PM Xanana Sei Determina Destinu UNMIT Aban

Monday, 21 February 2011

Tempo Semanal-New York

Aban lokraik oras New york Primeiru Xanana ba dala uluk atu koalia iha konselu seguransa ONU ninian kona ba misaun UNMIT ninian.

Parte barak fiar katak PM Xanana sei ho diplomasi kee sai UNMIT ninia fallansu iha TL no sei foo obrigado no bele hiit pasta husi TL hafoin de elisaun.

Tuir Fontes jornal ne'e Governu ninia laran dehan katak diskursu PM Xanana ninian ne'ebe sei sani iha Konselu Seguransa ninia oin ba dala ne'e hakerek ho matenek no nakonu ho kritikas lubun ida hasaoru misaun ONU ninian iha Timor Leste  uluk hafoin.

Vizita ba konselu Seguransa ONU ninian ba PM Xanana hanesan ba dahuluk hafoin lidera IV Governu konstitusional.

"Ami ko'alia ho PM no nia hatudu deskontentamentu ba misaun UNMIT ninian barak," dehan membru do Governu ida ne'ebe husu atu labele temi ninia naran.

Parte barak haree misaun UNMIT la iha produktividade no gasta osan de'it no Governu Timor leste la kontente ho lala'ok unidade UNMIT ninian ida ne'ebe hanaran SSR.

SSR unidade ida ne'ebe gasta osan barak husi komunidade internasional maibe falla atu halo reforma no setor seguransa nasaun ninian maibe sira so produz de'it relatoriu mahar no estudu ne'ebe iha lian ingles mak la fasilita Timor oan atu kompriende.

UNMIT repete hikas fallansu ne'ebe instituisaun ONU ninia halo iha 2004 no dala ida tan UNPOL falla aijuda haberan PNTL. (TS)