“CNRT Taka Odamatan Ba Koligasaun”

“CNRT Taka Odamatan Ba Koligasaun”

.

Jornal INDEPENDENTE - Kinta, 26 Abril 2012

Partidu Congresu Nasional Rekonstrusaun Timor-Leste (CNRT) kontinua mantein pozisaun hodi kaer Governu mesak ba periodu 2012-2017.

Foin lalais ne’e partidu FRENTE-Mudansa fo sai nia pozisaun politika katak atu hasoru eleisaun parlamentar, partidu ne’e sei halo koligasaun ho CNRT hodi kaer Governu.

Vise Prezidenti Partidu CNRT, Eduardo Barreto “Dusae” rejeita deklarasaun Partidu Frente Mudansa atu koliga ho CNRT, tanba liu husi konferensia nasional iha fulan hirak liu ba deside atu partidu ne’e avansa mesak hodi kaer governu bainhira hetan votu maioria.

“Partidu la halo koligasaun antes de eleisaun,” dehan nia, iha Uma Fukun Parlamentu Nasional, (25/04).

Partidu CNRT sei foti desizaun depois rona rejultado eleisaun parlamentar, Votu ne’ebe maka partidu hetan la bele garantia kadeira maioria parlamentar mak foin bele buka partidu sira seluk hodi halo koligasaun.

Maski nune’e, atu halo koligasaun CNRT sei haree Partidu sira ne’ebe mak iha vizaun no misaun no planu dezenvolvimentu hanesan mak foin bele halo koligasaun hodi forma Governu foun.

“Se laiha, CNRT pronto ba opozisaun,” dehan Xefe Bancada CNRT ne’e.

ba kestaun koligasaun ne’e, oras ne’e dadaun, Comisaun Nasional da Eleisoens (CNE) fo oportunidade ba partidu politiku sira atu rejistu koligasaun ne’ebe partidu sira forma ona antes tama ba eleisaun lezislativa.

.