Konselho Ministru Hatudu Aurelio Sai Rektor UNTL

Written by */CJITL

Thursday, 02 December 2010

CJITL Flash, Governu liu husi Konsellu Ministrus halo votu sekretu hodi  hili Aurélio Guterres ba Reitor Universidade Nasionál Timor Lorosa’e (UNTL) nian. Tuir Estatutu Instituisaun ne’e nian, ne’ebé publika iha Jornál Repúblika iha loron 20 fulan Outubru liubá ne’e, Reitór atuál aprezenta lista ida ho kandidatu na’in tolu ba Ministru Edukasaun, ne’ebé husi ninia parte aprezenta ba Konsellu Ministrus atu halo nomeiasaun. Lista kandidatu nian kompostu husi: Dr.Aurélio Guterres, Dr. Faustino Cardoso no Dr. Francisco Martins. Karta ne’ebe mak Centru Jornalista Investigativu Timor Leste-CJITL hetan iha aneksu katak Reitór eleitu sei labele asume kargu seluk ne’ebé bele hamosu konflitu ho ninia disponibilidade totál atu dedika-an ba konsolidasaun dezenvolvimentu institusionál UNTL nian. Konsellu Ministrus felisita kandidatu na’in tolu ne’e ba sira nia disponibilidade no dedikasaun no sentidu responsabilidade nian ne’ebé boot tebes. Konsellu Ministrus felisita Reitór eleitu, Dr. Aurélio Guterres ba ninia eleisaun no hein katak nia bele susesu iha ninia mandatu iha tinan lima nia laran ne’e(*/CJITL)