PN seidauk Hasai Karta Suspensaun, Vice PM : “Hau Nia Obrigasaun Moral Atu Kontinua Servisu “

Kinta, 03 Marsu 2011 - 16:39:01 OTL

Posting Husi : Josefa Parada
Kategoria : Notisias Online - Le'e dala : 46 Ona.

DILI- Relasiona ho Kazu vice PM Jose Luis Guterres, nebe deskonfia transfere osan ba nia kaben Ana Maria, to’o oras ne’e Parlamentu Nasional (PN), seidauk hasai kartu suspensaun, Vice PM Jose Luis sei halao knar hanesan bain-bain.
“ Ita labele kria fali problema de zestaun Administrasaun iha governu, hau mos suzere ba iha PM atu haruka  karta ida mai, tuir protokulo no hirarkia governu nian, Ministra Finansas mak  kaer enkaregadu governu to’o PM mai, hau nafatin hanesan Vice PM, hau sente katak ita nia parlamentu seidauk iha desizaun, hau nia obrigasaun moral atu kontinua servisu nafatin,”dehan Vice PM Jose Luis Guterres ba Jornalista  sira iha Palasio Governu, Kinta (3/3).

Nia hatutan, antes (28/2) Vice  PM koalia ona ho PM Kay Rala Xanana Gusmão, tamba kazu prosesa hela iha Tribunal. Nia husu PM atu hare ema seluk kaer knar hanesan Vice PM interinu hodi labele hamosu problemas.

Prezidente Parlamentu Nasional (PN), Fernando La Sama De Araujo hatete, karta suspensaun ba Vice PM Jose Luis Guterres, Tribunal haruka karta mai iha Parlamentu no meja PN haruka kedas ba baixa iha komisaun I.

“Hau hein hela bainhira mak komisaun I hato’o sira nia relatoriu pareser mai iha plenariu, depois ami sei diskute,” dehan La Sama .

Nia hatutan, se Tribunal Distrital hatete presia karta suspensaun, ne’e klarifika ona saida mak hakerek iha konstitusaun fo ona seguransa ida mai PN atu prosesa levantamentu imunidade ba membru Governu sira .
Iha fatin hanesan Defensor Publiku Sergio Hornay informa ba prezidente PN no diskuti kona ba asuntu kazu Jose Luis Guterres. To’o ikus politikamente sira mak desidi kona ba imunidade ne’e rasik, maibe iha Tribunal hatete tenki iha karta suspensaun no Tribunal husu atu  halo suspensaun, tamba sira labele julga membru governu sein iha karta suspensaun. Timotio Soares