin hahu eskola, iha fatin nebee labarik sira nia lian inan laos lian ofisial ka lian maioria. Maske nunee, hau sempre advoka katak atu implementa lian materna hodi hanorin iha Timor laran tomak, ita presiza estudu. Pilotu lian materna nebee ME & UNESCO halo iha fatin ho eskala limitadu nee hanesan metodu sientifiku ida atu ita bele hare ho avalia nia metodu, prosesu ho rezultadu, diak ka lae? Karik diak bele hatutan, se ladiak bele review fali.
3. Ida uluk, ... ita boot dehan “fasilita aprende konseitu báziku”, maibe iha tempo hanesan ita boot dehan fali “lian materna laos atu sai lian sientifiku”. Los duni, lian materna uza hanorin ka fasilita labarik sira foin hahu eskola hodi komprende konseitu baziku ruma no aprende lian seluk. Dezafiu boot ba labarik sira bainhira la hatene lian ofisial hodi aprende kedas ho lian ofisial. Tenki iha meius tranzisaun hodi sai ponte aprende konseitu baziku ho lian seluk. Funsaun lian materna nebee hau temi iha nee mak nee. Materia iha lian seluk estruturadu ona, no transfere kontiudu materia sira nee via komunikasaun oral uza lian materna. Lian materna mos iha nia estrutura rasik nebee balu seidauk dokumenta ho publika. No labarik sira foin hahu eskola seidauk too tempu atu aprende konseitu sira kompleksu ho termu ida aas tanba sira barak seidauk hatene lee ho hakerek. Iha faze nee, intensaun uza lian materna laos iha nivel sientifiku komplexu ho avansadu hanesan mensiona iha amo nia artigu.
4. Tuir mai ita boot hakerek, “lian China, Arábia, Índia ho Japaun dezenvolve siensia iha sira nia lian rasik”. Maibe, hau hanoin, lian hirak nebé ita boot temi ne’e iha ninia “estrutura gramática”, semiologia (fonética no fenomenologia), depois semiótica (semântica, sintaxes no pragmática). Hau hanoin lian materna mos iha nia estrutura, gramatika, ortografia ho fonetika, maske seidauk dokumenta ho publika barak. Nee la signifika katak lian materna la iha buat sira nee. Hanesan hau temi iha leten, labarik sira foin hahu eskola metodu hanorin via komunikasaun oral ho audio-vizual mak barak liu. Mestri sira bele transfere konseitu bazika ho aprende lian seluk uza lian materna. Nunee iha faze inisiu seidauk bele fo enfaze ba aprende estrutura gramatika ho semiolojia komplexu hanesan amo temi. Maske nunee, ho tempu ita sei too iha nebaa.
5. Tuir mai, ita bo’ot dehan “la presiza rekruta mestri fo’un tamba mestri sira nebée iha, hatene lian materna. Nunee sira bele hanorin”. Ne’e katak, Nau’eti hanorin Nau’eti, Macassae hanorin Maçasse, Uaima’a hanorin Uaima’a. La precisa estrutura gramática, semiótica no semiologia. Amo, labarik sira foin hahu eskola seidauk hanorin too nivel uza lian komputador nebee avansadu. Labarik sira presiza fraze simples no hatudu simbolu ho vizualizasaun mak barak liu. Tanba nee, hau fiar mestri sira bele hanorin uza lojika materia iha lian seluk, maibe artikula iha lian materna ho estrutura gramatika nebee sira komprende oralmente. Uza lian materna hodi esplika konseitu baziku ho sai meiu tranzisaun ba lian ofisial.
6. Se nune’e, lalika ba escola mak hanorin atu ko’alia lian materna, iha uma mos to’o too? Amo, pilotu nee atu uza lian materna hodi fasilita labarik sira aprende konseitu baziku ho aprende lian ofisial. Laos labarik sira mai aprende lian materna hanesan amo temi iha nee. Karik aprende deit lian materna iha eskola, hau konkorda ho amo. Maske nunee, labarik sira ba eskola iha signifikadu barak ka aprende buat barak nebee sei forma sira nia futuru. Forma labarik sira nia intelijesia, aspeitu kongnitivu, hahalok ho sensibilidade sosial iha ambiente diversidade ida ho sst. Dalang ida mak konvivensia (pergaulan) iha sala laran ho liur iha eskola.
7. “Matéria nebée iha bele uza dadaun hodi hanorin, naran halo tradusaun oral iha lian materna ba labarik hodi komprende”. Ha’u sublinha frase “naran halo tradusaun” ... hatudu katak ita boot la seriu nu’udar “scientist” no falta de “scientific ethos”. Los duni hau nia matenek hodi sai nudar “scientist ho scientific ethos” seidauk too, neduni hau hakarak aprende ho amo. Maibe hau hare amo nia “scientist ho scientific ethos” nee aas tebes, no ezizi nivel nee aplika iha vida labarik sira foin hahu eskola. Ezijensia ho injesaun aprosimasaun “scientist ho scientific ethos” nebee as ba labrik sira foin hahu eskola bele hamosu rejeisaun tanba sira la bele akapta ho adapta diak iha nivel nee.
