“Xanana: Tuda Hau Nia Feen Hanesan Tuda Ha’u”

Jornal Timor Post - Tersa, 31 Janeiru 2012

Primeiru Ministru (PM) Xanana Gusmao lamenta ho atetude membru organizasaun Naun Govermental (ONG) balun ne’ebe tuda nia feen, xefe Governu ne’e dehan, tuda nia feen hanesan mos tuda nia rasik.

“Tuda hau nia feen “Kristy) ne’e hanesan tuda bah au (Xanana),” Xanana hateten ba jornalista sira iha Aeru-Portu Internasional, Comoro, Segunda (30/01), relasiona ho membru ONG balun neebe tuda surat tahan ba Kristy Sword Gusmao iha Kampus UNTL, semana kotuk, kona ba implementasaun lian maternal iha ensinu baziku.

“Hau atu dehan deit katak, se lingua maternal destroi unidade nasional iha durante funu ba libertasaun tinan 24 nia laran, entaun mai hasoru hau ita atu deskute,” nia koalia ho triste.

Xanana esplika tan katak, Timor Leste la presiza koalia tetum para manan funu, Timoroan manan funu tamba koalia lian maternal mos.

“Hau ba iha mambae nia hau koalia mamabae, hau ba iha fataluku hau koalia fataluku, ne’ebe unidade nasional ne’e la’os lian, maibe unidade nasional ne’e objetivu, Tarjetu saida mak ita atu hakarak, ita lapresiza hotu-hotu koalia tetum ho portugues atu manan funu ne’e,” nia realsa.

PM Xanana haktuir katak, iha tinan hirak liu ba iha sidadaun balun ne’ebe husu atu Timor Leste bele simu autonomia ho Indonesia, tamba respeita lian Portugues.

“Iha 1984, hau hasoru ema balun, hau la temi naran, dehan katak, diak liu ita simu autonomia tamba Indonesia promete atu ita nia estrada ho naran Dom Mozinho no ita nia fatin sira ho Portugues sira sei respeita, hau dehan, se ita atu respeita de’it iha portugues maka ita atu hetan autonomia, hau prefere koalia tetum no imi aprende tetum hau koalia ho imi,” nia salienta.

Ho akontesementu ne’e Primeiru Ministru xanana Gusmao dehan, ONG ne’ebe moris atu eduka povu no sai matadalan ba povu atu hatudu, sai fali nune’e.

“Hau atu hasoru ONG sira atu koalia de’it portugues ho sira, tamba konstituisaun dehan lingua ofisial, ne’eduni hau hakarak koalia ho sira, se ONG sira koalia lia fuan bahasa ida, hau dehan imi la folin, se defende potugues, agora mai ita koalia portugues ho hau no mos mai koalia portugues ho hau nia feen, tanba hau nia feen koalia portugues diak liu fali balun, ne’ebe balun defende portugues agora,” Xanana

tenik.

Xefe Governu ne’e mos hatutan tan katak, membru ONG hatene mak kritika de’it, maibe la hatudu atetude ne’ebe ema presiza simu no hatudu atetude ne’ebe halo povu sira tuir hodi tuda malu.

“Sira hanoin dehan hau nia feen atu lori ba koalia inglesh, kuitadu….. balun kritika hau dehan, tamba hau nia oan sira iha internasional School, sira ne’ebe kritika hau ne’e, sira nia oan sira mos iha Internasional School,” nia deskobre ho tristeza.