Partidu CNRT ukun 2012 aldeia sira ahi sei lakan hotu.

Tuesday, 29 November 2011 09:43 Written by M X

Dili MLP:  Partidu Kongresu Nasional Rekonstrusaun Timor Leste maka kaer ukun iha tinan 2012 ahi sei tama too aldeia sira iha teritóriu laran tomak.

Programa Partidu Kongresu Nasional Rekonstrusaun Timor Leste (CNRT) nian maka agora dadaun implementa ona  barak ona iha Governu AMP nian mandatu hanesan sentru elektrika Héra ne’ebé maka foin dadauk inagura ne’e no fo subsidiu ba ferik katuas sira no veteranu sira.

Sekretáriu Jeral Partidu CNRT, Dionísio Babo hateten katak iha 2012 Partidu CNRT maka kaer ukun aldeia sira mos ahi sei lakan.

“Iha mandatu Governu Aliansa Maiória Parlamentar nian ukun Programa Partidu CNRT konsege implementa barak ona hanesan Sentru elektrika Héra, fo subsidiu  ba terseira idade, no fo rekoiñesementu ba ita nia vetesranu sira. Programa Partidu CNRT nian boot liu maka sentru elektirka Héra ne’ebé foin dadauk inagura ne’e ne’eduni iha tinan 2012 maka Partidu CNRT kaer ukun ahi sei too aldeia hotu iha teritóriu Timor laran tomak”

Hateten Sekjen Partidu CNRT, Dionisio iha Palasiu Prezidente Ncolau Lobato Aitarak laran Dili Segunda-Feira (28/11/11).

Sekjen ne’e mos hatutan katak sei fo atensaun liu ba povu ne’ebé maka kbiit laek atu enérgia elektrisidade.

“Bainhira Partidu CNRT maka kaer ukun maka sei fo atensaun ba ita nia povu ne’ebé maka laiha atu enérgia eletrika, signifika katak sei loke kampu servisu ba sira” Sekjen haktuir.

Ikus Sekretáriu Jeral ne’e konkorda ho Prezidente Repúblika nia apelu atu povu tenke kontribui  osan oituan hodi selu enégia elektrika atu nune’e governu bele halo manutensaun ba jeradór sira no hola mina pronese mentu nian.

Projeitu Harii Uma 5 Sei Fo Servisu Ba Povu Rihun 8.000 “FRETILIN lakoi halo Uma ba Povo”

Jornal Liberal - Tersa-feira, 30 Novembru 2011

Programa Governu hodi harii uma lima ho total 11,855 iha Suku 442, sei lori vantazen boot ba populasaun Timor oan Rihun walu (8.000) liu maka sei hetan benefisiu servisu. Maibe Bankada FRETILIN iha uma-fukun lakoi halo uma ba Povo, tanba sira dehan ne’e gasta deit osan.

“Maizumenus Povu rihun walu (8.000) mak sei hetan servisu husi projeitu uma lima ne’e,” dehan Ministra Financas, Emilia Pires durante deskute OJE 2012 iha Parlamentu Nasional foin lalais ne’e.

Ba kestaun ne’e, iha parte seluk, Deputadu Bancada FRETILIN, Estanislau da Silva kestiaona maka’as Politika Governu hodi fo projeitu harii uma lima iha suku ne’ebe sei gasta ossan saugate no arbiru deit, tenik nia.

Estanislau dehan, loloos projeitu ne’e lalika halo lai, tanba bele hein tinan hirak tan mak halo. Depois emprejariu Timor oan tomak bele hetan projeitu hodi hasae sira nia kapasidade tuir Politika Governu nian.

“Ami kestiaona maka’as nusa mak tenki halo uma ba povo agora ho ansia. Povo la preciza uma sira ne’e.” Estanislau kestiaona durante debate OJE iha PN.

Nune’e mos, iha deputado FRETILIN balun ne’ebe la konkorda ho governu halo uma ba povo. Sira dehan tuir lolos, ossan ne’e rai iha banku deit ba jerasaun aban-bainrua, ita agora lalika haoin atu moris diak.

