“Taur Matan Ruak: Maun Lu-Olo Nia Tempo Seidauk To’o, Uluk Iha Ai-Laran Hau Mak Ukun Nia, Agora Mari Alkatiri Mak Sei Ukun Tan Nia”

Dili 05 Abril 2012

Kandidatu Prezidenti da Republika Taur Matan Ruak hateten, oras to’o ona ba kandidatu independente atu ukun rai Timor Leste, wainhira nia eleitu ba Prezidenti da Republika.

Kestaun ne’e hato’o husi kandidatu Prezidenti Taur Matan Ruak, wainhira hala’o nia kampania segunda ronda iha Suku Rao Moko Sub Distritu  Lautem.

Kuarta-feira ne’e (03/04) kandidatu Presidenti Taur Matan Ruak hamutuk ho nia ekipa Vitoria halao kampania iha suku Rao Moko sub Distritu Lautem hodi hato’o programa perioridade ninian wainhira eleitu ba xefe do estado.

Iha Diskursu Taur Matan Ruak hateten, tempo to’o ona atu kandidatu independente ukun rai ida ne’e.

“Presidenti ba periodu 2012-2017 maka Matan Ruak, Fitun Rua, Nomor Rua, Ronda ke dua, tamba saida mak hau hateten ida ne’e? Primeiro, tamba istoria hatudu katak kandidatu independente sempre manan kandidatu ne’ebe mai husi partidu, hau hakarak hateten ba imi katak, Maun Lu-Olo nia tempo seidauk to’o, uluk iha ai-laran hau maka ukun nia, agora hau maka sei ukun tan nia, tamba ne’e, ba imi sira FRETILIN iha ne’e, imi vota ba manu ne’ebe asuwain, labele vota ba manu ne’ebe paisuda ona,” deklara Taur.

Kandidatu ho Numero 2 ne’e mos hatutan, labele ameasa no halo presaun ba povu atu hetan votus, hatetude hirak ne’e halo husi partidu balun ba nia kordenador iha Distritu Baucau no Viqueque.

“Partido kikoan sira ne’ebe foin moris, nia komportamentu kapa’as lahalimar, liu fali partido ida ne’ebe ke istoriku, lideransa istoriku, maibe preman mak dumina, ital abele halo politika hanesan ne’e, ita joga politika ida ne’ebe mak moos, politika ida ne’ebe fo direitu ba ema hotu hili, se de’it mak nia hakarak hili, iha liberdade atu vita ba se de’it, tuir ninia hakarak, ital abele halo presaun, ita  labele ameasa, ita labele sunu, ital abele baku, ne’e la diak, se lori forsa de’it karik Indonesia manan tiha ona ita,” deklara tan Taur.

Antes hala’o kampania Prezidenti, ekipa Vitoria Taur Matan Ruak husu ba povu Sub Distritu lautem atu vota ba kandidatu ho numero rua.