Artemarsiais Kria Konflitus Taka ”Lere: Taka Rai La Nabeen”

.

Jornal Nacional Diario - Kinta-feira, 22 Dezembru 2011

Prezidenti da Republika (PR), Jose Ramos Horta husu atu taka artemarsiais ne’ebe sai kriminozu hodi kria konflitu iha Timor Leste.

Deklarasaun Presidenti da Republika nian ne’e, Komodante Jeral F-FDTL, Maijor Jeneral, Lere Anan Timor reforsa liu tan katak, rai sei la naben kuandu taka artemarsiais sira ne’e. “Hau dehan artemarsiais ne’e taka ne’e taka, kuandu taka artemarsiais ne’ebe mak atu halo rai Timor ne’e sai nabeen, kuandu demais ona ita

tenki toma medidas, artemarsiais ne’e krime, artemarsiais ne’e akontese bei-beik, tamba demokrasia mak barak liu, liberade mak barak liu, dala barak hakat liu demokrasia nia limitasoens, hakat liu liberade ninia limitasoens,” koalia Maijor Jeneral Lere Anan Timor.

Lere mos hatutan tan katak, kontinua mosu ktimi iha rai laran, tamba sistema ne’ebe ke implementa mamar liu, tamba ne’e susar atu alakon konflitu iha rai laran ke artimarsiais kria dadaun.

“Ita nia lei ka sistema ne’e mamar liu, ita buka hamaus malu deit, ema kuandu komete krime ona, ne’e violensia, entaun tenki simu ho violensia, tamba violensia ne’e laos Aldeia ida nia ka suku ida nia, maibe ne’e problema nasaun nian, problema ne’ebe artemarsiais sira halo, ne’e afeita ba estabilidade nacional,” dehan Lere.

Ba problema ne’e, PNTL maka tenke toma responsablidade no toma desizaun ne’ebe maka forte hodi nune’e problemas refere labele kontinua ba beibeik.

“Hau nia pozisaun hatete ona ba Sr. Prezidenti da Republika katak, labele preokupa ho sartimarsiais ne’ebe baku malu ne’eba, lolos ba kaer ninia Xefe lori mai detein nia, porke nia maka loke artemarsiais, nia tenki responsabliza,” koalia Lere.

Lere mos hatutan tan katak,” Artemarsiais mai husi Indonesia, tantu artemarsiais mai husi Indonesia no tamba saida maka iha Timor mosu deit mak problema artemarsiais, it abele deskonfia, uluk hau esperensia gerilia, esperensia ho estratejia halo funu, hau kria inimigu e inimigu nia laran ida ne’e hamosu problema boot,” koalia Lere.

Ba kestaun ne’e Chefe Estadu Jose Ramos Horta hateten, artemarsiais ne’ebe krime ne’e, sira nia lider tenki prosesa ba Becora, tamba tinan barak ona nia (Ramos Horta-red) rasik, Primeiru Ministru ho komando PNTL halo ona dialogu ho artimarsiais sira ne’e, maibe lamuda, signifika sira hakarak sobu duni dame iha nasaun ida ne’e nia laran.

Ramos Horta mos hatutan tan, tempu ona para Parlamentu Nacional halo lei hodi labele konsidera artimarsiais ke buka hakarak kria konflitus ne’e, hodi konsidera sira illegal, tantu Polisia mos tenki halo intervensaun maka’as.

.