“Pe. Martinho Gusmao: Partidu Ditador Maka La Respeita Lei”

Kinta, 22 Fevereiru 2012

By Laloran

Padre Martinho Gusmão hosi Komisaun Nasional das Eleisoens (CNE) konsidera katak, partidu Politiku sira ne’ebe iha tempu kampania la respeita lei tama iha kategoria ditadura.

Padre Martinho Gusmão kasu lia hirak ne’e no refere ba Partidu polítiku balu nebe’e sira nia lideransa la edukativu, hanesan mossu iha eleisaun geral 2007. “Partidu nune’e hakarak impoen deit nia hakarak no la respeita regras demokratika” tenik nia dehan ba Jornalista sira iha Dili, Tersa (21/02) relasiona ho eleisaun geral hia 2012.

“Lei hatu’ur ona katak, labele hateten at ema, labele insulta ema, labele provoka ema, maibe kandidatu no partidu sira kontinua halo nafatin hahalok at ne’e. Nune’e mos ho kandidatu prezidensial sira nebe dehan sira sei koalia konaba paz deit maibe kontinua iha kotuk insulta at ema. Sira dehan la’os ditadura, maibe militar atu asegura sefeza no seguransa ne’e maka ditadura fali, hau hanoin ninia lojika ne’e labele la’o hanesan nune’e,” Komisariu CNE Pe. Martinho Gusmao dehan ba jornalista sira iha Dili, Tersa (21/02), relasiona ho kandidatu balun insulta kandidatu seluk.

Padre Martinho esplika tan, sistema ditadura ninia espresaun ne’e ba ema ne’ebe maka hakarak halo at ema seluk, entaun nia dehan, iha tempu kampania maka KAPREZ no partidu politiku sira la respeita ona valores, sira maka ditadura, portantu sira iha lei nia leten, maibe liman kroat povu nia mos iha direitu atu foti medidas hanesan ne’e.

Padre Martinho kondena makaas partidu boot balun nebe nia militantes halo violensia no hakarak sobu eleisaun iha 2007, no hakarak obriga manaan deit no lakohi rekunhese lakon, hanesan Fretilin iha 2007.

Nia mos fo hanoin katak ema hotu-hotu tenki hakruuk lei no ordem, tan ne’e, kuandu liafuan ida hanesan insulta, depois hakarak kria atu ema halo violensia iha fatin kampania, labele mossu tan. CNE sei fo apoiu ba F-FDTL no PNTL bele foti medidas, tamba sira iha ona planu rasik atu netraliza situasaun no akalma violensia iha eleisaun, Pe Martinho tenik.

Nia mos koalia kona-ba operasaun parte defeza no seguransa nian iha tempu kampania atu bele oinsa halo prevensaun ba konflitus ka atu atua violensia.

Tanba ne’e nia apela ba Partidu politiku sira atu uza liafuan mamar, no kontrola militantes sira. Nia hatete lider politiku nebe la konsege kontrola militantes, ne lider nebe laiha pudor no laiha kapasidade atu jere organizasaun partidu. Diak liu mundur tiha deit atu labele kria fali ditadura iha ita nia rain, hatutan nia (tek).