Celso Oliveira, 

Gosta hakerek historia badak no dadolin Timor nian

------------------------------------------------

 

 Bem Vindo Presidenti da Republika Taur Matan Ruak 

Se karik ema bulak ida mosu mai hodi halai isin molik iha sidadi Dili, iha loron tomada de posse, 19 de Maio, konserteza ema hotu-hotu sei hamnasa hodi halo komentariu oi-oin. Maibe, iha realidadi, ohin loron iha ema bulak barak maka lao tun sae iha Dili laran. 

Ikus-ikus ne, hau hare'e ema hotu-hotu la fo'o interesse tiha ona ba governu AMP ninia lalaok/governasaun. Tamba sira dehan nune: "ahhh...hela deit semana ida ou rua atu remata mandatu, AMP la importanti ona. Atu lao diak ka lae, masa bodoh. Yang penting, osan tama nafatin". 

Kuandu Presidenti Fretilin Lu-Olo manan iha primeira ronda eleisaun prezidensial liu ba, hau hare'e Presidenti no koordenador hosi partidu sira seluk no mos kandidatu independenti balun fo'o hotu apoio ba Lu-Olo. Sira halo deklarasaun barak-barak hodi dehan kandidatu independenti Taur Matan Ruak lakon ona iha korrida ba Palacio das Cinzas, 2012-2017. Pior liu tan, ema sira ne'e komesa husu ona pasta ministerial balun ba Fretilin. Komiku. Maibe, realidadi. 

Laos ne'e deit, hotu tiha segunda ronda hodi lori vitoria maioria ba Taur Matan Ruak hanesan Presidenti da Republika foun iha Timor Leste, mosu kedas "Surat Kaleng" ou "Karta Anonima" hodi trata a'at PR foun TMR no atual PM Xanana Gusmao. 

Tuir hau nia hare'e, karta anonima hodi trata a'at lideransa politika laos novidadi iha Timor. Kuandu ita akompanya didiak blogs, liu-liu Facebook, ita hare'e komentariu oi-oin nebe la uza naran lolos hodi trata a'at lideransa politika iha Timor. Ne'e duni, hau fo'o razaun ba PM Xanana nebe husu atu publika tiha deit iha media massa karta anonima nebe koalia a'at nia ho futuru PR TMR. 

Depois de segunda ronda eleisaun presidensial, hau hare'e ema hotu-hotu fo'o felisitasoens ba futuru PR foun TMR, inklui Presidenti EUA Barak Obama, Presidenti Portugal, Presidenti Indonesia Susilo no lideres mundiais seluk tan. Maibe, infelizmente, Presidenti Fretilin, Francisco Lu-Olo to'o agora seidauk hasai deklarasaun hodi fo'o parabens ba ninia adversariu politiku duranti kampanya eleisaun presidensial, fitun rua TMR. Iha hau nia laran, hau sik-sik nune: "keta halo Fretilin konsidera futuru PR TL Taur Matan Ruak hanesan presidenti De Faktu deit. Se karik nune, entaun 20 de Maio 2012, diak liu Fretilin lalika tuir serimonia tomada de posse ba Presidenti foun RDTL nian, nebe sei realiza iha Tasi Tolu, Dili". 

Maibe, hau hanoin, Presidenti Fretilin Lu-Olo no Sekretariu Geral Mari Alkatiri oras ne'e daudaun reserva ou prepara hela sira nain rua ninia deklarasaun. I, hau fiar katak sira nain 2 maka sei fo'o uluk parabens ba fitun 2, TMR, nudar Presidenti da Republika ba dala tolu iha Timor Leste, de jure no de facto, periode 2012-2017. Tamba sira nain 2 hakarak hatudu ba Povo Timor katak Fretilin hadomi Paz, Estabilidadi no Progressu iha Timor. 

Ita hotu-hotu, nudar Timoroan, nudar sidadaun Timor, seja hela iha Timor ka estranjeiro, seja ema independentista ka integrasionista, tenki fo apoio maximu ba Taur Matan Ruak nudar Presidenti da Republika foun iha Timor. Tamba nia maka Povo hili ona, maioritariamente atu sai Timor nia na'i ulun, Timor nia lia nain, Timor nia mata dalan, iha tinan 5 nia laran. 

Tinan 5 sai ukun nain ba Timor Leste laos buat ida fasil. Ne'e duni, nudar sidadaun Timor, ita iha obrigasaun atu ejiji ba ita nia Presidenti da Republika foun, Taur Matan Ruak ninia responsalidadi, seriedadi, sakrifisiu, dedikasaun atu bele garantia Paz, Estabilidade no Progressu iha Timor.

Ita hotu-hotu, tenki servisu hamutuk, fo'o liman ba malu hodi tane interesse nasional as liu interesse privada ou grupo ou partidu. Tamba Povo Timor merese. 

Se karik, iha ema balun maka lakohi fo'o apoio maximu ba TMR nudar Presidenti da Republika RDTL, entaun iha realidadi hatudu duni katak ohin loron iha ema bulak barak maka lao tun sae iha Dili laran.

Parabens Taur Matan Ruak. Boa Leitura.