Maibe, tuir programa governo nain, povo agora mos iha Direito atu moris diak. Ita gasta ossan, maibe, ossan ne gasta ho responsabilidade, hodi halo uma ba povo, hadia estrada, dada be-mos no hadia povo nia moris tomak, tenik Romeu Moises, Deputado CNRT iha uma fukun.

Tuir Moises, FRETILIN sira la hanoin povo moris diak ka at, ba sira importante mak sira bele manaan ossan makaas no bele hetan moris diak, sira nia familia iha kareta hodi sae, sira la interese ema seluk, Tenik Romeu. jos

Na’i-Ulun Balun, inklui Nai Ulun Opozisaun ‘Kaan Teen’

Jornalista: Vital Moreirra

Jornal Liberal - Tersa-feira, 30 Novembru 2011

Povo Aileba iha Ainaro hatene to oras ne’e, nain ulun balun iha Timor Leste, hanesan mos lider balun iha opozisaun kaan-teen ba rikusoin ne’ebe mak rai ne’e iha, tanba sira riku ona, maibe seidauk to’o nafatin hodi haluha nia maluk Timor oan sira seluk.

“Ohin loron ukun nain balun inklui lider opozisaun sira riku ona hakarak riku tan, iha kareta haat-lima seidauk to’o nafatin, la haree ba nia maluk ne’ebe sei dudu karrosa no sa’e bisikleta,” dehan Mario Mendonsa, Povo Aileba ida hateten.

Maski la temi naran husi nain ulun hirak ne’e, maibe Mario Mendonsa hateten, hahalok nain ulun hirak ne’e sei kria dezigualidade iha Timor Leste hodi fo nafatin ba potensia atu mosu iha konflitu ba rai ida ne’e. Sira neb’e uluk kaer governu agora ba pozisaun mos hakarak atu hadau fali poder hodi bele hetan lukru hosi ukun nasaun nian, tenki Mario Mendonsa.

Razaun Mario dehan ne’e tamba,” Povu kuandu bosu sira kontenti haree nia nain ulun sira, basa liman simu ho hamnasa,” dehan Mario iha Seminar ida iha Bekora, foin lalais ne’e.

Joao Maria, povo ida hosi Ai-lelehun  mos hatete katak, kuandu povu hamlaha pas sei laiha, unidadi sei labele akontese, kuandu rikusoin Timor Leste ne’ebe mak iha balun deit mak goza no sente. Joao Maria hatene katak lider opozisaun hirak ne’ebe agora koalia makaas iha Parlamento, la senti povo nia moris susar,  sira mak buka soran deit povo atu bele hadau poder, no sai riku ba bebeik.

Ezemplu, Joao Maria hateten, durante 24 anos iha ailaran nia hatene no koinese diak Timor oan sira nia hahalok, tanba bainhira nia elementu sira ne’ebe hamutuk ho nia iha ailaran bosu sira sei halo tuir orden ba ne’ebe sira ba deit, maibe kuandu hamlaha dala ruma ordem mos sira sei la halo tuir.

Nune mos komunidade ida iha Aidaba leten, Bobonaro hateten, see mak ukun nasaun agora tenke kaer metin prinsipiu no kultura Timor Leste hodi tau interese nasional iha oin, hodi nune’e Timor oan hotu bele senti valor ukun rasik an. Lib

Edio: Mai Ita Hamutuk CNRT Atu Liberta Povu

Wednesday, 23 November 2011 22:17 Written by Jenova 

 

Dili MLP – uluk ita hamutuk ho CNRT hodi liberta ba rai ida ne’e no agora ita hamutuk fali ho CNRT atu liberta ita nia povu.

Vise Sekretáriu Juventude , Edio Saldanha hateten katak papel juventude nian atu kontinua sai koordenador ba jerasaun ne’ebé foun,ita juventude sira tenke aprende no rona tuir programa ne’ebé iha atu ita bele banati tuir.

Ita tenke buka estuda barak no depois iha  kongresu juventude,  sira desidi ona programa saida mak juventude sira halo ona no atu kapasita sira nia a’an no moral ne’ebé iha oinsa mak juventude sira atu analiza sira nia a’an.