8. Oinsa mak nu’udar professor ida, ita bo’ot “gampangan” dehan “naran halo tradusaun”? Se traduz sala karik, controla halo nusa? Referencia no “retrace” oinsa? Materia hanorin uza materia nebee iha lian seluk ka lian ofisial. Normalmente iha edukasaun iha prosesu avaliasaun regular hodi hare performansia mestri sira nian ho mos progresu labarik sira nian. Kuandu estudante performa diak, signifika estudante bele absorve materia hanorin ho diak, no mestri sira susesu ona transfere konseitu ba labarik sira. Bainhira mestri sira performa la diak, sei halo estudante sira la hetan progresu ka persepsaun konaba buat ida sala, foin ita hahu dehan iha buat ruma sala ka metodu hanorin balu sala inklui halo sala tradusaun. Husi avaliasaun nee mak bele halo revizaun hodi hadia metodu, ho prosesu nebee implika ba rezultadu diak. Tanba laos hanorin lian materna, avaliasaun nee tenki ba kontiudu materia nebee hanorin, maske avaliasaun nee bele halao iha lian ofisial ho standar ka padraun nasional. Tanba labarik sira aprende konseitu baziku ho lian ofisial dala ida hotu uza lian materna nudar lian fasilitador.
9. Dala ida tan, ita boot “gampangan” liu. Mestri sira ne’ebe iha ona ne’e, sira “inteira” matéria nu’udar “scientific” no hanorin tuir standard matéria sira ne’e, ka “obrolan warung kopi”? “Pratika iha fatin barak lao ona” ... iha nebé? Lospalos, Manatuto no Oecusse? Ka ita boot naran mehi de’it, ba buka experiência iha fatin ida hodi lori mai tidin de’it iha Timor Leste? Hau hanoin amo hatun rabat rai liu kualidade ita nian mestri sira. Sira durante nee iha ona meius hanorin sistimatiku, maske iha lian seluk. Nunee sira sei fasil adapta metodu nee hodi hanorin uza lian materna. Hanesan mos estudante sira iha universidade tinan nee, dehan sira face out ona bahasa Indonesia, no simu tomak Portugues. Maibe realidade hatudu estudante barak seidauk hatene diak Portugues, konseitu sientifiku iha Portugues barak sira la hatene, no ita tenki esplika fali iha tetun ka bahasa Indonesia foin sira komprende. Ida nee kuaze infrenta mos husi labarik sira foin hahu eskola, sira la hatene tetun ou Portugues, entaun kualia Portugues sira sei sai bibi malae hodi hateke ba fulan, no sira la hatene buat ida. Maibe bainhira ita esplika fali iha lian materna, sira sei komprende nia kontiudu. Amo hau la mehi ida, no hau kualia tanba hau hare ho observa realidade balu iha Dili, Uatulari ho Baukau. Hau mos kualia ho mestri sira balu iha Dili, Oekusse, Baukau, Lospalos ho Vikeke nebee hanorin iha jardin infantil ho eskola primaria. Ida nee izizi hau nia kuriozidade hodi hare metodolojia, prosesu ho rezultadu pilotu hodi forma hau nia “scientific ethos” ho baze nudar “scientist”. Tanba buat rua nee nesesita estudu ho argumentu sientifiku ho evidensia adekuadu, laos kualia mamuk.
10. DIT bele hatan ona! OK. Pergunta: eskola superior turizmu no hospitalidade ... atu “PERSERVA KULTURA” ho IDENTIDADE NASIONAL ne’e sei intensivamente halo “preservação” liu husi “siencia lingüística” ka ho dalan seluk? Oinsa mak “preserva cultura” ne’e wainhira direção ba turismo ne’e hatudu liu ba “industria turismo”, no la’os “literature”? Amo, ita kualia edukasaun mak ita kualia prosesu. Signifika katak ita iha uluk hanoin, buka estratejia ho rekursu hodi halao. Imposivel ita halo buat ida iha hotu fatin ka perfeitu kedas. Ami iha obsesi ba nee, dokumenta, hakerek ho publika. Maibe ita tenki prepara rekursu, liu-liu ema. Ami hahu ona, hanesan haruka estudante ho dosenti turizmu sira ba baze, kualia ho ferik katuas, sira identifika sira nia kultura. Balu hakerek ona sira nia teze ka skripsi foti aspeitu kultural sosiedade sira nian. Halo DIT Cultural Festival. Buat sira nee hotu hanesan pasu inisiu atu akomoda interese industria turizmu ho mos dudu ba produs literatura turizmu nian. Dala ida tan ita tenki respeita prosesu hodi asegura sustentabilidade. DIT iha rekursu limitadu, nunee la bele hakarak buat hotu la’o dala ida kedas, hanesan amo Martino hakarak atu ami nia eskola superior turizmu ho hospitalidade hatan ba ezizensia industria turizmu ho dezenvolve kapasidade “scientist” hodi produs literatura.
