VPM Jose Luis: Estadu Ne’ebé Forte, Estadu Ne’ebé iha Rekursu Umanu

Estadu ne’ebé forte maka estadu ne’ebé iha rekursu umanu,” lia hirak ne’e hato’o hosi Vice Primeiru Ministru José Luis Guterres iha seremonia graduasaun ba Finalista Universidade Nasional Timor Lorosa’e iha Centro Convensaun Dili, Kinta ne’e (18/08) Jose Luis konsidera hatete atu hadia ita nia sistema edukasaun, ida ne’e asuntu importante ba governu tomak, maibe tenke lori tempu.

“Tamba ne’e mos sei mosu informasaun ba ita nia sociedade no komunidade tomak kona ba problema edukasaun, Ita hotu komprende katak buat sira ne’e mosu tamba ita iha hela fase bo’ot ida prosesu rekonstrusaun estadu, Ita presija lori tempu hodi hakotu buat hotu ne’ebé ita mehi inkluindo sistema edukasaun ne’ebé diak no adekuadu,” katak VPM ne’e. Na hatutan “tuir ita nia kapasidade rasik no rekursu umanu ne’ebé ita iha no laiha ema iha rai seluk atu mai ajuda ita iha rai laran.” Nia kongratula mos ba igreja Katolika ne’ebé durante ne’e implementa sistema edukasuan diak iha Timor Leste.

Alein de ne’e Vice PM mos espresa katak “hau hakarak tebes kongratula Dosente, Dekanu no ita nia inan aman sira, Ohin loron 18/08 ita marka tan osan mean ba ita Timor Leste hotu nia historia katak ema ida hosi familia ida-idak iha rai ida ne’e kompleta kursu iha nivel universidade, ne’ebé ohin ho sentimentu orgulho ba familia ne’ebé aumenta tan ema ida matenek iha familia ida ka barak iha ita nia sociedade tomak .”

“Ne’ebé orgulho ne’e ba Timor tomak,” dehan VPM José Luis. Ne’ebé ho graduasaun ne’e mos mosu dezafiu bo’ot, ne’ebé graduadu ida-idak iha grande opurtunidade oinsa atu buka serbisu i serbi diak liu ba ita nia rain,taka José Luis Guterres. Iha fatin hanesan Reitor UNTL Aurelio Guterres hateten “ hau nia parabens ba meta ne’ebé imi alkansa , sucesu ba imi ida-idak, imi nia kareira professional ne’ebé imi mehi sai realidade.(TE)