Foin dadauk ne’e ami halo inagurasaun ba laboratóriu ida iha ita nia sede hodi ita nia juventude sira bele aprende buat barak ne’ebé ami prepara hela iha laboratóriu OJP nian. Dehan Edio iha Suku Miligu Sub-distritu Cailako Dsitritu Maliana, Sábado (19/11/2011) Laboratóriu ne’ebé ami oferese ba ita nia juventude  sira hodi sira bele aprende buat barak ne’ebé ami prepara ona iha ita nia sede.

Hau husu ba ita nia juventude  sira atu tesik ba ita nia sede hodi ba halimar ka  aprende iha laboratóriu  OJP nian ne’ebé oferese tomak ba ita nia juventude iha distritu 13.

Xanana: 2012 Governu sei Aumenta Ponte Komoro 2 ba Diresaun Delta no Kampu Baru

Wednesday, 23 November 2011 21:18 Written by Pedro Delfim 

 

DIli MLP-Kuatru Governu Konstituisional ne’ebé hanaran ( AMP) Aliansa Maioria Parlamentar ne’ebé lidera husi Primeiru MInistru Kay Rala Xanana Gusmão hodi  planeia tan programa fóun atu aumenta ponte komoro 2 iha diresaun Delta hodi liga ba Kampun baru atu nune’e bele fasilita transporte pébliku ne’ebé dala barak hetan tránsitu barak.

Tuir Primeiru Ministru Kay Rala Xanana Gusmão hateten katak iha 2012 , govenru sei aumenta tan ponte Komoro 2 hodi responde transporte públiku ne’ebé agora dadaun komesa aumenta iha Dili laran atu nune’e bele redus transporte públiku ne’ebé sempre iha tránsitu  ida Dili laran ne’e.

“Iha ona planu governu Aliansa Maioria Parlamentar (AMP) iha 2012 sei aumenta tan ponte Komoro 2 atu nune’e bele responde transporte públiku ne’ebé durante ne’e sempre aumenta iha sidade Dili laran ne’e duni atu aumenta tan ponte komoro 2 atu bele responde transporte públiku ne’ebé sempre iha tránsitu”dehan Primeiru Ministru hafóin  halo diskusaun ba orsamentu Jeral 2012 iha Parlamentu  Nasional, Kuarta (23/11) Eis Prezidente Republika ne’e mos infórma tan katak infra-estutura sai hanesan  fator importante ba dezenvolvimentu nasional , ne’e duni tinan-tinan tenke tau nafatin perioridade ba iha área infra-estutura atu nune’e dezenvolvimentu bele la’o ho diak.

“Dezenvolvimentu atu la,o ho diak tenke hadi’a infra-estutura,  ne’e duni tinan-tinan governu sempre tau  liu perioridade ba iha área infra-estutura atu nune’e  dezenvolvimentu bele la’o hodi diak iha rai ida ne’e”dehan PM

PM Xanana Aprova Pagamento ba Veteranu 205.440

Maruricio Fernando- Sexta, 28 Outubru 2011 

 

Jornalista - Radio Reconstrucao Online

Dili-Primeiru Ministru (PM) Kay Rala Xanana Gusmao aprova pagamento ba total veteranus 205.440, katak sira ne mak iha direitu atu simu pagamentu hosi governu liu hosi sekretariu estadu veteranus.

PM Xanana Gusmao, Kinta (27/10) horiseik lidera inkontru ho veteranus hotu husi distritu 13 iha sentru konvensuan Dili (DCC) hodi koalia konaba problema veteranus ninia direitu, liu-liu sira nebee to’o agora governu seidauk selu. Primeiro Ministro Xanana Gusmao hatete katak iha legislatura ida ne'e, nia governo sei esforsa atu rezolve tiha problema rezidual veterano nian nebe'e to agora seidauk remata. Enkontru entre xefi governu ho veteranus sira ne’e, halao iha salaun sentru konvensuan Dili, eis merkadu lama.

