Taur Hakarak Redus Importasaun Aihan Mai Timor-Leste

Sexta-feira, 2 de Março de 2012

.

Jornal Independente - Husi: Eugenio Pereira

DILI: Kandidatu Prezidente Republika Taur Matan Ruak hatete nia hakarak estadu tenke redus importasaun aihan husi rai seluk mai Timor-Leste kuandu nia maka sai prezidente republika ba periodu 2012-2017.

“Ita agora depende nasaun seluk nia produtu makas liu, to be’e sira ita hemu mos lori husi nasaun seluk, hanesan masin no fos ne’ebe ita han mos lori husi rai liur mai, ita tenke kombate,” Taur hatete bainhira halo ninia primeiru kampania iha Kampu Dom Bosco, Komoro, Dili, Kuarta (29/02).

Hari’i no dezenvolve sistema ekonomia nasaun ne’ebe sei la depende ba ekonomia no produsaun hahan rai seluk hodi Timor-Leste hetan konkorente hetan sustentabilidade, dehan nia.

Tautr dehan papel emprezariu Timoroan sira importante tebes hodi haforsa investimentu iha rai laran.

Nia husu ba emprezaeriu Timoroan sira atu halo investimentu barak liu tan iha Timor-Leste.

Timor-Leste nudar nasaun riku bo’ot ida tanba ne’e tenki hahu investe iha areia tomak hodi hadia moris povu no nasaun, nia hatete.

Kona-ba programa fundamental sira seluk ne’ebe maka nia sei halo, Taur dehan nia hakarak kaer metin independensia nasional, garante integridade nasional, kaer metin unidades nasional, haburas demokrasia no hametin integrasaun regional ho internasional.

Eis komandante F – FDTL hatete, uluk iha funu nain sira jura atu lori povu ba ukun aan, agora tempu kaer ukun hamutuk ho povu atu hetan moris diak, tanba se la halo nune’e matebian sira babuer Timor oan mate mohu.

“Hau mai ho hanoin ida deit ho forsa ida deit halibur Timor oan atu manan tan dala,” katak nia.

Nia dehan, Timor oan tenki hatudu ba mundu katak, Timor oan bele kaer rasik ukun hodi hetan dignidade, tanba independensia lori mate no terus maka sosa ho orgulho hari’i Timor-Leste sai nasaun independente ho demokrasia.

“Ita husu nafatin ba ita nia matebian sira ho rai lulik fo nafatin kbit ba ita ho brani para ita nebe moris halo tuir ezemplu sira hasik hela ba ita atu fila Timor-Leste sai nasaun nebe sei sai loron diak ba jerasaun foun,” tenik nia.