Xanana mak Salva Alkatiri ka Alkatiri mak Salva Xanana ?

By Jose da Costa

Ikus-ikus ne'e FRETILIN BP7 hamosu propaganda no estrategia politika baratu ho nia Autor mak Mari Alkatiri, kuase iha fatin hotu nebe FRETILIN halo konsolidasaun ba, fila ba fila mai mak dehan Xanana iha ona Tahu laran, so Ita mak sei salva Xanana ka hasai Xanana husi tahu laran.

"Ita", signifika iha ne'e mak Mari Alkatiri, komu nia transforma ona FRETILIN ba nia aset pribadi entaun nia hakarak atu dehan katak so ita FRETILIN (So Mari mak bele salva Xanana) ka hasai Xanana husi tahu laran. Deklarasaun ida ne'e, halo ema barak hakfodak sera ke ida ne'e mak dehan soe rai rahun ba povo nia matan atu labele hare buat realidade sira nebe akontese durante ne'e iha palku politika? ou atu desvia atensaun publiko nian liu-liu membro FRETILIN sira nian nebe iha ona dalan ba CNRT atu fila fali, ka materia kampanha mak laiha ona tamba laiha ona fundamentu atu koalia? pergunta hirak ne'e so Mari mak bele fo resposta tamba nia mak fo sai lia fuan sira ne'e.

At liu fali, kala doktrin tiha nia elementus oan sira nebe iha kraik ho liafuan propaganda baratu sira ne'e, ikus mai tama sai uma no fatin balun hodi dehan tan, Mari ho Xanana sei hamutuk iha eleisaun geral 2012. Maibe buat estranho nebe elementu sira joga iha kraik mos mak dehan fali tuir lei ema lebele sai Primeiru Ministro ba Periodo rua, entaun maski karik CNRT mak manan mos sei husu ba FRETILIN atu ukun. Hau senti laran makili oitoan, tamba propaganda sira ne'e, baratu tebes, no buat nebe hau labele imagina mak se konfia an dehan partidu historiko tamba sa mak tenke soe lia bosok ba publiko.

Mari Alkatiri ka FRETILIN mak atu salva Xanana nudar statementu ida nebe laiha base moral. Tamba temi ema seluk nia naran iha nia mensajen politika sa tan Presidente partidu ida nian. Halimar oitoan, hau atu dehan Mari iha hela tahu laran hakarak salva Xanana ba tahu laran hotu? duvida bo'ot. Uluk kuandu Xanana iha serku laran iha Aitana, no iha fatin seluk tan, durante luta ba Timor Leste nia independencia, Mari la mehi atu salva Xanana, Mari toba no hemu diak iha liur neba. Agora ukun an ona, Mari Hakfodak atu salva fali Xanana. Mensajem politika labarik sira nian. Agora komu iha ona situasaun difisil iha palku politika entaun temin netik salva Xanana para povo hanoin oh Mari mos SALVADOR. Ita parese tenke bolu naran "MARI SALVADOR ALKATIRI". Biar nune'e memoria povo Timor nian sei fresko hela, katak Mai ho nia elementu sira mak bolu Xanana Traidor, no hakarak hatun masa liu husi Marca da Pas atu hatun Xanana. Kuitadu teki-teki fila an tiha, maibe "La hetan Babol".

Molok Mari hakfodak atu salva Xanana, Xanana Salva ona Mari antes kedas. Salva Mari oinsa?

1. Iha 3 de Marco 1981, wainira iha Confrerencia Reorganizasaun da luta, Xanana mak hakarak sai  Presidente da Fretilin dalan luan hela, maibe Xanana lakohi tamba nia preokupa ho funu. Xanana fo garantia ba Mari atu sai lider da FRETILIN.
2. Iha 1998 iha ona Reformasi nia laran, husi Cipinang, Xanana haruku Mau Hodu ba to'o Sydney no hakerek karta ba FRETILIN atu organiza an nudar partidu. Husi neba dala ida tan Xanana Salva Mari atu sai ulun ba FRETILIN nian.
3. Iha 2001, ema barak ba Loby inklui partidu kiik sira balun, atu desolve CNRT (Conselho) no hari partidu seluk hodi hasoru FRETILIN, maibe Xanana dehan, lalika tamba hau nia pasagem sira mos hamutuk ho FRETILIN. Dala ida tan Xanana Salva Mari atu sai lider bo'ot no Heroi bo'ot ba FRETILIN.

Hare husi pasagem sira nebe mak iha hatudu katak, molok Mari hakfodak atu salva Xanana, Xanana halo uluk ona ba Mari iha tempu hirak liu ba kotuk. Nebe la tama iha logika se Mari ka FRETILIN mak atu salva fali Xanana. Se Xanana hakarak halo koligasaun, nia sei halo koligasaun ho patidu seluk, laos ho FRETILIN.

Hakarek nain nudar Vendedor ikan iha tasi ibun Lecidere - Dilli