IHa nia esplikasaun PM Xanana mensiona katak veteranus barak mak halo falsifikasaun dokumentus liu-liu konaba tinan, tanba nee fo mos impaktu ba prosesu pagamentu. Liu tan, iha ema barak ne'ebe la partisipa iha funu maibe hatama mos naran nudar veterano resistensia nian.

Iha nia intervensaun, Primeiro Ministro Xanana nebe nudar lider maximu rezistensia durante funu laran, hatete katak veteranos sira nia dadus barak mak tenki halo revizaun fali hodi determina nia estatuto lo-los.

“Ami admira uitoan balun veterano balun halo falsifikasaun, mas hau hare kazu ida iha ne’e ema ida deit ho sertidaun diferente, ida ne’e susar uitoan, sertidaun rua ho dadus ketak,” dehan PM Xanana.

PM Xanana mos husu ba veteranus sira seluk nebe'e naran seiduak iha, atu aprezenta dadus hodi bele diskuti. Planu naran veteranus sira nee sei fo sai iha loron 11 Novembru mai nee. 

Hanesan ita hatene, to oras ne'e veterano barak mak seidauk simu kompensasaun ba sira nia partisipasaun iha luta pela libertasaun. Tanba ne'e assunto ida nebe'e tenki rezolve lalais, Primeiro Ministro husu ba veterano hotu atu tenki honestu no tuir lolos mekanismo nebe'e eziste tuir lei.

Xanana : 2012 CNRT Sei “Sapu Rata” Hodi Kaer Ukun Mesak

Wednesday, 26 October 2011 16:33 Written by Pedro Delfim

Maubisse- MLP-Partidu Kongresu  Nasional Rekontrusaun Timor Leste (CNRT)  ne’ebé mosu derepente deit sai hanesan Partidu Politiku tamba haree ba rai no povu ida ne’e monu ba situasaun ne’ebé difísil ,  ho ida ne’e CNRT hamrik hanesan Partidu hodi salva tan rai no povu ida ne’e husi Krize  bo’ot ne’ebé akontese iha 2006, ne’e duni 2012 CNRT sei “sapu rata “hodi kaer ukun mesak .

Eis Rezisténsia ne’e informa tan katak Partidu  CNRT hamrik iha tempu ne’ebé difísil tebes maibe konsegue hetan kadeira 18 iha Parlamentu Nasional ne’e duni ohin loron CNRT halo tinan hat ona CNRT sei “sapu rata” iha 2012 hodi kaer mesak ukun.

“Partidu CNRT hamrik iha tempu ne’ebé difísil tebes maibe konsegue hetan kadeira 18 iha Parlamentu Nasional ne’e duni ohin loron CNRT hamrik tinan 4 ona, iha 2012 CNRT sei “sapu rata” hodi kaer ukun”dehan  Xanana. Tuir Prezidente Partidu  CNRT, Kay  Rala Xanana Gusmão hateten katak  Partidu CNRT hamrik derepente deit tamba haree ba rai no povu ida ne’e  iha situasaun ida ne’ebé difísil tebes ne’e duni CNRT hamrik hanesan Partidu Politiku atu salva rai no povu ida ne’e husi situasaun difilsil. 

“Partidu CNRT hamrik tamba haree ba povu no rai ida ne’e monu ona ba situasaun ne’ebé difísil tebes ne’e duni CNRT hamrik hodi salva rai ida ne’e husi situasaun difísil nian laran”dehan Xanana iha konsolidasaun Partidu CNRT iha Maubisse, Sábadu (22/10/11).

Tuir Koordenador Partidu CNRT Distritu Ainaro , Manuel Gigante hateten katak partdu CNRT ohin loron metin ona iha Distritu Ainaro ne’e duni iha 2012 Partidu CNRT sei manan maioria absoluta iha Distritu Ainaro.

“Partidu CNRT nian Estrutura ohin loron metin ona husi Distritu Ainaro  to’o baze ne’e duni iha 2012 Partidu CNRT sei Manan Maioria absoluta iha Distritu Ainaro “dehan Gigante iha Konsolidasaun.