11. Ha’u hatan, Prof. Estanislau mak la nyambung. Tan sa? Tan ha’u ko’alia massacre ba labarik sira ka “mártir inocente”. Ne’e hanesan metáfora. La’os sentido próprio. Ida ne’e hatudu oinsa mak professor ninia proposição dehan “naran halo tradusaun” mosu ona, tan professor rasik “naran halo tradusaun” ba ha’u nia opinião. Afinal, se professor haré didiak ha’u nia artigo, ha’u ko’alia kona ba “psychology of developmental” (Jean Piaget no Lawrence Kohlberg). Amo, hau le buat nebee amo hakerek, hau laos lee buat nebee sei iha amo nia hanoin ka sei iha amu nia ulun. Ita baibain le sientista sira nia obras liu hosi livros ka jornal sira sientista nian, ita la hatene saida mak sira sei hanoin ka saida maka iha sira nia ulun, tamba nunka hetan ka hasoru malu ho sientista sira hotu. Tanba ne ita so limita deit interpreta saida mak sira hakerek. Iha etika hakerek sientifiku, ita tenki hakerek klaru ho suporta ho evidensia nebee diak hodi ema lee ho komprende. Nunee sei la hamosu interpretasaun lateral (ka interpretasaun tuir ida-idak nia gostu). Deskulpa, hau hare Amo la halo hanesan nee, tanba nee Amo dehan universidade sira iha Timor nee UN mak loke. Amo husu fali hau hodi interpreta buat nebee iha amo nia hanoin laran, ida nee susar tebes ba hau, no scientist puru sira mos sei la valoriza metodu hakerek nebee hamosu interpretasaun lateral. Deskulpa hau mak hanesan nee karik los, tanba, hau nia matenek seidauk too no kategorizadu hanesan “scientist” ida ho “scientific ethos” hanesan Amo nian.
12. Tuir matenek na’in 2 ne’e nia hanoin, labarik sira iha ensino básico (tinan 7–11) moris iha fase ida hanaran “concrete operational”, hahu sira nia scientific adventure, hanoin tuir lógica no bok ona “conceito básico”. Iha leten Professor dehan katak “lian materna la’os sientifiku”. So what? Iha tinan 3 nia laran, labarik sira hasoru mestri sira nebé “naran halo tradusaun”. Then what? Sira la iha base no la toman atu tama iha “concrete operational”. Então, liu tiha tinan 3, sira nia kakutak mamuk hela no hahu husi foun fali. Katak, tinan 3 nia laran “learning by playing ... for nothing”????. Hau hare Amo sala tan ona. Hau mensiona katak lian materna nee uza hodi hanorin konseitu bazika ho aprende lian ofisial seluk. Introdus konseitu bazika nee via halimar, laos hanesan metodu kualiah, ka seminar ka debate nudar “scientist” ho scientific ethos” nebee aas liu ba labarik sira. Iha metodu hanorin halimar nee simultamente hanorin ona kontiudu konseitu baziku nee. Hau nia oan ida eskola iha jardin infantil iha Nova Zelandia, rua iha jardim infantil iha Dili. Nunee hau observa metodu hanorin ba labarik sira foin hahu eskola diak tebes. Tanba ami sempre iha diskusaun intensiva ho mestri sira konaba metodu hanorin, prosesu ho rezultadu labarik nian. Laos nee deit, bainhira hau aprende Ingles iha Nova Zelandia, mestri sira mos hanorin uza metodu nee, nunee halo estudante sira hetan variasaun hanorin ho halo sala laran moris ho estimula labarik sira mai sala laran. Nunee hau fiar labarik sira sei aprende konseitu baziku ka kontiudu operasional hanesan amo temi iha nivel labarik sira nia idade ka klase.
13. Hau aseita katak debate nee la bele muturabu, nunee ita bele hetan premis diak hodi konstrui nasaun via edukasaun ida diak. Hau la inklui iha grupu organizador workshop foin dadaun nee konaba lian materna, no mos la tama hanesan membru REPETE 13. Maibe nudar ema ida servisu iha universidade, hau interese hare lian materna dezenvolve ho prezerva didiak. Tanba ema barak liu kualia konaba dezenvolve Portugues, maibe oituan deit mak kualia oinsa dezenvolve Tetun ho lian materna hanesan artikula iha Konstituisaun RDTL Artigu 13 Sek 2 hodi sai uma nain iha Timor-Leste. Infelizmente ema barak mak hanesan hau, maibe sira seidauk iha tempu hodi hakerek. Hau rasik hakarak debate ba asuntu sira boot ho iha implikasaun boot ba sosiedade, presiza iha debate barak no involve ema barak, laos deit akademiku sira, maibe ema sira nebee sei hetan impaktu husi desizaun ida. Nunee ita espera iha fali forum seluk hodi troka hanoin. Hakoak Boot.*
Sem comentários:
Enviar um comentário