LP: MARI ALKATIRI NIA ESPESIALIDADE SAIDA "Entre Duvida no Klarifikasaun"

By Jose da Costa

Iha Dialogo Aberta ida iha sede CCF-BP7 Komoro Dili, Mari Alaktiri no Lu-olo kandidatura ba Presidente no Sekreatio Geral Partidu FRETILIN ba periode 2011-2016, hakarak dada atensaun oitoan publiko nian, kala militantes oan sira nian, hodi hasai kritika ba Governasaun AMP no liu-liu mos ba personalidade Xanana Gusmao nian hodi dehan nune'e "Hau nia irmaun Xanana ne’e, se nia mak rona hau karik, nia la tama iha tahu laran hanesan agora dadun nia tama". (Media Fretilin, August, 13 2011). Kuitadu Tebes ba Mari, tamba liafuan mamuk tebes ida. 

 

Ba Xanana, Mari laliu hanesan ho Ozorio Mauleki Sekjen partidu PDRT nian, Joao Correia Sekjen partidu ASDT nian, no Jose Agustinho da Silva Sekjen Partidu KHUNTO nian, tamba ne'e se hakarak rona, rona mos sira hotu dala ida. Katak ba Xanana Mari la espesial buat ida. 

 

Se hare ba nia kargu nudar Sekretario Geral Partidu FRETILIN nian entaun mos nia kargu hanesan mos individu hirak nebe temin iha leten no ba sira nia partidu, tamba iha politika laiha karidade ka ajuda malun, karidade ne'e kala Amululik sira nia serbisu. Iha politika, buat nebe iha mak Interese no Satisfasaun da interese. Iha Funu laran Xanana mak komanda funu, Xanana mak haruka informasaun ba liur no ajuda ho maluk klandestina sira, mos hanesan kompanheiro sira iha organizasaun OJELATIL, OJETIL, RENETIL, FITUN, SAGRADA FAMILIA etc, mak informasaun bele to'o iha liur hodi sira mos komunika ba Mundo International. 

 

Ne'e hatudu katak sira bele koalia tamba iha kilat musan no base nebe sira bele baseia ba hodi koalia. Sira la koalia iha nakukun laran. Statement ida ne'e refere ba sira nebe halo Diplomasia iha liur, hau ladun iha clareza, se Mari mos inklui iha grupu ne'e ga la'e. Mari Alkatiri sempre hasai liafuan sira nebe abuzivo no sadik, ho nia konotasaun hatudu katak so nia (Mari) deit mak bele hatene buat hotu, no ema Timor tomak tenke hakruuk no rona nia, entaun Mari Alkatiri nia espesialidade saida?

 

Hau kuaje la imagina, ema hanesan Mari mos hatudu an hanesan ne'e. Sa mak halo Mari diferente ho ema ka lider seluk iha Timor? mai ita hare hamutuk took:

1. Mari nia pozisaun hanesan Sekjen, entaun iha sekjen 22 husi partidu 22 nebe atu ba kompete ba Eleisaun Geral 2012, hanesan deit. Laiha Sekjen partidu ida nian mak bele espesial.
    
2. Se Mari Alkatiri hanesan Eis Titular, entaun estadu respeita nia, hodi fo uma no kareta estadu gratuita, ho nia seguransa, ajudante, sekretario no seluk tan, no mos iha loron bo'ot sira iha Timor, fo respeita no honra no serbi sira hanesan mos Avo Xavier no lider sira seluk tan, hanesan deit buat ida la diferente. 
    
3. Se Mari Hakarak sai Assesor ba Ministeriu ruma, entaun hatama CV no karta pedidu ruma, tuir intervista no baseia ba nia kualifikasaun, nia bele hetan oportunidade hanesan mos ho asesor sira seluk, hanesan Helder da Costa, Joao Saldanha, Marito Magno, no sira seluk tan nebe iha Ministerio hotu, hanesan deit laiha buat ida nebe diferente no espesial tebes ba Xanana para atu Rona.
    
4. Se Mari tau an Hanesan Lider Religiaun Musulmano nian iha Timor, entaun mos hanesan ho lider religiaun sira seluk iha Timor, hanesan Pendeta sira, Amo Lulik sira no Amu Bispo nain 3 Timor nian, tamba ne'e se hakarak konsulta, bele konsulta hotu sira, tamba knar ka kargu hanesan deit, ho liafuan seluk hotu-hotu ulun ba religiun sira nian, hanesan deit, laiha buat ida mak hatudu Mari Espesial tebes ba Xanana. 
    
5. Se Mari tau an hanesan Lider Historiko, fatin ka dalan atu koalia no konsulta malu mak Maubise 1 no 2, hanesan mos lider historiko sira seluk nebe bele konsulta hotu para hetan sira nia ideia, hanesan Avo Xavier, Mario Carascalao, Joao Carascalao, Ramos Horta, Jose Luis Guterres no sira seluk tan.

Hare husi ezemplu sira iha leten ne'e, laiha nen buat oan ida mak halo parte iha Mari Alkatiri nia espesialidade nebe halo diferenta ho ema ka Lider seluk iha Timor ne'e para atu sai espesial los ba Xanana ka lider AMP sira seluk. Tamba ne'e, liafuan ida dehan rona Mari karik diak ne'e, la hetan iha Dictionario Xanana nian no Lider AMP sira seluk nian. Sa tan Mari Alkatiri buka hela dalan no mekasimo oin-oin atu bele to'o fali iha Poder. Motivasaun karidade latama iha lista funsaun ka prinsipiu partidu politiko ida nian.

Hakerek nain nudar vendedor ikan iha tasi ibun Lecidere-Dili.